Bìoball air-loidhne

1 Timotì 2 - To kə Kəzə̀ kə̀ Fughu ko

Dzì zəla ghî à kɔʼso Zə̀ kò a te

¹ Alebùʼù nîi tsughu dzə̂, Ǹ ləghaa enyəa ghù e gɔŋlo â ghî ghò a dzə̀m, fughuu sùghò kə̀zɔ̀ŋlò â Zə̀ kò am mùghù e ghee àsùghò am fəgha kə̀là ù ki alefwàʼ a zəŋò ghee.

² E gɔŋlo an tuw u udwə̀ŋ ghèe ghê ghì à ne ghən a dzə̀m enyəa to sɛ̀ mô nyòʼn mùghù zumso kə emùghùu, mùghù sugho alo ebughunlo aŋghəa e dzɔ̂ɔ an sə kə Kəzə̀ àsùghò am mwam ù səŋò wò.

³ Ŋgòʼ è mùghù zən enyə; alegɔ̀ŋlò an tuw u àghì dzɔ̀ɔ nù, zəa e tsəmso sugho fə̀ŋ è Zə̀ kəla kə bəghaasəa ghî ghò.

⁴ Zə̀ kəla kə ləghaa enyəa tò aghî a dzə̀m am mbī mô zə kətuw ghe kele sughò èsəŋò.

⁵ E lo êzə̀ bòʼ, Zə̀ kə̀ lo ko kə mɔ̀ʼ, yìa à lô sugho ghùw ù mɔ̀ʼ ù nìi təmadzəə̄ŋ wô ghî ghò ghèe ghê Zə̀ kò, ghùw wə̄n lo Kə̀lestò Yɛso.

⁶ Yɛso wəla ù fə̀ nî kɔʼ tuw kə wə̄n ko zue sə tsughu aghî a dzə̀m a te. Yɛso fə̀ fɛ bugho kpuw an tuw u aghì tǒ tsə̌a aledèe tsughu enyəa nəgha zəla Zə̀ kə fə̀ ki alebəghaasə aghî a te, zə m kpe aŋghəa kə fə̀ fôʼ naŋa.

⁷ Zən lò eghee, ghe fə̀ tum sə wô mugho tǒ tum è Kə̀lestò àsughò wàdè alebwiī zoʼn wo Toʼò zo e te zo an làbəlà è dzùŋ zən àsùghò sə̀ŋò fəgha kəla kə lo êsəŋò kùu ndùw Yɛso. Ŋ̀ kaʼn yo gha gho Ǹ dzâa wò èsəŋò.

⁸ Ǹ ləghaa enyəa yînû ghə̀ e gɔŋlo abugho ghî à bughò zùuŋ dòʼò tsughu an dzeŋe kə ghì a Kəzə̀, aghî mo ghe m fughu ghue e ghee zo â Zə̀ kò, mo ghe lo nû alekele kɔʼ ghu a ghee edzuŋ abugho ghe gɔ̂ŋlo mò nə̀ghà m pfʉa yo ghee ŋkāa mo ghe baaŋ yo fom to a te.

⁹ Yìa Ǹ ləghaa sughò enyəa yîzən a dzeŋe kə ghì Kəzə̀ à ki ale laa kɔʼɔ ghue e ghee zo an dziī zəla è ki kɔʼso mò. Ghe ki yo aledzəə̄n dzʉ tə shwāŋ to, ŋkāa fəghaan ŋ kə̀tuw ŋ ghee mò dzì zəla è lò aleghəŋlo enyəa sə ghə e səa yînû ghò a zəŋò ghee, ghe e dzəə̄n sugho yo kɔ tə ufʉghàdzəə̄n wo.

¹⁰ Ghe ki ko aleki mwam e dzûŋ zəla e fweēn tsughuu wìzən wəla ù dzɛ̀ enyəa ù m boo fughu â Zə̀ kò.

¹¹ Wìzən ki alenyoʼn zəən nduw ko fəgha kəla ghe zoʼn wə̄n a te mɔŋ kə mɔŋ, aŋ ghùe e zumso zo.

¹² Ŋ̀ kâ bǒo dzə̀ enyəa wìzən ù lì e zoʼn ghî gho ŋkāa enyəa ù è ki daʼa ko a zəŋò yìnû ghò. Ghe ki alenyoʼn lo mɔŋ tò ù ki wɛ alô tsele.

¹³ Tɔŋlo enyəa ghe fə̀ səkə̀sə bɔm tsughu Adàm, sěe ghe sô bɔɔ̄ Êf.

¹⁴ À fə̀ yò dzə̂ Adàm Satàn fə̀ nômlo, a fə̀ lo wìzən, ù m bvuʼ tsughu lâŋ kə Kəzə̀. Yìa à lò sugho wìzən ù fə̀ ghəə̄ŋ bo zo.

¹⁵ Wìzən kè tuw kə fɛ̀ kuuwn zəa ko aŋghəa ù dzəa wô wɛ gho àsùghò abugho ù zuŋu tsughuu dzə̂ ghue wo, gaʼ tsughu fə̀ŋ a zəŋò Zə̀ kò, mùghù sugho mughù e zɔlɔ zo an tsəŋ e Kəzə̀.

« Roimhe

Air adhart »

2020

Lean sinn:

Ceanglaichean taic

Sanasan