1 Timotì 6 - To kə Kəzə̀ kə̀ Fughu ko

¹ Ghî ghəla ghe lo kɔ̀ɔ mò ki alefughuu kɔʼso mò â ghe mughùbè a ghee gho, tò ghùw ù lì ka e kəaa boon ghəa zo an zən e Kəzə̀, àsùghò tsʉ̀ e sɛ̀ zò.

² Kɔ̀ɔ məla ghè mughùbè a ghee a lo mo ghe m boo fughu â Kə̀lestò, e kwo ghe lô so e koʼò lʉ̀ghaa ghê mughùbè a ghee gho, bòʼ enyəa ghê mughùbè a te a boo fùghù tsùghù dzə̀ â Zə̀ kò. Ghe laam ki alefwaʼā dzɔɔ̄ â ghê ghee, bòʼ enyəa ghe fwaʼà a tsəlà ghì ghəla ghe boo fughu sugho â Zə̀ kò tǒ ghee, ghe yia ki sugho ləgha zo a zəŋò ghee. E tɔʼɔ̄ zoʼn tsughu ghî ghò aŋ ghəa ghən gho.

³ Abugho ghùw zoʼn ghî gho an tsʉ̀ è nughù zò tsə̀ghàa sə̌a ko yo zəla M̀ fughu wo â ghù, mo tsʉ̂ e te e boom dzəəŋ yo ghèe tsʉ̀ e Mughubè ù sɛ̀ Yɛso Kə̀lestò àsùghò zəla e zoʼn ghî ghò alemughu aŋghəa Zə̀ kə̀ ləghaa enyəa sɛ̀ è mughu a te.

⁴ Ghùw ù te ŋ ki alekele tsughu enyəa ù tsòo ghaŋso kaāŋ tsə̀ghà sùghò ghue u wə̄n mò ù bùʼù zuuwkɛlɛ yo ghəa è li zo. Tsû u ghûw ù te e lo ko alekəŋo ŋgəaa kaaŋ tsəgha shwaʼ wo, ghəəŋ sughò enyəa ghî ghə̀ e pfʉa kaaŋ dzughu gho, zùghùu ŋgə̂aa kaaŋ tsə̀ghà sùghò, mo ghəa a te a bughò â mʉ̌ʉn ko, təfom, kə̀ghòʼ, moʼnlò è biigh zo, àsùghò ndə̀m kò.

⁵ Ghî ghən lo tsəgha ko alo kəzùghù, tɔŋlo enyəa ghe moʼn tə̀la ko èbo, ghe sô kôom kwo dzə̂ yo səŋò zò. Ghe sô moʼnlò enyəa fwàʼ kə Kəzə̀ kə lo alekə̄ŋ ekum a te.

⁶ Fwàʼ kə Kəzə̀ kə kûu fùghu nù namso kə̀ ne ko, abugho a kuūwn ki fə̂ŋ tə̀ zʉʉ̄n to an nyàaŋ fə̀là sɛ̀ ki ghe fò.

⁷ Tɔŋlo enyəa sɛ̀ ka fə fɛ am mbī nyə wò dzə̀ â fəgha kə̀ lì ko, à lo sugho êzə̀, sɛ̀ lo yo alenì nughù sə â fəgha kə̀ li ko fɛ am mbī.

⁸ E fi lo êzəŋ enyəa, abugho sɛ̀ ki dzə̂ fʉghàzəa wo àsùghò ndzʉ to, sɛ̌ fi tso lò kədzûŋ.

⁹ Ghî ghəla ghe kuūwn ləghaa alekum, à lò nyàaŋ fə eghəa â ghùw ù te alekele kə̀tsòmlo aleghəŋlo èbo, bvʉ̀a sùghò alo fətə̀ma. Ghe ləghaa aleghəəŋ ghəa à kwu gho, ghəa ghəla a dzûuw maʼn mughù e aghì zò àsùghò e ghee zo.

¹⁰ Tɔŋlo enyəa sə à səa gho aŋ ghəa kua nîi wò ndə̀mà tə eboo. Ghî ghəla ghe ŋgee ləgha ghə a ukʉa gho ghə n zə̀ghàa màʼà fəgha kəla ghe boō fughu a te, ghe yia faān kaŋlo tǒ ghùw wəla u tsuʼn kaāŋ tsughu ghuw u wə̄n alo fənyə̄.

