1 Tɛ̀sàlonìan 2 - To kə Kəzə̀ kə̀ Fughu ko

Fwaʼ kə Pôl an naʼ e Tɛ̀sàlonikà

¹ Waazə̂ ghaŋa gho, ghɛ̀ kwo nû enyəa bwîin zaʼa zəla ghǎʼ mò bwîin wo fi a vʉ̀a ghɛ̀ ka mo tsəghà mìaa dzə̌ kə̀nughù nùghù.

² Ghɛ̀ kwo nû aŋghəa ghǎʼ mò fala a te am Felèpîi àsùghò aŋghəa ghe fə̀ sûuwn ghaʼ a te fughu alo enaʼ. Ghəa e mò bûʼ lô ko enyəa ghe mò ŋgee fughuu ghaʼ â tsù wo fughu alo enaʼ, Zə̀ kə sɛ̀ kə̀ n naam fughu tsughu ghàʼ â fə̀ŋ è te â ghàʼ alenāʼn wô làbəlà è dzuŋ zə̄n â ghɛ̀.

³ Ghàʼ ka fə mə̂ŋ dzə̀ an fəgha kəla a fə̀ dzâa wo â ghɛ̀, ghàʼ ŋ ki sugho yo moʼnlò è biigh zo ŋkāa ghǎʼ fì kəŋo yo dzì è lì aletsè ghɛ̀.

⁴ Ghàʼ ghəa ghən fɛ kə̀aa wò tò ghî ghə̀là Zə̀ kə̀ lo mo kə m fughu naŋa làbəlà è dzùŋ è te â ghee, ghàʼ kə̂aa dzə̀ yò fəgha kəla ghî à ləghaa, ghǎʼ kuuwn kə̀a wò fəgha kə̀là Zə̀ kə̀ ləghaa enyəa ghàʼ e kəaa, Zə kəla kə kwo fə̂ŋ tə aghì tò.

⁵ Ghuūghùe zɛʼɛ̄ e kwo nû, Zə̀ chìa kə lô sûghò aleteso enyəa shwaʼ wəla u mò səa wo an dzughu zaʼā fə̀ yo dzə̂ shwaʼ ù kpəŋo wo aletsè ghɛ̀ ŋkāa alenɔɔm nî fəgha kə̀ li ko aŋ ghùu ghùw wɛʼɛ ù lì.

⁶ Ghàʼ mò kəŋo dzə yo enyəa to ghî à mò kɛ̌ɛ wò ghàʼ. Tǒ tum tə Kə̀lestò, ghǎʼ mò ki nû alebvʉa wô ghɛ â fʉgha ù li wo.

⁷ Ghǎʼ yia kuuwn zumsō tsughu ko ghue zo am bvʉa zɛʼɛ̄ tò zə̂awɛ̀ ù lɛnlō â wɛ a wə̄n gho.

⁸ Ghǎʼ mò kuū ləghaa nû ghɛ, zə̀ lǒ e ghee ghǎʼ mò kaā kə̂a ko yo ghɛ â shwaʼ u Kəzə̀ wò, ghàʼ m fùghù mɛ̀ʼɛ̀ wò ghue zaʼa aleyòsò ghɛ̀, ghàʼ màʼà ŋge gaʼ fə̀ŋ a zəŋò ghɛ̀.

⁹ Waazə̂ ghaʼa gho, ghɛ̀ mgbaŋ kwo nû aŋghəa ghǎʼ mò fwaʼà zeē nduw, bùghò fwàʼà bwǐi ndùw enyəa ghàʼ lô so e laʼà fəgha kə̀ li ko an nə̀ghà zəla ghǎʼ mò kə̂aa wô shwàʼ u Kəzə̀ wò â ghɛ̀. Ghǎʼ mǒ èzə fwaʼā aleghəŋlo enyəa e kwo ko ghàʼ lô doʼn fəm ko â ghùw wɛʼɛ u mɔ̀ʼ.

¹⁰ Ghue e ùghùe zɛʼɛ e kwo nû ghəa ghən gho, Zə̀ chia kə kwo sugho; enyəa mwam zaʼa a zəŋò ghɛ̀ ghəla ghɛ̀ boō fughu â Zə̀ kò mò zɔlɔ nû, lò tsəghatsəgha, ki sugho yo nùʼ tò.

