2 Kòlentìan 11 - To kə Kəzə̀ kə̀ Fughu ko

Pôl ghèe ghê tum tə agha to

¹ To ghɛ̀ mo nyɛʼɛ zəən tsughu ko nû aŋghəa Ǹ tsôo kə̂aa ndûw ko ghəa gho tò Ǹ laʼsò nù; nya zhəən tsughu ko nlò nû!

² Ŋ̀ ki ŋgòʼ è lə̀ghà è li zo a zəŋò ghɛ̀ mò a ghə̌əŋ Kə̀zə̀, tɔŋlo enyəa mùgho mò ghɛ kpoōm naŋa tsughu â Kə̀lestò, alenìi fughuu ndûw ghɛ̀ tò a lô fughuu nduw wìzən wəla ù naam lo mbumbùʼ â nùm ù wən u mɔ̀ʼ.

³ Ǹ sô fɛ tsəŋo enyəa aŋghəa zughu fə̀ nɔm fughu tsughu Êf, mò zughu è te tɔɔ ko nʉghànʉghà tò ekom, ghe lo sèe mɛ̀ŋso nù tuw wɛʼɛ wo, ghɛ̀ lo ti zəghāa tsughu kùum kə kəfwàʼ kəla ghɛ̀ fwaʼā â Kə̀lestò am fə̂ŋ zɛʼɛ e dzə̀m, mò ghɛ̀ fwaʼà an dziī è zɔ̀lɔ.

⁴ Ǹ ghəa ghən enyə kə̀aa bòʼ enyəa, abugho ghùw bùghò fughu wô ghɛ â tsʉ̀ zò kùu ndùw Yɛso ù nùghù mò à yò dzə̂ wəla ghǎʼ mò dzaā, ŋkāa ghe yia nî wò shʉghà ù li wo mò à yò dzə̂ wəla ghàʼ mò nî wo, ŋkāa abugho ghe yia boō ndûw làbəlà mò à yò dzə̂ zəla ghɛ̀ mò bûʼ boō dzə, ghɛ̀ m mbà kpènì ghee.

⁵ Ghî ghəla ghe toō ko num enyəa à bìso lǒ ghee tum tə Kə̀lestò to, Ŋ̀ kwo dzə yo enyəa ghə̂an fə̀ li fə lo nû ghe tsə̀ghàsə mugho a te.

⁶ Abugho M̀ bûʼ tɔ̂ʼ kwo ko yô ghəa à kə̀āa gho, Ŋ̀ kuuwn ki nû tɔ wo, ghàʼ ŋ kəŋ dziī tən tə̀ dzə̀m aledèe səā kɔʼ aghəa ndɛ â ghɛ̀ alo aghəa a dzə̀m.

⁷ À lò enyəa mùgho mò bonlo eghəa aletsughuso naŋā tsughu ghùe waŋa a ghueetsə̄ a, enyəa ghɛ̀ kuuwn ghaʼ kɔʼ bòʼ mùgho mò kə̂aa wô shwaʼ u Kəzə̀ wò â ghɛ̀ mò ghɛ̀ kâ mùghò tsə ŋkāa?

⁸ À mò mugho tsəa dzweŋe u ghì a Kəzə̀ ù li wə̄n aŋghəa mùghò mò fwaʼa â ghɛ̀; alekùum nîi tsughu, e fɛ lǒ enyea mughò mò fʉgha u mbaaŋ niī wo nû aŋ ghùu ghì a nughù ghò alebùghò yosò ghɛ̀ a te.

⁹ Aŋghəa mùgho mò lo fì sɛ̀ mò Ŋ̀ ki yo fəgha ko, Ŋ̀ kamō ghùw fə̀mso dzə̀, nu à mò mugho yosō waazə̂ a sɛ̀ ghəla ghe mò nughù wo am Màsɛ̀donìa. M̀ fi doʼò wò nù, Ǹ doʼn wò nù mùghò è tsoo fəmso yo ghùw wɛʼɛ ù li an dziī è lì.

¹⁰ Tò aŋghəa Kə̀lestò kə̀aa səŋò zo, à lò sugho êzə̀ Ŋ̀ kə̂aa sugho səŋò zo, ghùw ù lì vʉ̀a ù yò am mbùʼ e Akayà e dzə̀m ù lò alebughū naŋa mùghò am fə̀ŋ zəla n tsoō ghè zò.

