Bìoball air-loidhne

2 Kòlentìan 3 - To kə Kəzə̀ kə̀ Fughu ko

Kɔ̀ɔ məlà m fwàʼa a tsəlà kàa m fughu mò

¹ Ghɛ̀ moʼò enyəa ghàʼ kôom zîi kpèʼe tsughu alekɛ̂ɛ ghue zaʼa ŋkāa a? Ŋkāa ghàʼ ki nû aledèe wô ghɛ̀ â mwàʼsò kò, aŋghəa ghî à li a ghəə̄ŋ kaŋlo, mò kə kɛɛ̄ ghàʼ à, ŋkāa kə̀mwàʼsò ghɛ̀ tɔm tsughu mo kə kɛɛ ghàʼ a?

² Ghuūghùe zɛʼɛ̄ e lo mwàʼsò kəla kə kɛɛ̄ ghāʼ, ghe tɔm naŋa tsughu am fə̀ŋ tə sɛ̀, enyəa ghî ghə̀n à dzə̀m tɔɔ̄ŋ kele.

³ Ghɛ̀ dêe wò sùghò nù enyəa ghɛ̀ lo kəmwàʼsò kə nughù wo aŋ ghùu Kə̀lestò ghàʼ nî wo. Kə̀lestò kamo mwàʼsò kə te kə tɔm dzə̀ alo ulwɔ̀m, ù mò tɔm an Zùʼ tə Zə̀ kəla kə lô â tuw ko. Kə̀mwàʼsò mò ù kà nyàʼ dzə̀ am mbwà wə atīa, mò ù nyàʼ am fə̀ŋ tə aghì.

⁴ Ghàʼ ghəa ghən dzâa bòʼ ghàʼ gaʼ fə̀ŋ a zəŋò Zə̀ kò am bàm e Kə̀lestò.

⁵ À yò dzə̂ enyəa aŋ ghùe zaʼā ghàʼ kɔʼkpe nû aleniī nduw enyəa ghàʼ ghəa ghən fwaʼà aŋ ŋgəŋ zaʼā, à kɔʼɔ̄kpe zaʼā e fughu Kəzə̀.

⁶ À lǒ wə̄n ù ghəə̄ŋ tsughu enyəa ghàʼ kɔʼɔ̄kpē, tò ghàʼ e fwaʼā a tsəlà kàa m fughu mò. Ghe kâ kàa m fughu n te ndòʼ tɔm naŋa am mwàʼsò kə̀ li ko, mo e bugho aŋ ghəa a Shʉ̀ghà ù Kəzə̀; tɔŋlo enyəa kàa məla ghe tɔm nû wǐi ghuw, Shʉghà u te u kuuwn ghəŋlo enyəa ghùw è mughu.

⁷ Lâŋ kəla ghe fəghàa naŋa nyə nduw am mgbà wə atīa kə mò ni wo evʉ. Lâŋ kə te kə mò bugho â səghanyəgha mò, ghî ghə Ezə̀lɛ̂ ghə̀ n yo dzə̂ alelɛɛ̄n ndûw sʉ Musî, u màʼà muuwn nyəghanlo, mo nyəghanlo e te e mò buʼ lo mo e sô lǎa ndùw sùghò nù.

⁸ Səghanyəgha məla m bugho an Ushʉ̀ghà so yìa boʼò lò alenyəghaan doʼò ndûw ênzə̂n.

⁹ Abugho lâŋ kəla kə lo aleghəŋlo enyəa ghùw kpuw lo alenyəghanlo, kəla kə lo aŋ ghəa zəla e naāŋ ghùw ù tsəghatsəgha ki aleŋgeē nyəghaan tsəghàasə.

¹⁰ Am bùʼ kən, fəgha kəla kə mò buʼù nyəghaan tsəgha m bùghò dòʼò mo kə kôom nyə̀ghaan yo, bòʼ nyəghaan zəla etsəghàsə e te zo.

¹¹ Abugho fəgha kə mò bughò â nyəghaan zo, nyəghanlo e te zəa e mîa tsughu, kəla kə doʼò tən ki aleŋge ki nyəghaan zo.

¹² Ghàʼ biso ki fə̀ŋ aŋghəa ghàʼ chiī tùʼ aŋ ghəa a te gho.

¹³ Ghàʼ yo dzə tò Musî ù fə̀ nî dzəlà tsughu ndɔ̀ŋ kò an sʉ̄ enyəa ghî ghə Ezə̀lɛ̂ à lô koʼò ghəa nyəghanlo zə laā mîan nyəā nduw a te.

¹⁴ Ghe n tughuso naŋa tsughu fə̂ŋ tə ghee tɔŋlo enyəa alebùghò sə nɛ, abugho ghe tɔɔ̄ŋ mwàʼsò kə kàa ŋ wǐi mò, ndɔ̀ŋ kə̀ mɔʼɔ̄ kə te kə naām lò ko mo ghe kaān tsɔʼ nùghù, tɔŋlo enyəa à lò ko am bàm e Kə̀lestò ndɔ̀ŋ kə te kə lo aletsɔ̄ʼ ughue.

¹⁵ Òo, alebùghò sə nɛ, abugho ghe tɔɔ̄ŋ mwàʼsò kə Musî kò ndɔ̀ŋ kə̀ n lo mo kə m fə̀ŋ tə ghee tə tsən naŋa.

¹⁶ Abugho ghùw tso gaʼ ndûw dzə̂ fə̀ŋ è wən a zəŋò Mughu ù te, Mughu ù te n tsɔ̀ʼ nùghù ndɔ̀ŋ kə te ko.

¹⁷ Ezə̀ŋ, Mughubè ù te wən lò Shʉghà u te wo, luʼū kəla Shʉghà u Mughu ù te u lo a fughu, ghî a kôom mùghù yo a tsəlà làŋ kò a fughu.

¹⁸ Ezə̀ŋ, sɛ̀ ghən à dzə̀m à sʉ zo mo a kâ dzə̀là kèle ndɔ̀ŋ kò a te a koʼò ndùw nǔ səghanyəgha m Mughu ù te mò, ghe fɛ kuuwn ndùw sɛ̀ am fwèen kə wə̄n an səghanyəgha ŋ wən məla n noōm ndûuŋ nduw. Səghanyəgha mən nughù wò aŋ ghùu Mughu ù te wəla ù lò Shʉghà u te wo.

« Roimhe

Air adhart »

2020

Lean sinn:

Ceanglaichean taic

Sanasan