2 Kòlentìan 4 - To kə Kəzə̀ kə̀ Fughu ko

Kɔ tə ufʉgha an tɔ̀e tə etsāʼ

¹ Ghəa Zə̀ kə̀ kwusō tsughu se zo a zəŋò ghàʼ, fùghù wò ghàʼ â fwàʼ kən, fəgha kə̀ li kə yo dzə̂ alebughusô fwee zaʼā a te.

² Ghàʼ n tùe màʼà ghəa à dəla a kətūw gho àsùghò ghəa a kələ̄m gho, ghàʼ tue nû alebəla kaŋlo an tɔ u aghì, ghàʼ fwəlà sùghò yò shwaʼ u Kəzə̀ wò. Ghəa ghàʼ laām kə̂aa səā wô êsəŋò enyə an ndɛ, ghàʼ ghəŋlo an sə kə Kəzə̀ enyəa ghî ghə̀n à dzə̀m kele tsughu enyəa ghàʼ ki nû kɛɛ wo.

³ Abugho Làbəlà è Dzùŋ zəla ghàʼ zughōo mô lo nàn kə eghəa ko, to e mò nàn dòʼò ko â ghî ghəla ghe kwə̂ənsâaŋ nduw.

⁴ Aŋ ghee ghən, ghəa ghe doʼŋkè boō fughu, zʉ̀ u mbī wə n tɔ u ghee u sâʼ màʼà, enyəa ghe lô koʼō dzɔ̀ɔdzɔ̀ tə aghəa təla tə lo an səghanyəgha mə̀là n lò an Làbəlà è Dzûŋ è Kə̀lestò wəla ù lǒ tò Kəzə̀.

⁵ Ghàʼ fɛ kə̀aa dzə̀ yò ghəa a ghùe ghaʼā gho; ghàʼ kə̂aa wò ghəa a Yɛso Kə̀lestò, enyəa ù lò Mughù ù te, ghǎʼ yia kuūwn lo kɔ̀ɔ mɛʼɛ mò aŋ ghəa e Yɛso.

⁶ À lǒ Zə̀ kəla kə fə̀ dzɛ̂ tsughu enyəa, “Tsə̀ tughūu səā wô alo kələ̄m”, Ù tughu sə wo am fə̂ŋ taʼa alefughūu tsughu tsə̀ enyəa a kôʼ səghanyəgha ŋ Kə̀zə̀ mə̀là n tughūu an sʉ u Kə̀lestò.

⁷ Ghàʼ fɛ kuuwn ki kɔ tə ufʉgha ten an tɔ̀e tə etsāʼ aledèe tsughu enyəa fɛ̀ɛn fɛ̀ɛn kə kədaʼa kən lò daʼa kə Kəzə̀, mò à yò dzə kə̀ kaʼā ko.

⁸ Tsû ù tsôo sə̌a kaaŋ ko a zəŋò ghàʼ an dziī ten tə̀ dzə̀m, sə̀ kǔuwn wīi tsə̀ghà yò ghaʼ. Nəghā è li zo tuw kə m kpuuw ghàʼ, a n tsoo tii zə̀ghàan yò.

⁹ Ghî à tsoo bwìi kàŋlo an tàaŋ tə efwēe taʼà, Zə̀ chia kə tsoō baʼà zəghàan yô ghaʼ, ghe n zàʼ màʼà ndùw ghàʼ, ghe n yo alekuūwn wī.

¹⁰ Ghî à tsôo lə̀ghaa ko alewī ghaʼ to ghe mò wi Yɛso, à fi lo enyəa ghàʼ kê lo alekpuūw sùghò ŋgòʼ e evʉ zəla Yɛso fə̀ kpuw ghè zo, enyəa ghî ghə̀ è koʼō wo mughùu e Yɛso zò a zəŋò ghàʼ.

¹¹ Aŋ ghəa sɛ̀ lô â tuw ko, a lo ko fʉgha u evʉ̄ aŋ ghəa e Yɛso, enyəa to ghî à mô koʼò wô mùghùu e Yɛso aŋ gwə̀n e eghùe e sɛ̀ zəla e kpuūw.

¹² Ghàʼ boo tsughu aledòʼò fʉgha wə evʉ enyəa ghɛ̀ kuuwn mughuu.

¹³ Ghəa ghàʼ lo mò ghàʼ ki boo è mɔ̀ʼɔ̀ zo ghàʼ à ghê ghùw wəla ù tɔm tsughu enyəa, “Mùgho fə̀ boo tsughu nû, mùghò ŋ kə̀aa wò alo aghəa.” Sɛ̀ yia boō fughu tsugho sugho, sɛ̀ yia a kə̂aa wo ghəa gho.

¹⁴ Ghàʼ kwo enyəa Zə̀ kəla kə fə̀ nî nughù kɔʼ Mughùbè Yɛso alo evʉ̄ lo nìi nùghùun dzə̌əŋ kɔʼɔ ghàʼ à ghee, ù nìi wô sɛ̀ a dzə̀m an sə kə wə̄n.

¹⁵ Ghəa ghə̀n à dzə̀m fɛ lo ko aleyòsò ghɛ̀; ghəa dzɔ̀ e Kəzə̀ kə̀ nyəŋō ndûuŋ nduw â ndə̀mà tə aghì tò, e lo nû aleghəŋlo ghe e ŋgee fughuu zɔ̀ɔŋ kò, mò à fi lo ŋkɔʼso ghe fughuu â Zə̀ kò.

A mughu bòʼ boo zəla a ki

¹⁶ Zən lò e ghee fəgha kə̀ li kə yo dzə̂ alebughusô fwee zaʼā a te. Ghəa ghue waʼa wə̄n fɛ a beē laā nduw, Zə̀ kə̀ tsôo kǔuwn fughuu tsə̀ghà ko ghàʼ â mùghù e fughu zo tsuʼu mən n dzə̀m n dzə̀m.

¹⁷ Nyàaŋ fə utsù fə̀là ghàʼ zuw kəŋo ndûw fɛ lo tsùuŋ yò, fə fɛ ndzùuŋ nǎaŋ ghàʼ an səghanyəgha n sə̀ŋò mə̀là n dòʼò tən, mò n tsə̀ghàtàʼà sə tsû wə̄n.

¹⁸ À ènyə lǒ bòʼ ghàʼ lɛɛn yò ghəa ghəla a koʼò nduw, ghàʼ lɛɛn ndùw ghəla a koʼò yo; mbuu ghəa ghəla a koʼò nduw kə̀aa lò tsughu ko nû, ghəla a koʼò yo kuuwn doʼò tə̀n nû.