2 Kòlentìan 2 - To kə Kəzə̀ kə̀ Fughu ko

¹ Mùgho mò tsəm tsughu am fə̂ŋ zaŋa enyəa Ŋ̀ ka ghɛ â fə̀ŋ kôom bùghò tèso sùghò enyəa M̀ bughò bwìin kòʼò ghɛ̀.

² Abugho Ŋ̀ ghəə̄ŋ tsughu enyəa ghɛ̀ zuw fɔɔn zo, à sə̀ mùghò kuuwn ghəəŋ ndùghò enyəa mùghò è duʼnlo à, mò à mgbàŋ yò ko ghɛ ghəla Ŋ̀ ghəə̄ŋ tsughu enyəa ghɛ̀ è zuuw fɔɔn zo a?

³ Zən lò e ghee mùgho mò tɔm wô ghɛ â mwàʼsò kə̀ chî, enyəa abugho M̀ mô bughòo kpeʼē, e kwo Ǹ lô bughò fanlō aŋ ghùu ghì ghəla ghe mô ki aleghəŋlo enyəa mùghò è tsoʼnlo. Zən lǒ bòʼ Ǹ tɔ̂ʼ kwò nû ghɛ ghə̀n à dzə̀m, enyəa abugho Ǹ duʼnlō, à fi lo enyəa ghɛ̀ duʼn sùghò nù.

⁴ Mùgho mò ghɛ tɔɔ wo mò ŋgee muŋe nù, mùgho n lo am bàŋ kə fə̂ŋ, à sə̀ mò alo kətuw. Mùgho mò tɔɔ dzə yo aleghəŋlo enyəa ghɛ̀ zuw fɔɔn zo, mùgho mò ləghaa aledèe wô ghəa Ŋ̀ ŋgeē ləghaa ghɛ a te.

Ghuuw màʼà bôo tə ghì ghəla ghe ghəə̄ŋ bo zo â ghɛ̀

⁵ Zə e lô enyəa abugho ghùw wɛʼɛ ù lì kpɛʼɛ̄ ghəə̄ŋ wàazə̀ enyəa ù zuw efɔnlo, ù kà ka ghəəŋ dzə̀ â mùghò, ù ghəŋlo â zəŋò ghɛ̀ a dzə̀m an dzii è lì — aleghəə̄ŋ tsughu enyəa ghəa a te a ka ŋge fɛ̀nlò â wə̄n wəla ù ghəə̄ŋ bonlo;

⁶ tɔŋlo enyəa tsû wəla ndə̀m è àghì am bvʉa zɛʼɛ̄ lo mo ghe m fughu â ghùw tò wən, u kpe nû.

⁷ E fɛ èzəŋ e lo ko enyəa ghɛ̀ ŋ ki aleghuūw maʼà bo e wə̄n, ghɛ̀ ŋ kòom dzə̀n nduw fə̀ŋ è wə̄n enyəa e kwo ko ù lò so doʼnlò alo emuŋe. Mò ghɛ̀ ka èzə ghəŋlo, muŋe e te lo aleghəəŋ wə̄n, fwee e wən e bughūu kômlò.

⁸ M̀ fɛ êzəŋ e buʼu wò kəghu â ghɛ̀ enyəa, ghɛ̀ de nduw â wə̄n enyəa ghɛ̀ naam ləghaa ko nû wə̄n.

⁹ Mùgho mo mwàʼsò kən â ghɛ̀ tɔɔ wo alemɔ̀ɔkôʼ enyəa ghɛ̀ nyɔʼɔ̀ bwìi to nù aŋghəa mùgho mò dzɛ̂ naŋā â ghɛ̀ à.

¹⁰ Abugho ghɛ̀ ghuūw maʼà bo e ghûw zò, mùghò ŋ ghuuw màʼà sùghò bo e ghûw ù te. Ghùw wəla Ŋ̀ ghuūw maʼà bo e wə̄n zo, abugho Ŋ̀ ghuūw maʼà bo e wə̄n, Ǹ êzə ghəəŋ tsughu an sə kə Kə̀lestò, bòʼ ghɛ̀,

¹¹ aleghəŋlo enyəa e kwo ko ghɔŋ e Satàn è lô bughò baŋà kɔʼɔ am bvʉa e sɛ̀, tɔŋlo enyəa a kwo nû dziī tə wə̄n tə̀ biigh tə̀ ghəəŋ tə aghəa to.

Fə̀mso kəla Pôl mò kele an naʼ e Tə̀lôas

¹² Ghəa Ǹ nyə nduw an naʼ e Tə̀lɔ̂as alendùw naʼà Tùm è Dzùŋ è Kə̀lestò zən fughu, mùgho n ndùw kòʼ tsùghù enyəa Mughu ù te maā dzì è fwàʼ kə te ko â mùgho a fughu alo enaʼ tsʉ naŋa.

¹³ Zə ŋ kuuwn fə̄msō mùghò enyəa Ŋ̀ kâ wàazə̀ ù sɛ̀ Taetùs fughu kôʼ dzə̀. M̀ fi dzɛ̂ nù â ghee fughu enyəa ghe doʼò kədzûŋ, mùghò n nùghù dàŋso ndùw e zaŋā zo am mbùʼ e Màsɛ̀donìa.

Ghəa e Kə̀lestò è kele ndùw tə̀ghaŋ

¹⁴ Ŋ̀ kuuwn fughu zɔ̀ɔŋ kə Kəzə̀; tɔŋlo enyəa aŋghəa ghàʼ doʼò ndûw fəgha ko kə mɔ̀ʼ ghàʼ à ghê Kə̀lestò, Zə̀ kə̀ mgbɛɛ sèe bwii tsə̀ghà ko ghàʼ tò ghî ghəla ghɔŋ e ghee e lo mo zə m bàŋ an zən e Kə̀lestò. Zə̀ chia kə tsəghà tsughu a zəŋò ghàʼ ghəəŋ tsughu enyəa ghàʼ zughòo ndûw tɔ wəla u lo aŋ ghəa Kə̀lestò, to u nyəŋō ŋgəaa tsughu luʼū tə̀n tə̀ dzə̀m tò zuʼù fə vʉa fə̀ ləə̄m fo.

¹⁵ Ghàʼ lo tò zuʼù fə̀ ləə̄m fo Kə̀lestò fughu nduw â Zə̀ kò — ghàʼ lo zuʼù fə̀ ləə̄m fo aŋ ghì ghə̀n à dzə̀m ghe zəā ndûw tuw ko àsùghò ghəla ghe kwə̂ən sâaŋ nduw.

¹⁶ Â ghì ghəla ghe kwə̂ən sâaŋ nduw, zuʼù fə te fə bughòo â vʉ zo, â ghì ghəla ghe zəā tuw ko, zuʼù fə te fə bughòo â mùghù zo. À lò ndugho ù kɔʼkpe alo eghəa tò zən à?

¹⁷ Ghàʼ yo dzə̄ tò ndə̀m è ghì a mbòʼkùm ghəla ghe nî shwaʼ u Kəzə̀ wò zəa a te, ghəa Zə̀ kə̀ kuūwn tum sə wô ghaʼ, ghàʼ kə̂aa wò shwaʼ waʼa ù səŋo wò an sə kə wə̄n tǒ kɔ̀ɔ ŋ Kə̀lestò n sə̀ŋò mò.