2 Kòlentìan 10 - To kə Kəzə̀ kə̀ Fughu ko

Pôl bǎaŋsə ùghue kùu ndùw fwàʼ kə wə̄n

¹ À lò ghuūghùe waŋā Pôl, Ǹ zumso buʼū wô ghu ko â ghɛ̀ an zən e Kə̀lestò wəla ù bughunlō, zʉ̀ lò sugho; mùghò wəla ghî a li a kə̂aa kaŋlo enyəa, abugho Ǹ ti an sə kɛʼɛ̄ mùghò n tsəŋlo, mùghò ŋ kuuwn ki fə̀ŋ abugho Ǹ nughù nduw!

² M̀ buʼu kə̀ghu â ghɛ̀ enyəa e kwo ghɛ̀ lô tsəə̄n mugho enyəa mò bughò fì, mùghò ŋ kə̂aa ghɛ̀ â ghəa gho an tɔɔn kə dzə̂, nu Ŋ̀ kwo nû enyəa Ǹ lo nû alekə̀a tɔɔŋ kə dzə̂ â ghì ghəla ghe moʼò enyəa to M̀ mô ghə̌əŋ wò àghəa aŋghəa mbī ləghaa.

³ Sɛ̀ kpuwso mùghù ko nû fɛ am mbī, sɛ̀ kuuwn təma yo tsàm è sɛ̀ aŋghəa ghî a mbī a təma è ghee a te.

⁴ Fʉgha u tsam u sɛ̀ ù yo dzə tò u ghì a mbī wo, u kuuwn ki daʼa kə Kəzə̀ aletəma sâʼ luʼū təla ghîikətuw a sɛ̀ à bəgha doʼò kaŋlo a te.

⁵ Sɛ̀ buu nyəmâ làŋà tə dzughu à pfʉa gho àsùghò làŋà tə aghəa təla tə ghəŋlo enyəa ghəa a Kəzə̀ à ka ndûw â sə ko am fʉgha u tsam u sɛ̀ wən. Sɛ̀ kwuu kɔ̀lɔ̀ tsùghûu mòʼnlò ghì ghəla ghe ləghaa yo alezuw shwaʼ u Kəzə̀ a ŋ ghəə̄ŋ tsughu ghî a te gho enyəa ghe e zuuw wo â Kə̀lestò.

⁶ Ghàʼ yəa ti ko an sɔ̀ŋ è bii zo alebɛ̄ mbɛ̄ an tuw kə ghì ghəla ghe zuūw yo â Kə̀lestò, abugho ghɛ̀ lo doʼò mɛʼɛ̀ tsughu ghî ghəla ghɛ̀ tɔʼɔ̀ zuūw â Kə̀lestò.

⁷ Ghɛ̀ lɛɛn tsughu kô aghəa a beē, mò ghɛ̀ kâ tɔ̀ʼ lɛ̌ɛn nyə tsughu dzə̀. Abugho ghùw tɔ̀ʼ kwo enyəa e lo ghùw ù Kə̀lestò, ù zə̀əŋ tsughu ghue u wə̄n enyəa aŋghəa ù lǒ ghùw ù Kə̀lestò, ghàʼ lo sugho êzə̀.

⁸ Abugho Ǹ nyɛʼɛ̄ bûʼ to tsəghàsò ko num an dwaʼa wəla ghàʼ ki, Mughu ù te fughu wo enyəa ghàʼ bɔɔ̄ tiso wô ghɛ̀ a te, mo a wiin màʼn n yò boo zɛʼɛ zo, Ǹ sô yò dzə̂ alekele tùw kə̀ dəla ko.

⁹ E kwo e lô doʼnlo enyəa M̀ beme wò ghɛ̀ am mwàʼsò wəla Ǹ tɔɔ̄ wo â ghɛ̀.

¹⁰ Ghî à li a dzɛ̀ enyəa, “Shwaʼ wəla ù tɔɔ̄ am mwàʼsò u wə̄n u dəlà nù, tɔɔn sùghò, abugho ù kuūwn ti aŋ ghùe u wə̄n an sə kə sɛ̀ ù n tsəŋlo, shwaʼ u wə̄n wə ŋ kwuu yo ghəa zo.”

¹¹ Ŋgòʼ è ghì yi ki alezuūwkɛlɛ tsughu enyəa fəgha kə̀là ghàʼ tɔɔ̄ wo ghè kò abugho ghàʼ buw, à lò ghəa à mɔʼɔ ghəla ghàʼ ghəə̄ŋ ghè ghò abugho sɛ̀ lo a dzə̀m.

¹² À yò dzə̂ enyəa ghàʼ ləghaa alefòʼn ndûw èghue ŋkāa ghàʼ bâan ndûw ghàʼ à ghê ghì ghəla ghe dzɛ̂ enyəa ghe lo ghî à ne gho, abugho ghe bânlo êzə alo eghue, ghe fi lâʼsò màʼn ghue e ghee.

¹³ Ghàʼ kuuwn yò dzə̂ aletō num a tâa daŋso kə̀bəŋ am fwàʼ kən, ghàʼ kuʼù nǎaŋ tsughuu ko an də̀ŋò kəla Zə̀ kə fə̀ dzɛ̂ enyəa ghàʼ kuʼù naŋa a te, alekùʼù naŋa wò a zəŋò ghɛ̀.

¹⁴ Ghàʼ kâ ndùw tsə̀ghàtàʼà dzə̀ bəŋ ko am fwàʼ kaʼa tò è so a lo ghî ghəla ghe mò doʼŋkè bughò tɛ̂ fia alô ghɛ̀, ghǎʼ mò lo ghî a sʉesʉ gho alebùghò a vʉ̀a ghɛ̀ â Làbəlà è Kə̀lestò è Dzùŋ.

¹⁵ Ghàʼ too dzə̀ yǒ num tɛ̀ɛn dàŋso kə̀bəŋ, nyəa daŋso ndùw am fwàʼ u ghì à li gho, ghàʼ laam chìi ko tùʼ enyəa aŋghəa fə̀ŋ zɛʼɛ ndoʼò nɛɛ nduw, fwàʼ kaʼa kə lo tsoo dùuw sə̌a ndùw nù am bvʉa zɛʼɛ̄.

¹⁶ Ghàʼ è ke lo alekə̀aa shwaʼ ù dzùŋ wə̄n an nàʼà təla tə doʼò sə nduw a fia alô ghɛ̀, ghàʼ è ke too sugho yo num alo kəfwàʼ mò ghî nughù ghə̀ fwàʼ nàŋa an də̀ŋò kə̀ li ko

¹⁷ Mwàʼsò kə Kəzə̀ kə̀ dzɛ̂ enyəa, “Ghùw wəla ù ləghaa aletsɔ̀ fə̀ŋ alo eghəa, ù kì aletsɔɔ̄ fə̀ŋ am fəgha kəla Mughu ù te lo mò ù m fwàʼ.”

¹⁸ Tɔŋlo enyəa Mughu ù te nîi yo ghùw wəla ù kɛɛ̄ tsughuu ghuè u wə̄n wo wə̄n à nəŋ ko tò kəfəgha, à lǎam lǒ ghùw wəla Mughu ù kôʼ tsughu enyəa ù kpè nû.