1 Tɛ̀sàlonìan 5 - To kə Kəzə̀ kə̀ Fughu ko

Ndzǔuŋ tsughu nlò ghue zɛʼɛ zo, Mughu ù te bughòo nù

¹ Waazə̂ ghaʼa gho, ghùw ù lì ndôʼ ki dzə yo aletɔɔ̄ dzâa wô â ghɛ̀ nəgha zo ŋkāa tî kəla Mughu ù te lo bughoo a te ebàm.

² Tɔŋlo enyəa ghue e ughùe zɛʼɛ e tɔ̂ʼ kwò nû enyəa, ghùw kwo naŋa dzə yo tsuʼ fəla Mughu ù te kê bugho a te. Tɔŋlo enyəa tsuʼ u wən ù bugho u kê bùghò ko tò ghûw tsɔŋɔ lô bughoo â tsuʼ wo, mò ghùw ù mɔʼɔ̄ kwo naŋa dzə yo.

³ Ghî a lo e dzaā enyəa, “Ghəa a zʉ̂ lô nû, ghǎʼ yia tsəŋo sughò yo ghəa è li zo.” A kê kôom koʼò ko mo tsû wə̌ sam tɛɛ, to wɛ lô vûuŋ chuūw tsughuu zən ù nʉghà u wɛ, dzì è lì è ke tso koōm buw â ghùw ù lì alenùghù tiī sə.

⁴ Waazə̂ ghaʼa gho, ghɛ̀ yo dzə̂ alo kələ̄m tò ghî ghəla ghe kwo yô ghəa ghən gho, e kwo ko tsùʼ u te lô bughoo mò ghɛ̀ kaām ghue zɛʼɛ zə n ndzûuŋ nàŋa.

⁵ Ghɛ̀ lo ghî ghəla ghɛ̀ ghəə̄ŋ ghəa ghɛʼɛ gho an ndɛ, tò aŋghəa ghî à mgbaŋā ghəəŋ ghəa gho â tsə̀ tò. Sɛ̀ yo dzə̂ tò ghî ghəla ghe ghəə̄ŋ ghəa gho alo kələ̄m, tò aŋghəa ghî à tsɔŋɔ̄ ghəə̄ŋ ghəa gho â tsuʼ wo.

⁶ À fi lo enyəa sɛ̀ ki dzə yo alebwii tò ghî à li gho. A kuuwn ki aletisō kɔʼ kətuw edzuŋ, a e naŋso tsughu sugho ghuw kə ebwìi kə sɛ̀ kò.

⁷ Tɔŋlo enyəa ghî ghəla ghe bwiī, bwii tsə̀ghà â tsuʼ wo. Ghəla ghe mʉā kalā lʉ̀ mò, mʉ̀a kala tsə̀gha sùghò â tsuʼ wo.

⁸ Yia a kuuwn bugho sɛ̀ ghəla a lô wɛ a tsə̂ ghò, a ki alenaŋsō ghuw kə e bwìi kə sɛ̀ kò, a gaʼā ndûw fə̀ŋ a zəŋò Kə̀lestò, àsùghò enyəa, a e ləghaa ghue e sɛ̀ zò; sɛ̀ e ghəŋlo enyə tò kəkə̀ŋ sɛ̀ dzəlà kele alo kəchīchī alekə̀əŋ. Sɛ̀ e ndzəmā chiī sugho tùʼ enyəa a lo zəa nù tuw ko, tò a e soō alo kətàŋlò a dzəlà kele kɔʼ alo kətūw.

⁹ Tɔŋlo enyəa Zə̀ kə̀ ka fə sɛ̀ shîaa sə̀ wò dzə̀ aledè nʉghà u wən ù pfʉa wo a zəŋò sɛ̀. Ù fə̌ sɛ̀ shiāa enyəa a lâam zə kətuw am bàm e Mughù ù sɛ̀ tɔɔŋ Yɛso Kə̀lestò.

¹⁰ Yɛso Kə̀lestò fə̀ kpuw an tuw u sɛ̀ aleghəŋlo enyəa sɛ̀ kê naām lo â tuw ko, ŋkāa mo a m kpūwnlō, a kê mùghù sɛ̀ à ghee abugho ù ke bughuo ebàm.

¹¹ À fi lo enyəa ghɛ̀ kì aledzəlā fə̂ŋ tɛʼɛ to, bɔɔm sùghò ghue zɛʼɛ̄, tò aŋghəa Ŋ̀ kwo enyəa ghɛ̀ ghəəŋ nù êzə̀.

