1 Timotì 4 - To kə Kəzə̀ kə̀ Fughu ko

Ghê wàdè ghə agha

¹ Zuʼ tə̀ Zɔlɔ tə dzàa zěe nù enyəa a kê bugho an tsuʼ məla Yɛso kè so e bughò èbàm a te, ghî à li a lo tuu màʼ nù alekòom boō an tsʉ̀ è səŋò zəla ghe fə̀ zuw kùu ndùw Yɛso, ghe e kôom boom fughu nduẁ â zʉ̀ wə agha wo àsùghò â tsʉ̂ e zèa m bǐigh mò.

² À ŋgòʼ è tsʉ̀ zən fughù ghì ghə agha ghəla ghe koom ki yo tuw kə̀ dəla ko alekāʼ egha, mo tɔ u ghee wə n lāa to ghe zuʼ an uwə̀n.

³ Ghî ghən tsʉ̂a wò àghì enyəa ghue è niī e dzɔ̂ɔ yò, àsùghò enyəa ghî ghə e ka zəa fʉghàzəa ù lī wo, kuuwn zəa ù lī wo. Ufʉghàzəa mò à fùghù wò Kə̀zə̀ enyəa ghî ghə̀ e zəa, mo ghe m fùghù tsùghù dzə zɔ̀ɔŋ kò a te alo egɔ̀ŋlo, ghî ghəla ghe boō fughu â Zə̀ kò mo ghe m bùghò kèle sùghò səŋò zò aŋ ghəa a te gho.

⁴ Tɔŋlo enyəa fʉgha wən u dzə̀m Zə̀ kə̀ gbə̂n wo, u dzɔ̂ɔ nù; kə̀ li kə yo a te a lo aletuū maʼà, abugho ghùw nìi nduw dzə mò ù m fughu kɔʼ zɔ̀ɔŋ â Zə̀ kò.

⁵ Tɔŋlo enyəa shwaʼ u Kəzə̀ àsùghò gɔ̀ɔŋ zo ghə̌əŋ nù fʉgha u te u mò è zɔn.

Ghùw ù kə̀fwàʼ ù dzùŋ â Kə̀lestò

⁶ Abugho ghù zə̀əŋ zeē waazughù gho aŋghəa ghəla mùghò fə̀ zoʼn ghû a te, ghùw vʉ̀a ghù tsʉa tsughu sùghò ghue wʉ̀a wò làbəlà è Kə̀lestò zən àsùghò an tsʉ̀ e səŋò zəla ghù bwii a te, ghù e ke lo ghùw ù kəfwàʼ ù dzùŋ â Kə̀lestò Yɛso.

⁷ Tue màʼa zə̂azə̂a ŋ ghə̀a kwu mò to məla dwə̂n wə aghì zən u kə̂a seē. E zoʼn tsughuu nlò ghue zɛʼɛ zo aŋ dzǐi tə Kəzə̀.

⁸ E dzɔ̂ɔ ko nù alenumsō zee gwən e ughùe zò, e kuuwn ŋgè dzɔ̀ tsə̀ghàtàʼà sə alo tədzǐi tə dzə̀m abugho a zoʼn zeē ghue e sɛ̀ zò alekelê ghəa a Kəzə̀. Ghəa a Kəzə̀ a ki to kəla kə ki mughù zə̀n èzəŋ àsùghò zəla e kê lô tən tsəgha.

⁹ Shwaʼ wən u lo êsəŋò, vʉa u kûum kpe sugho aleboō fughu a te.

¹⁰ Sɛ̀ dəmà nù, faan sùghò alekelê ghəa ghən bòʼ enyəa tùʼ è sɛ̀ chîi a zəŋò Zə̀ kəla kə mughu, tɔ̂ɔŋ Zə̀ kəla kə bəghaasəa ghî ghò a dzə̀m, a ka dɔ̂ɔm taŋ ghe ghəla ghe boo fughu tsughu â Wə̄n.

¹¹ E zoʼn ndùw lò ghî ghò aŋ ghəa ghən gho, kòʼò tsùghu sùghò enyəa ghe yia bwîi nduw an dzə̀ tə te to a.

¹² E kwo ko ghù lò bomlo enyəa ghùw ù lì koʼò lʉgha ghû mbuu ghù lò dzə̂ wɛ̂ɛtùghu. Ghùw kì aledòʼò tsughu tǒ tsə̌a è dzùŋ aŋghəa ghî ghela ghe boō fughu â Kə̀lestò lò alekòʼò nîi kɔʼ, an shwaʼ wûa ù kəaa wo, am mwam wʉ̂a ù dzûŋ wò, an ləgha zəghà â ghì ghò, am fə̀ŋ zə̀ghà zəla ghù gaʼ tsughu a zəŋò Kə̀lestò àsùghò am mùghùu zə̀ghà mò e ki yo dzʉ wo a te.

¹³ Tò Ŋ̀ kê tsoō bughô a fì êzə̀, e tɔɔŋ teso nduw shwaʼ u Kəzə̀ wò â ghì ghò an ndɛ, zoʼn ndùw àghì a te, zùghò ndùw sùghò shwaʼ u te wo.

¹⁴ E kwo ko ghù lò so e tsughòsò maʼn daʼa kəla Zuʼ tə̀ Zɔlɔ tə fə̀ fughu â ghù an nə̀ghà zəla tsoʼ tə dzeŋe kə ghì a Kəzə̀ tə fə̀ gɔ̂ŋlo mo ghe ŋ ghu a gaʼ wò an tuw kə̂a.

¹⁵ Tɔ̀ʼ zoʼn kele kɔʼ ghəa ghən gho, ghù gaʼ tsughu fə̀ŋ zə̀ghà a te gho, to ghî ghə̀ è koʼo wo aŋghəa ghù noōm nduw a te.

¹⁶ E nîi ghôm zò a m ghùe wʉ̂a àsùghò an tsʉ zəla ghù zoʼn ghî gho a te. E ti ko a te, nu abugho ghù ghəə̄ŋ dzə êzə̀, ghù lo bəghasə ghùe wʉ̀a wò àsùghò ghì ghəla ghe zuūw â ghù.