2 Kòlentìan 12 - To kə Kəzə̀ kə̀ Fughu ko

Dzoō u Pôl àsùghò ghəa ghə̀là Zə̀ kə̀ mò dê â wə̄n

¹ Ŋ̀ ki aletsoō to num; aŋghəa Ǹ tsoō zəā ko yo fəgha ko a te, Ŋ̀ kuuwn ndùuw ko â sə ko aledzaā dzôo mò àsùghò ghəa ghəla Mughu ù te dèe â mùghò.

² Ŋ̀ kwo nu ghùw ù Kə̀lestò ù lì, à ezəŋ tsəghà tsughu tə̀nùu eghə̄m à ghè tò tə chìakò aŋghəa ghe fə̀ nî kɔʼ nduw wə̄n alo kəwalā edzuŋ èdzùŋ. Ù mǒ yia lo to aŋ ghùe u wə̄n, ŋkāa à mò lo mò ù n soʼ sə, Ŋ̀ kwo yo; à kwò ko Kəzə̀.

³ Ŋ̀ kwo ko enyəa ghùw wən mò kɔʼ nduw an tsə̀ fə̀ ləŋo fo, ŋkāa ù mò lo aŋ ghùe u wə̄n ŋkāa mò ù n soʼ sə; Ŋ̀ kuuwn kwo yo; à kwò ko Kəzə̀.

⁴ Fughu an tsə̀ fə̀ ləŋo fo, ù n zuw aghəa mò fəgha kə nsɔ̌ɔŋnchùw kə̀ li kə ki yo alekə̀aa.

⁵ To Ǹ tsɔ̂ fə̀ŋ am bàm e ghûw wə̄n, Ŋ̀ kuuwn yò dzə̂ tsɔ̀ fə̀ŋ aŋ ghùe waŋā, à gɔ̀ʼɔ̀ ko mò lò an lɛɛ zaŋā.

⁶ Abugho M̀ mô ləghaa aletsɔ̀ fə̀ŋ, M̀ mô so e yo dzə̄ ghùw ù làʼso, tɔŋlo enyəa M̀ mô so e kə̂a êsəŋò. Yìa kuūwn Ǹ tue maʼà tsughu aletsɔ̀ fə̀ŋ enyəa ghùw lò nîi mugho enyəa Ǹ tsəghàsə̀ fəgha kə̀là ghe kòʼò wo ghè kò, ŋkāa ghəa ghə̀là ghe zuw an dzughu zaŋā.

⁷ Alekuūwn ghəə̄ŋ tsughu enyəa e kwo Ǹ lô kɔʼso ghue wo bòʼ ndə̀mà tə kɔ tə aghəa təla Zə̀ kə̀ dê fughu wo â mùghò, ghe n tùm zə̀ghàa wò fʉgha ù fɔɔn wo a zəŋò mùghò enyəa u e fwaʼā a zəŋò mùghò tǒ tum è Satàn, aletə̀ghàsò mùghò enyəa e kwo Ǹ lô muūwn kɔʼsō tsəghàsò ghue wo.

⁸ Mùghò m buʼ kəghū â Mughu ù te tə nəgha tə təgha enyəa ù nìi nughù fʉ̀ghà ù fɔɔn wən a zəŋò mùghò.

⁹ Ù kuūwn dzɛ̀ â mùghò enyəa, “Dzɔ̂ zaŋa zə m kpe â ghù, tɔŋlo enyəa daʼa kaŋā kə ghue u tɔʼɔ̀ dèe sə̌a kɔʼɔ abugho ghùw lɛɛ̄ tsughu.” À fi lo enyəa Ŋ̀ ki aletsɔɔ̄ fə̀ŋ an lɛɛ zaŋā, to daʼa kə Kə̀lestò kə̀ è lo alemughu a zəŋò mùghò.

¹⁰ Zən lò e ghee mùghò boo tsughu lɛɛ zo, esuwnlò, elɛ, ghəa à tughu gho, kə̀fə̀mso àsùghò zəŋ to, mùghò ghəa ghen boo tsughu an zən e Kə̀lestò; nu abugho Ǹ lɛɛ̄ tsughu, M̀ fi tughuu nù.

Sə zəla Pôl gaʼ a zəŋò ghì a Kə̀lestò ghò aŋ Kɔ̀lênt

¹¹ Mùghò m fə̀n fəgha kə̀ laʼso ko mò à ghə̌əŋ ghɛ̀, mò à lǎam lò ghɛ alekɛɛ mugho, tɔŋlo enyəa ghəa M̀ bûʼ buw ko fəgha ko, ghî ghəla ghe toō num enyəa ghe lo kɔ tə tətūm, Ŋ̀ kwo dzə yo enyəa nyàaŋ fə eghəa fə̀ lo nû ghe tsə̀ghàsə mugho a te.

¹² Ghəa mùgho mò lo fì sɛ̀, mùghò n zumso tsughu ughue, dè wò tə̀tsə̌a, nsə̀ghàa, fwàʼ sùghò kɔ tə aghəa aledèe tsughu enyəa Ǹ lo tùm è Kə̀lestò è sə̀ŋò.

