1 Tɛ̀sàlonìan 1 - To kə Kəzə̀ kə̀ Fughu ko

¹ À mwàʼsò kən kə tɔɔ wò mùghò Pôl, ghàʼ à ghê Timotì àsùghò Saelàs â ghɛ̀. Ghǎʼ mwàʼsò kən kə tɔɔ wò â ghɛ̀ dzeŋe kə ghì a Kəzə̀ ghò an naʼ e Tɛ̀sàlonikà; ghɛ̀ lo ghî a Kəzə̀ tɔɔŋ, Tsele ù te ghèe Mughùbè Yɛso Kə̀lestò. Gɔ̂ɔŋ zaʼa e lo enyəa, to Zə̀ kə̀ mô dê ghɛ̀ â dzɔ̀ e wə̄n zo, kə fughuu sughò ghɛ̀ â bughuun zo.

Boo zəla ghî a Tɛ̀sàlonikà a fə̀ ki â Kə̀lestò àsùghò mùghù zəla ghe fə̀ mughu ghè zò

² Ghàʼ fughuu zee kə̀zɔ̀ŋlò â Zə̀ kò bòʼ ghɛ̀ a dzə̀m, yia a zə̂əŋ zee sughô zən ghɛ̀ʼɛ̀ ghò aŋ gɔ̀ɔŋ zaʼa.

³ Ghə̄a ghàʼ zə̂əŋ zeē ko ghɛ aŋ gɔ̀ɔŋ zaʼa â Zə̀ kò, Tsele ù sɛ̀, ghàʼ nîi zə̀a yò fwàʼ kəla ghɛ̀ fwaʼā bòʼ ghɛ̀ boo fughu â Kə̀lestò, àsùghò ghəa à dzûŋ ghə̀là ghɛ̀ ghəŋlo â ghî ghò bòʼ ləgha zəla ghɛ̀ ki ghè zò, àsùghò tùʼ zəla ghɛ̀ ndzəmà chiī a zəŋò Mughùbè ù sɛ̀ Yɛso Kə̀lestò.

⁴ Waazə̂ ghaʼa ghò; ghàʼ kwo nû enyəa Zə̀ kə mò ləgha tsughu ghɛ, kə n shìaa kɔ̀ʼ ghɛ enyəa ghɛ̀ e lo ghî a wə̄n gho.

⁵ Tɔŋlo enyəa ghàʼ fə̂ làbəlà è dzùŋ zaʼa zən â ghɛ̀ kaa naʼn wo ko yo an shwaʼ ù zūm wo, làbəlà è fə̀ bugho dzəə̄ŋ ko ghèe shʉ̀ghà wò an daʼa kə Zuʼ tə̀ Zɔlɔ to. Ghɛ̀ mô è zuw, zuwkɛlɛ̂ ghəa a te gho. Ghɛ̀ kwo nû mughù zəla ghǎʼ mò mughu ghè zò aŋ ghəa ghǎʼ mò lo fì sɛ̀, à mò lo aleyòsò ghɛ̀.

⁶ Ghɛ̀ ŋ kàʼ tsughu alekòʼò nî mùghù zaʼa àsùghò e Mughu ù te zo. Aŋghəa e fə̀ bûʼ lo ko êzə̀, ghɛ̌ fə̀ buʼ kele ko fə̀msō ko aŋ ghùu ghì ghò enyəa so ghɛ̀ zuuw wò shwaʼ waʼa, Zuʼ tə̀ Zɔlɔ tə ŋ ŋgəəŋ ghəəŋ ko nù ghɛ̀ n tsoʼnlo.

⁷ Zən lò e gheē ghɛ̌ fə̀ ndûw bughò ghî ghəla ghe moʼò dêe ghəa a Kəzə̀ ghò â ghì ghò an Màsìdonìa àsùghò an Achaìa.

⁸ Ghɛ̀ ŋ ghəŋlo ghî yia a zuw shwaʼ u Kəzə̀ ŋgəa kaāŋ an naʼ e Achaìa, àsùghò an Màsèdonìa. Mbi e dzə̀m zə̀a è kele sugho boo zɛʼɛ̀ zo mò à kà ghàʼ bûʼ dzɛ̀.

⁹ Ghì a te gho a dzə̀m ndòʼò tèso kaaŋ nǔ dzì zəla ghɛ̀ mò kpenî ghaʼ a te, aŋghəa ghǎʼ mò bugho alô ghɛ̀, àsùghò aŋghəa ghɛ̀ zəghà maʼà tsughu mùʼù ŋ kɔʼso mò, kàʼ ndùw alefwàʼ â Zə kə̀ səŋò kəla kə lô â tuw ko.

¹⁰ Ghe buʼù kə̀aa sùghò nù ghəa ghɛ̀ lo mo ghɛ̀ ləəm Wɛ ù Kə̀zə wəla ù lo nughùn wo alò kəwālā alebùghò èbàm am mbī; wəla Zə̀ kə mò nî nughù kɔʼ alo evʉ̄, tɔɔŋ Yɛso wəla ù bəghaasəa sɛ̀ an tsu wəla u ki alebùghò.