¹¹ Ghɛ̀ kwo nû enyəa ghǎʼ mò ghɛ̀ kwu kele ko to tselè ù lô kwuū kele wɛ a wə̄n gho,

¹² enyəa ghɛ̀ è mughu tsughu mughù zəla Zə̀ kə̀ ləghaa ghè zò. Ù lǒ Zə̀ kəla kə mò tɔŋɔ̄ nyə wô ghɛ am fɔ̀e u wə̄n, àsùghò an səghanyəgha ŋ wə̄n.

¹³ Ghàʼ yìa fughuu zeē sugho zɔ̀ɔŋ kò â Zə̀ kò bòʼ enyəa shwaʼ u Kə̀ zə̀ wəla ghǎʼ mò naʼà wo â ghɛ̀, ghɛ̀ mafə zuw, è boo, mo ghɛ̀ ka fə nî dzə̀ shwaʼ u te wo tò shwaʼ u ghûw ù lì, ghɛ̀ mò kuūm ni tsughu shwaʼ u te wo enyəa à lò shwaʼ u Kəzə̀, dèe êzə̀ mò à kùum lò u ghee, wəla u fwaʼā êzə̄ŋ a zəŋò ghɛ̀ ghəla ghɛ̀ boō fughu â wə̄n.

¹⁴ Waazə̂ ghaŋa gho, ghɛ̌ fə̀ bɔɔm ni ko mwam e ghì a Kəzə̀ ghəla ghe fə̀ boo fughu â Kə̀lestò Yɛso, ghəla ghe fə̀ lo an ndughu tə Kəzə̀ təla tə fə̀ lo am Dzùdîa. Nu ghɛ̌ fə̀ bɔɔm fala sugho aŋ ghù ghì ghɛʼɛ gho tò aŋ ghəa ghe fə̀ fala an ghù Dzûu tò.

¹⁵ Ghɛ̀ kwo nû enyəa à fə̀ lo Tə̀dzûu tə fə̀ wi maʼa Mughu ù te, Yɛso, wiin màʼà sùghò ghì a ushʉghà a Kə̀ zə̀ à li gho, fəmso kaaŋ sùghò ghàʼ. Ghe fə̀ ghəəŋ ghəa ghə̀là Zə̀ kə̀ ləghaa dzə̂ yo, ŋaŋà ndùw àghì a dzə̀m.

¹⁶ Ghe fə̀ êzə ghəŋlo aletə̀ghàsò sɛ̀ enyəa a ka shwaʼ u Kə̀zə̀ wò â Tòʼò zò naʼà, enyəa ghe zuw to ghe zə̀ kətuw. Ghe ŋ ghəŋlo èzə̀ mò ghe naam dùwsò ndùw kô boo e ghee. Yìa à sò kuūwn lô ko enyəa Zə̀ kə̀ mô èzəŋ biso kòom bùghò pfʉ̀so nʉghà wò a zəŋò ghee.

Pôl mbùŋlò alekòom kôʼ ghì a Tèsàlonikà

¹⁷ Waazə̂ ghaʼa gho, ghə̀a ghe mò bû bâʼ nughù tsughu ko ghaʼ a zəŋò ghɛ̀ am kə̀mà fə̀ kə ghā, à fə̀ yo dzə̂ fə̂ŋ taʼa ghe fə̀ bâ nughu, ghàʼ n də̀m enyəa to a mô kôom bughò èbàm, a sô mbûŋlo enyəa to sɛ̀ mò koʼò dzəə̄ŋ ndûw kàʼ mə̀ esʉ̄.

¹⁸ Ghǎʼ mò kuuwn ŋgee ləghaa nû alebùghò kôʼ ghɛ̀. Ghuūghùe waŋa Pôl, M̀ maā də̂m an ndə̀m è tə̀nə̀gha, Satàn ŋ kuuwn tə̀ghàsò ghàʼ.

¹⁹ À lò ghɛ̀, ghɛ̀ ghəŋlo enyəa ghà è ndzəmā chiī tùʼ, ghàʼ è duʼnlo, yìa à lò sughò ghɛ fəgha kəla kə ghəŋlo enyəa ghàʼ è ke e lo aŋ ghùe ù ghaa wo a vʉ̀a Mughùbè ù sɛ̀ abugho ù lo bùghò e bàm.

²⁰ Kùmkùm à lò ghɛ, ghɛ̀ lo ghəŋlo ghàʼ e tsɔɔ̄ fə̂ŋ tò, lò sugho alo eduŋlo.