¹³ À lǒ mò ghəa è li lo nû e mɔ̀ʼ mùgho mò ghəə̄ŋ kaāŋ wo an ndzweŋe u ghì a Kəzə̀ u li wən a, mò Ŋ̀ kamō ghəəŋ fìa a lô ghɛ̀ à? À lò enyəa Ŋ̀ kamō fughu dzə̀ ghɛ â fəm ko. M̀ buʼ kəghu enyəa ghɛ̀ nizə mugho an nɔ̀ʼ è te.

¹⁴ M̀ moʼn nù alebùghò kôʼ ghɛ̀ aleghəəŋ tsughu nəgha e kə̀ təgha zo M̀ bughò bwîin koʼò ghɛ; Ǹ lo bvʉa yo ghɛ â fəgha kə̀ li ko. À yò dzə̂ fʉgha wɛʼɛ Ǹ ləghaa, Ǹ tsâʼ ghɛ̀. Ndzì yò dzə̂ alenyɔŋɔ ghe e wɛ̄ zo, à lǒ wɛ ù nyɔŋɔ̄ ghe e zə̂ zò.

¹⁵ To M̀ fughu fʉgha wə̀n ù dzə̀m Ŋ̀ ki â ghɛ, M̀ buʼù fughuu daŋsô tuw kaŋa aŋ ghùe ù ghɛɛ̄ŋ wo aleghəŋlo enyəa ghɛ̀ noo aŋ ghəa e Kəzə̀. Ghəa Ǹ tsoō ŋgeē ləghaa ghɛ enyə, à lǒ kwò ghɛ̀ kuūwn tɔʼɔ̀ ləghaa yô mugho à?

¹⁶ Ghɛ̀ lo nû alebōo enyəa Ŋ̀ kamo ghɛ â fəm kə fughu dzə̀. Ghî à li a kuuwn dzɛ̀ enyəa mùgho mò tɔɔ ko an unʉ̀ghà tò ekom, tsèe ghɛ̀, nìi kèlê fʉgha wɛʼɛ.

¹⁷ Ênzə̂n! À lò enyəa ghî ghə̀là mùgho mò tuū wo a vʉ̀a ghɛ̀ à mò lo dzì â mùghò alenɔɔ̄m zə ghɛ a?

¹⁸ Mùghò mò ghu kə buʼ tsughu nû â Taetùs enyəa ù bùghò tɛ̂ a vʉ̀a ghɛ̀, mùghò n tum tsughu wàazə̀ ù sɛ̀ ù lòʼ enyəa ù bùghò ghèe wə̄n. Taetùs mò bugho nɔɔm ni nû fəgha kə̀ li ko aŋ ghùu ghɛ̀ à? Ghàʼ à ghee mò mgbaŋa bwiī ko yo ghuw ko kə mɔ̀ʼ à, ki sugho umwam ù mɔ̀ʼ à?

¹⁹ Ghɛ̀ è dzaā ko enyəa ghəa ghə̀n à dzə̀m fɛ lo enyəa ghàʼ dəmà alebâaŋ ghue zaʼā an sə kɛʼɛ̄ an nə̀gha zən e dzə̀m. Ɛ̂ŋgaŋ dzə̂! Ghàʼ ghəa ghən kə̂aa an sə kə Kəzə an dziī zəla Kə̀lestò mò lô aleləghā enyəa ghàʼ kə̂a à tè. Ghəa ghə̀n à dzə̀m ghàʼ ghəŋlo a waazə̂ ghaŋa gho, ghàʼ ghəŋlo enyəa ghɛ̀ noo aŋ ghəa e Kəzə̀.

²⁰ M̀ fɛ tsəŋo enyəa abugho Ǹ lo bugho fì, Ǹ lô bughò koʼò ghɛ mò ghɛ̀ yo dzə̂ fəgha kə̀là M̀ moʼò enyəa ghɛ̀ lo ghè kò, ghɛ̀ koʼ kɔʼ sugho mugho mò Ǹ yo dzə̂ fəgha kə̀là ghɛ̀ mô ləghaa enyəa mùghò è lo ghè kò. Ǹ tsəŋo enyəa Ǹ lô bughò koʼò wo mò ghɛ̌ yia zughūu, mʉnlo èghue, pfʉso nnə̀ghà alo eghùe, kùmè alo eghùe, màʼn kǎaŋ tə̀nùʼ alo èghue, màʼn kǎaŋ tə̀fom alo eghùe, kɔʼso èghue, sòʼò kǎaŋ sùghò ùtsù.

²¹ M̀ fɛ tsəŋo enyəa abugho Ŋ̀ kôom bugho Zə̀ kə̀ lô yia də̂nsò nù tuw kaŋa ko a an sə kɛʼɛ̄, mùghò è ke diī enyəa ghî ghəla ghe mò ghəə̄ŋ bo zo kaām n ti màʼà dzə̀adzə̀ tə aghəa tə̀ nuūŋ tə te to — sə à səa gho, àsùghò ghəa à ndzaŋa kaaŋ ghən.