Bìoball air-loidhne

1 Tɛ̀sàlonìan 4 - To kə Kəzə̀ kə̀ Fughu ko

Mughùu zəla Zə̀ kə̀ ləghaa enyəa ghi a wə̄n ghe e mughu ghe zo

¹ Alendùw â sə ko a waazə̂ ghaʼa gho, ghàʼ toon wò ghɛ̀, dzàa wò sùghò â ghɛ̀ an zən e Mughubè Yɛso enyəa ghɛ̀ è mughu nduw ko ŋgòʼ è mùghùu zəla ghǎʼ mò zoʼn ghɛ a te, tò aŋghəa ghɛ̀ nyɔʼɔ ghəəŋ dzə̄ ezə̄ŋ, àsùghò enyəa ghɛ̀ è naam mughu nduw ko mughùu e te zo êzə̀.

² Ghɛ̀ kwo nû tsʉ̂ zəla ghàʼ lo mo a m fughu â ghɛ̀ an daʼa kə Mùghubè Yɛso kə̀la ù mò fughu â ghàʼ,

³ nu Zə̀ kə̀ ləghaa enyəa ghɛ̀ è mughu mùghùu è zɔlɔ zo, e fi lo enyəa ghɛ̀ zəghaa maʼa nûuŋ zò.

⁴ Chìa e zoʼn tsughuu alemùghùu ghèe wì ù wən an dziī zəla è zɔlɔ, ki sugho ŋkɔʼso,

⁵ mò à yò dzə̂ tò aŋghəa ghî ghəla ghe kwo yo Zə̀ kò, ghe səā â sə gho aŋ ghəa ghəla yîzən a ghəŋlo.

⁶ Alenìi tsughu aŋ ghəa ghəla ghàʼ dzɛ̂ tsughu fɛ, e kow ko ghùw wɛʼɛ lô so e tsêe wàazə ŋkāa ù ghəəŋ wə̄n à bo è li zo. Mughu u te lo fɔeso nù ghî ghəla ghe ghəəŋ ghəa ghən gho. Ghàʼ maā ghɛ aŋ ghəa ghən kì kwɛ̀ɛn naŋa wò.

⁷ Zə̀ kə̀ ka mo sɛ̀ tɔŋɔ dzə̀ enyəa a bugho mughù mùghù è dzəa zo, à mò laam lo enyəa a bughò mughù mùghù è zɔlɔ zo.

⁸ E fi lo enyəa ghùw wəla ù tue maʼà tsʉ̂ zən zo, ù kà tsùghòsò dzə ghùw, ù kǔuwn tsùghòsò Kə̀zə̀, tɔ̂ɔŋ Zə̀ kəla kə fughuu ghɛ â Zuʼ tə̀ Zɔlɔ to.

⁹ Ghàʼ ndôʼ kì dzə yo aletɔɔ wo ghɛ̀ â mwàʼsò kò kùu ndùw ləgha zə eghùe zɛʼɛ̄. Zə̀ kə̀ maā ghɛ ki zoʼnlo aŋghəa ghɛ̀ ki aleləghā ghue zɛʼɛ zo a te.

¹⁰ À kùm lò nu èsəŋò enyəa ghɛ̀ ləgha nù waazə̂ ghɛʼɛ gho an naʼ e Masɛ̀edonìa. Ghàʼ fɛ naam kuuwn toon kpeʼe wò ko ghɛ̀ a waazə̂ ghaʼa gho enyəa ghɛ̀ kele nduūŋ nduw ko mwam u te wo.

¹¹ E kuūm dəma təla tsughu nlò alemughū zumso kə emùghù kò, chìa e lɛɛn tsughuu ko ghəa ghəla a lɛɛ̄n wə̄n. Ghùw è tele zəa ko an zuʼso fə wə̄n, aŋghəa ghǎʼ fə̀ dzɛ̂ naŋa â ghɛ̀,

¹² tò enyəa ghî ghəla ghe tâʼkè boō fughu â Kə̀lestò lo e fughuu ghɛ â kɔʼso mò. Ghɛ̀ è mughu aŋ ŋgə̄ŋ zɛʼɛ̄, mò ghɛ̀ bvʉa yo fəgha ko â ghùw ù lì.

Mughu ù te kôom bughoo nù ebàm

¹³ Waazə̂ ghaʼa gho, ghàʼ ləghaa dzə̀ yò enyəa ghɛ̀ è lo alo kə̀ŋgòmsò kùu ndùw ghì ghəla ghe lo mo ghe m kpuw, enyəa ghɛ̀ ka ŋgee mʉŋe abugho ghùw kpuw tsughuu, tò ghî ghəla ghe chîi yo tùʼ enyəa ghî à lo zòom nùghùu wò nù ebàm alo evʉ̄.

¹⁴ Tò aŋghəa sɛ̀ lo mo am boo enyəa Yɛso maā kpuw kòom kɔ̀ʼ sə̀ kɔ̀ʼ wò èbàm alo evʉ̄, à lò sugho an dziī è mɔ̀ʼɔ̀ Zə̀ kə̀ lo zôo nughùun wô ghî ghəla ghe fə̀ kpuw mo ghe m boō fughu â Yɛso.

¹⁵ Ghəa ghə̀là ghàʼ dzâa wô fɛ â ghɛ̀ lo shwaʼ u Mughu ù te: Sɛ̀ ghəlà a naām lô â tuw ko, sɛ̀ lò yò dzə ghî a kəsə̄ gho a zəŋò ghì ghəla ghe lo mo ghe maā ki kpuwnlo alendùw kpeēnî Mughu ù te abugho ù kè bugho e bàm.

¹⁶ Tɔŋlo enyəa, ghuūghùe u Mughu ù te kè sə̌a tsughuu wò alo kəwālā, ù bʉgha tsughu dzə̀ è tughu enyəa ghî ghəla ghe fə̀ kpuwnlo mo ghe boo fughu zôo wô. Ghe e ke zuuw nduw dzə̂ tə tuw kə tsə̀təndə̄ghā tə Kəzə̀ tò, mbəgha kə Kəzə̀ kə̀ kê kûu nyəā ndûw, ghî ghəla ghe fə̀ kpuwnlo mo ghe m boo fughu â Yɛso Kə̀lestò kè daŋso zôo wô dzə̂ èsə̄.

¹⁷ A kê bughò sɛ̀ ghəla sɛ̀ kê naam lo â sə à tughu gho, sɛ̀ kê təma dzəə̄ŋ ndûw ghee alo təmbàʼ, a nùghù kɔʼɔ ndùw edzûŋ alekpeēn ndûw sɛ̀ à ghê Mughu ù te edzūŋ: sɛ̀ kê daŋso dôʼò təla ndûw sɛ̀ à ghê Mughu ù te.

¹⁸ À fi lo enyəa ghɛ̀ ki aledzəlā nduw fə̂ŋ tɛʼɛ to aŋ ghùe zɛʼɛ̄ aŋ ghəa ghən.

« Roimhe

Air adhart »

2020

Lean sinn:

Ceanglaichean taic

Sanasan