¹¹ Mùghò enyə kə̀aa bòʼ kwò à? À lǒ bòʼ Ǹ ləghaa yô ghɛ ŋkāa? Zə̀ kə̀ kwo nû enyəa Ǹ ləghaa nù ghɛ.

¹² Ǹ ndûuw ko â sə ko â fəgha kəla M̀ fwaʼā ghè kò, alebuū bughusô fwee e ghì ghəla ghe tsɔɔ̄ fə̀ŋ enyəa ghe fwaʼà sùghò eghəla to ghàʼ fwaʼā aŋ ghəa ghəla ghe tsôo kaāŋ fə̀ŋ a te.

¹³ Ŋgoʼ è ghì ghən lo tum tə agha, ghî a kə̀fwàʼ à fwəlà a sə aghì ghò, ghe nyə gbəla doʼò kɔʼ tò tum tə Kə̀lestò.

¹⁴ M̀ məgha nû, Satàn bùʼù nyəā gbəən doʼn kɔʼɔ̄ aŋ tsə̂ndəgha è zɔ̀lɔ.

¹⁵ À fi yo dzə̂ ghəa è fughu zo abugho kɔ̀ɔ ŋ wən n nyə bwəlā kɔʼ sugho tǒ kɔ̀ɔ n tsəghatsəgha mò. Alegùŋsò tsughu, ghe kê bɔ̌ɔm kele gùŋsò tsùghuu sùghò fəgha kəla kə kpeēn tsughu am fwàʼ kəla ghe mò fwaʼ ghè kò.

Pôl tǒo num kùu ndùw fala e wə̄n

¹⁶ Ǹ dzâa kpeʼē tsughu, e kwo ghùw lò moʼò enyəa Ǹ laʼsò nù; ŋkāa mò ghɛ̀ se nîi ndûw ko êzə̀, boo tsughu nlò mugho tǒ ghùw ù làʼso wə̀ èvʉ̀, tò mùghò è bɔŋɔ nyɛʼɛ tsɔɔ̄ sugho fə̀ŋ.

¹⁷ Ghəa ghə̀là Ŋ̀ kə̂aa fɛ, Ŋ̀ kə̂aa dzə̀ yò an daʼa kə Mughu ù te, Ŋ̀ kə̂aa tò ghûw ù làʼso, aletɔʼɔ̄ too num enyəa;

¹⁸ aŋghəa ndə̀m è àghì tsɔ̌ɔ fə̀ŋ am fʉgha u mbī wo, M̀ bɔŋɔ tsɔ̀ɔ sùghò nù.

¹⁹ Tɔŋlo enyəa ghɛ̀ duʼn ndùw enyə alebwiī ghuw ko kə mɔ̀ʼ ghɛ̀ ghê ghì à laʼso gho, mo ghue e eghùe zɛʼɛ̄ e tɔɔ nù!

²⁰ Ghɛ̀ boom naaŋ nù abugho ghùw nì naŋā ghɛ tò ukɔ̂, ŋkāa zəāa an zuʼso fɛʼɛ̄, ŋkāa tsèe ghɛ̀ nìi nùghùun fʉgha wɛʼɛ, ŋkāa kɔʼso èghue, ŋkāa abugho ù ghəə̄ŋ ko ghəa à nyuɛʼɛ̄ a fə̂ŋ ghò ênzə̂n a zəŋò ghɛ̀.

²¹ Ǹ dzâa wò ko nù an tùw kə̀ dəla ko enyəa ghàʼ ghən mò lɛɛ ghaʼ nû aleghə̂əŋ ghəa yì. Abugho ghùw kǔuwn ləghaa ko aletsɔ̀ fə̀ŋ aŋ ghəa è li zo — Ŋ̀ ghəa ghən fɛ kə̀aa tǒ ghùw ù làʼso — M̀ bɔŋɔ tsɔ̀ɔ sùghò nǔ fə̀ŋ a te.