¹¹ Yia a bughò ghû a Timotì, ghù lǒ ghùw wəlà ghù lo mò ghù m boo fughu â Zə̀ kò. E kwo ko ghù lò boōm naāŋ dzʉ wə̄n wo, e kəŋo ko ghəa e tsəghatsəgha zo, fwàʼà ndùw fwàʼ kə Kəzə̀ kə̀a, naaŋ ndùw fə̀ŋ a zəŋò Zə̀ kò, ki sugho eləgha â ghì ghò; kɔɔn tsughu sugho fə̀ŋ, zumso tsughu sùgho ùghue.

¹² Ghù bǒo fughu â Zə̀ kò, e təma nduw tsàm è dzùŋ zən am bo e te zo alekelê mughù è doʼn təla zəla ghe fə̀ tɔŋɔ̄ ghû a te, an nə̀gha zəla ghù fə̀ boō fughu â Zə̀ kò an sə kə ndə̀m è àghì àsùghò enyəa ghù kè tì zə̀ghà kòʼ yò alefwàʼ â Zə̀ kò.

¹³ M̀ fɛ êzəŋ e dzâa wò nù â ghù an sə kə Kəzə̀ kəla kə fughu mughù zò à fʉgha wə̄n wo ù dzə̀m, àsùghò an sə kə Kə̀lestò Yɛso wəla ù fə̀ ndzə̂əm kə̂aa ghəa gho an sə kə Pontios Paelɛ̀t, to ghùw wəla ù kwo səŋò zò,

¹⁴ enyəa ghù e bwiī an lwàŋ wə̄n wo mò ghù nɔ̀ʼɔ yo, ghî ghə̀ e ke yo alesāʼ ghû; nì nùghù ezə̄n ndùw tɛ̀ ndùw an tsû wəla Mughùbè ù sɛ̀, Yɛso Kə̀lestò kè kôom bugho a te.

¹⁵ À lo ghəəŋ tsughù Kə̀zə̀ enyəa Yɛso bùghò am nə̀ghà zəla ù ki alebùghò a te, tɔɔŋ Zə̀ kəla kə ghaʼ tsəghà fʉgha wo u dzə̀m, Tsəntəmbî, Də̀ŋ kə dwə̀ŋ, Mughu ù ghê Mughùbè.

¹⁶ Zə̀ kəla kə kê kpuūw koʼò yo, mo kə mughu an tsə̂ zəla à nyəghaan tsə̀ghà tàʼà sə ko ghè zò mò fəgha kə̀ li kə yo alendùw tɛ̂ fughu, mò ghùw ù lì kaam bûʼ kòʼ kòʼ ŋkāa ghùw kè bùʼ kòʼ kòʼ yò. À ki wən kɔʼso mò ndzə̀m à daʼa ko. Zə e lo ko êzə̀.

Etsʉ̂ â ghì à kuu gho

¹⁷ Kwɛ̀ɛn tsughu ghî ghəla ghe kuū am fʉgha u mbī wo, enyəa ghe ka e kɔʼso ghue zo a te, tɔŋlo enyəa u lo dòʼn tə̀la yo, ghe ki alechiī tùʼ e ghee e dzə̀m a zəŋò Zə̀ kəla kə fughu sɛ̀ â fʉgha wə̀n ù dzə̀m u ghəŋlo enyəa sɛ̀ è tsoʼnlo.

¹⁸ Dzàa tsughu â ghee enyəa ghe e deē dzɔ̂ zò, ŋgee fwàʼà ndùw ghəa à dzûŋ gho â ghì ghò. Ghe e mwaʼā aleyòsò àghì, ki zǐi alefughuu fʉgha wo â ghì ghò.

¹⁹ Abugho ghe fwaʼà dzə ezə̀, ghe fi seen naŋa bʉ̀ghànlò u ghee ù dzûŋ wò â sə ko aŋghəa ghe lo alekele mughù èsəŋò zò.

²⁰ Timotì, tɔ̀ʼɔ kwo kelē fəgha chìa Zə̀ kə̀ fughu naŋā wo â ghù. Ka è zəən dzə ghəa ghə̀là à buw shwàʼ u Kəzə̀ wò, àsùghò zɔ̀ʼ tə aghəa təla ghî à li a gaām tɔŋlo enyəa à lò utɔ.

²¹ Tɔŋlo enyəa ghì ghəla ghe moʼnlò enyəa ghe ki tɔ wən m bvʉ sə am fə̀ŋ zəla ghe mò gaʼ a zəŋò Yɛso Kə̀lestò, làʼ mìaa è nduw. To Zə̀ kə̀ mô dê ghɛ̀ a dzə̀m â dzɔ̀ e wə̄n zo.