2 Kòlentìan 13 - To kə Kəzə̀ kə̀ Fughu ko

Tsʉ̂ e Pôl zəla e tsən tsughu shwaʼ u wə̄n wo

¹ Zən lo ghəəŋ tsughuu nəgha e kə̀ təgha zo abugho M̀ bughò bwîin kôʼ ghɛ. Tò aŋghəa mwàʼsò kə Kəzə̀ kə̀ dzɛ̂ tsughu enyəa, “Abugho ghɛ̀ sɔ̂ʼ ghu ko a zəŋò ghùw ghəa e te e lo ko aletɔ̀ʼɔ̀ tughu abugho ghî à lo a bə̀ghà ŋkāa a təgha ghe lô aletɔ̀ʼɔ̀ teso.”

² M̀ maā bûʼ kʉ̀ɛɛn ghî ghəla ghe mò bûʼ ghəəŋ bo zo sûesʉ àsùghò ghì à li ghə̀n à dzə̀m, M̀ fɛ kʉ̀ɛɛn wo ghee êzə̄ŋ mò Ŋ̀ kaān bughò fì, aŋghəa mùgho mò ghəŋlo mò Ǹ lo nû aŋghəa mùgho bughò bwîin kôʼ ghɛ an nə̀gha e kə̀bə̀ghà zaŋa zo — enyəa abugho Ŋ̀ kôom bugho, Ǹ lo zə̀ghàan yǒ ghee.

³ Aŋghəa ghɛ̀ ləghaa tsə̌a, Ǹ dêe wò nù â ghɛ̀ enyəa Kə̀lestò kə̀aa sə̌a wò àghəa a zəŋò mùghò. Aŋ ghəa zɛʼɛ̄, ù dɔ̀ɔ kpàʼa yo kpe wo, Ù lǎam dèe daʼa kə wə̄n am bvʉa zɛʼɛ̄.

⁴ Aŋghəa ghe mò bûʼ təghàa ko Kə̀lestò mò ù kì yo daʼa ko, vʉ̀a ù kuuwn lô â tuw ko an daʼa kə Kəzə̀. Ghàʼ ki sugho yo daʼa ko aŋghəa ghàʼ lo alo kəfəgha kə mɔ̀ʼ ghàʼ à ghee, yia a bugho aŋ ghəa zɛʼɛ̄, ghàʼ lo doʼn wò â tuw ko ghàʼ à ghee an daʼa kə Kəzə̀.

⁵ Lɛɛn tsughu nlò ghue zɛʼɛ zo ghɛ̀ koʼ enyəa ghɛ̀ naam gaʼ ko nǔ fə̀ŋ a zəŋò Kə̀lestò a. Mɔ̌ɔ kòʼo tsughu nlò ghue zɛʼɛ zo. Ghɛ̀ koʼòkɛ̀lɛ yo enyəa Yɛso Kə̀lestò lò a zəŋò ghɛ̀ à? À gɔ̀ʼɔ̀ mò ghɛ̀ mɔ̂m kè nù, kòʼ tsùghù enyəa ghɛ̀ m bvʉ̀ kòmlò!

⁶ Ŋ̀ kwo enyəa ghɛ̀ sô kə̀ŋò kòʼò sə̀a kɔʼɔ enyəa ghàʼ kâ bvʉ̀ kòom dzə̀.

⁷ Ghàʼ kuuwn gɔ̀ɔŋ ko enyəa ghɛ̀ lô ghəə̄ŋ boōn ghəa zo. À yò enyəa ghàʼ fɛ dzɛ̀ enyəa ghàʼ n tsə̀ghà, à lò aleghəə̄ŋ tsughu enyəa to ghɛ̀ mô ghə̌əŋ ndùw ghəa a tsəghatsəgha gho, ghəa e buʼù fween ko tò ghàʼ m bvʉ̀ kòmlò.

⁸ A yo dzə̂ aleghə̂əŋ bôon ghəa è li zo aŋ ghəa zəla e lo êsəŋò, sɛ̀ laam ti ko an êsəŋò è te.

⁹ Tɔŋlo enyəa ghàʼ duʼn nù abugho ghàʼ lɛɛ̄ ghɛ̀ yia kuūwn tughūu. Fəgha kə̀là ghàʼ gɔ̂ŋlo a te lo enyəa to ghɛ̀ mən tsughu aŋ ghəa e Kə̀lestò.

¹⁰ Ŋ̀ ghəa ghən fɛ tɔɔ mò Ǹ yo fì sɛ̀ enyəa abugho Ǹ lo bugho, mùghò è ke kôom tɔɔn yo aledè dwaʼa wəla Mughu ù te fughu â mùghò, mo e lo alebə̄ghāa tīsō kɔʼ, mò à yò dzə̂ alebuu saʼā.

¹¹ Aletsəlā tsughuu ghəa ghən a waazə̂ ghò, dòʼo nlò kədzûŋ. E dəma tsughuu ko aleghəəŋ ghəa à dzûŋ ghəla a lô tsəghatsəgha, zuw nlò dî zaŋa zo. Dòʼo nlò alo kəfəgha kə mɔ̀ʼ, ghɛ̀ è mughu alo ebūghūnlō. To Zə̀ kəla kə dêe ləgha zo, fughuu sùghò èbughunlo mô lǒ ghɛ̀ à ghee.

¹² Tɔ̀ʼɔ tɔɔŋ zuw tsughu nlò ghue zɛʼɛ zo aŋ ghəa à dzûŋ ghò tò ghî Kə̀lestò.

¹³ Ghî à Kəzə̀ ghə̀n à dzə̀m dzɛ̀ enyəa M̀ fughuu wô ghɛ̀ â tɔɔŋ zo.

¹⁴ To dzɔ̂ è Mughu ù te Yɛso Kə̀lestò, ləgha e Kəzə̀ àsùghò Zuʼ tə Kəzə̀ təla tə təmdzəə̄ŋ sɛ̀ alo kəfəgha kə mɔ̀ʼ, mô lǒ ghɛ̀ à ghee a dzə̀m.