²² À lǒ mo ghe lo tə̀ Hebə̀lù à? Ǹ lo sugho nû êzə̀. À lò mò ghe lo ghî ghə̀ Ezə̀lɛ̂ à? Ǹ lo sugho nû êzə̀. Ghe səa n tigh kə Abə̀làhâm à? Ǹ sə sugho fughu.

²³ À lǒ mo ghe lo kɔ̀ɔ ŋ Kə̀lestò à? Ǹ tsəghàsə̌ ghee — Ŋ̀ ghəa ghən fɛ kə̀aa tǒ ghûw ù zə̀ghaa. Mùgho m fwàʼ ndə̀mà tə aghəa tə̀ səŋò tò, yìa Ŋ̀ kɔʼ ndughutsaʼ an ndə̀mà te tə̀nə̀gha, ghe m mùghò bu sə an ndə̀mà tə tə̀nə̀gha, yìa Ǹ nɔ̂sə̄ aŋ ghùu vʉ zo an ndə̀mà tə tə̀nə̀gha.

²⁴ Dzûu tə̀ n sa ghaŋa a tsɔʼ sə aŋ ghə̀m n tə̀kwùu n təgha à ghè mǒ tɛndzūghū alo tənəghā tə tɛ̀.

²⁵ Ghe yia bu sə mugho tə nəgha tə təgha alo ekwùu; ghe yia təə̄m sə mugho alo atīa e nəgha e mɔ̀ʼ, kwə̀n chia kə kwə̂n sə ghî ghò nəgha to tə təgha à mùghò a te. Yìa Ǹ təgha bwiī nduw an dzughù bùghò təgha zee è nduw.

²⁶ Am bwìi zaŋa zəla Ǹ tsoʼn səā bwîin zeē, dzùghù mò kuŋso ke mugho, ghîitsɔŋɔ ghe wì kè mùghò, Dzûu tə̀ ŋ wì kè mùgho, àsùghò Tòʼò zò. Ghe ŋ wì kè sughò mughò enaʼ, mùghò m kpùw kè sùghò aŋ ŋgwə̄n àsùghò and dzùghùntsòʼ, mùghò n lo sugho an utsù ghàʼ à ghêe fən ghə agha gho.

²⁷ Mùghò n də̀m, yìa biso zuw tsughu fala zo, mùghò ŋ koʼò bwǐi ndùw, mùghò n lo dzə̀ŋ, fə̀ŋ è m̀mùghu n zuʼso mùghò, mùghò n zəa tsə̀ghà yò, lò tsəgha ko bêe tə̀ bèe, mùghò n lo am ufwō mò Ŋ̀ ki yo ndə̀mà təndzʉ aledzə̀là.

²⁸ Alebùʼù nîi tsughu ghəa à li ghən, Ŋ̀ ŋgee kɔɔ zêe ghue waŋā aŋ ghɛ̀ zəla Ŋ̀ ki a zəŋò ndzweŋe u ghì a Kəzə̀ ghò.

²⁹ À lɛ̌ɛ tsughu ndugho a, zəa e doʼŋkè mɔ̂m mùghò a? Ghe bvʉ̂sò màʼà ndùghò, zəa e doʼŋkè mɔ̂m mùghò a?

³⁰ Abugho Ŋ̀ ki aletèlè to num, Ŋ̀ ki aletō aŋ ghəa ghəla a dêe tsughuu lɛɛ zaŋā zo.

³¹ Kə̀zə̀, Tselè Mughubè Yɛso Kə̀lestò, wəla ù ki kɛɛ wəla u doʼò tən kwo nû enyəa Ŋ̀ kaʼa yo ghā gho.

³² A m bùghò Ǹ lo an Dàmaskùs, gɔvə̀nò wəla ù mò fwaʼà a tsəlà Də̀ŋ kə ghee ko, tɔɔŋ Aletàs, m fughu tsughu kəlâŋ enyəa ghe fêe tsughu naʼ e Dàmaskùs e dzə̀m to ghe kwu mugho,

³³ ghe ŋ kuuwn nì zə̀ghàa sə̀ tsùghù wò mùghò alo kəkə̂aa mo ghe mugho tùm sə̀ wò aŋ tɔ̀ŋ è ndughu am bəgha kə ughɔŋ u enaʼ wo, M̀ fi ti sə nû aŋ ghu kə wə̄n.