Mughùu zəla ghî a Kəzə̀ a ki alemùghù ghè zò

¹² Ghàʼ buʼu kə̀ghuw â ghɛ̀ a waazə̂ ghaʼa gho enyəa, ghɛ̀ è fughuu nduw kɔʼso mò â ghì ghəla ghe dêe ghɛ â dzì am boo zɛʼɛ̄. Ghe lo tuw wɛʼɛ ghe yia a fwaʼà tə̀la tsughu alo kədaʼa alenaŋsô ghuw kə ebwìi kɛʼɛ

¹³ Ghe ki alefughuu ghee â kɔʼso mò, kùu dèe ndùw ghee â ləgha zəla e lo am fə̀ŋ bòʼ fwàʼ kə ghee. E mughu nlò alo ebughunlō aŋ ghùe zɛʼɛ̄.

¹⁴ Ghàʼ buʼu wò kə̀ghu â ghɛ̀ a waazə̂ ghaʼa gho enyəa ghɛ̀ è kʉɛɛ̄n nduw ghî à lɛɛ gho, kùu dzə̀là ndùw fə̀ŋ tə ghì ghəla ghe ki yo fə̀ŋ tò. E fughuu nduw nlò yôso zò â ghì ghə̀là ghe ki yo nûŋ wò aleghə̂əŋ ghəa è li zo. E maʼn tsughuu nlò ghue zo ghɛ̀ a ghê ghì ghò a dzə̀m.

¹⁵ Kà nlò è bomlo enyəa ghùw tsə ebo alo ebō. E kuuwn kəŋo ko dzì aleghəŋlo èdzɔ̀ aŋ ghùe zɛʼɛ̄ àsùghò â ghì ghò a dzə̀m.

¹⁶ E duʼnlo nlò nəgha tən tə̀ dzə̀m.

¹⁷ E gɔ̄ŋlō nlò nə̀ghā tən tə̀ dzə̀m.

¹⁸ E fughuu nlǒ zɔ̀ɔŋ â Zə̀ kò alo tənə̀gha tə dzə̀m, nu à lò ghəa zəla Zə̀ kə̀ ləghaa enyəa sɛ̀ è ghəəŋ ghè zò, êzəŋ wəlà ghɛ̀ à ghê Kə̀lestò Yɛso lò kəfəgha kə mɔ̀ʼ.

¹⁹ Kà nlò kê bù nyəm kòʼ dzə̀ wən u Zuʼ tə̀ Zɔlɔ təla tə bəghanlo a zəŋo ghɛ̀.

²⁰ Kà nlò è ghuuw maʼn shwaʼ u ghìishʉghà a Kəzə̀ ghò.

²¹ E mɔmso koʼō nduw nlò ghəa ghəla ghe dzɛ̀ a dzə̀m, ghɛ̀ ŋ kuuwn nìi naāŋ wò ko ghəla a lo à dzûŋ ghò.

²² Ghɛ̀ è tii nughunlo aŋ ghəa à biigh gho a dzə̀m.

²³ To Zə̀ kəla kə fughu bughun zo mô tɔʼɔ̀ ghəə̄ŋ tsughu enyəa ghɛ̀ è zɔlɔ, wən à mughu ko: to ghue zɛʼɛ, zuʼ tɛʼɛ àsùghò gwən e ughùe zɛʼɛ zo mô kì yo dzʉ ù li wo alebùghò tâa wô an tsuʼ fəla Mughu ù te Yɛso Kə̀lestò kè bugho a te ebàm.

²⁴ Zə̀ kəla kə mò tɔŋɔ̄ ghɛ kaʼn tsə̀ghà dzə̀ yò gha gho, kə lo fwàʼà nù fəgha kə̀là kə fə̀ to naŋā.

²⁵ Waazə̂ ghaʼa gho, e gɔŋlo nlò am tuw waʼā.

²⁶ Tɔɔŋ zuw tsughu nlò ghue zɛʼɛ zo am fə̂ŋ è zɔ̀lɔ.

²⁷ Ǹ fughu wo kə̀làŋ â ghɛ̀ an zən e Mughu ù te enyəa ghɛ̀ ni kɔʼ mwàʼsò kən, ghɛ̀ tɔɔŋ dzɛ kɔʼ â waazughù ghò a dzə̀m an ndùghù e Kə̀zə̀.

²⁸ To Mughùbè ù sɛ̀, Yɛso Kə̀lestò mò dê ghɛ̀ â dzɔ̀ e wə̄n zo.