1 Pità 4 - To kə Kəzə̀ kə̀ Fughu ko

Sɛ̀ ki alemughu aŋghəa Zə̀ kə̀ ləghaa

¹ Aŋghəa e lô enyəa Kə̀lestò fə̀ fala aŋ gwə̀n e ughùe, kele tsùghù sùghò nlò moʼnlò e wə̄n e te zo; tɔŋlo enyəa abugho ghùw zuw tsughu fɔɔn zo aŋ gwə̀n e ughùe, ù ŋ kôom ki yo moʼn zo aleghəŋlo ebo.

² A m bùghò ù ghəŋlo êzə̀, ù n lo alemùghù mùghù è wə̄n e dzə̀m am mbī aŋghəa Zə̀ kə̀ ləghaa, mò à yò dzə̂ aŋghəa gwən e ughùe è ləghaa.

³ Ghɛ̀ maā boon màʼà kə̂m kə enə̀gha kə̀ dzûŋ kò aleghəə̄ŋ ndza tə aghəa təla Toʼò è ghəə̄ŋ ghè ghò. Ghɛ̀ fə̀ mughu tsəgha dzə̀adzə̀ kə emùghù, mʉa kɔʼɔ nlʉ̀ buʼn kaŋlo m̀bɔ̀ŋ an sə à kala gho, səa â sə gho am fʉgha u mbī wo, làŋà bə̀la bwii kaŋlo, ghɛ̀ ŋ kɔʼso sùghò zʉ̀ wə agha.

⁴ Tuw kə kpûuw Etòʼò enyəa ghɛ̀ kôom tə̀ma dzəəŋ yo ghee an dzə̀adzə̀ kə emùghù kəla ghe mughu ghè kò, zə lo e ghee ghe sûuwn ghɛ.

⁵ À sò fɛ kuuwn lò ko enyəa ghe lo ki aletaŋso dê see kə emùghù kə ghee â ghùw wəla ù ti tən ko alesaʼ aghî a dzə̀m; ghî ghəla ghe lo â tuw ko àsùghò ghəla ghe lo mo ghe mafə kpuwnlo.

⁶ Zən lò e ghee ghe fə̀ kə̂a ndûw sugho shwaʼ u Kəzə̀ wò â ghî ghəla ghe lo mo ghe mafə kpuwnlo, tò aŋghəa ghe fə̀ bûʼ fala ko aŋ gwə̀n e ughùe tò aghî aŋghəa Zə̀ kə fə̀ fɔeso tsughu ghee, ghe lo e mughu alo təzuʼ tò Kəzə̀.

Ghî ghəla ghe bɔɔm fwaʼà dzɔɔ̄ am fəgha kəla Zə̀ kə̀ namso ghee a te

⁷ Nəgha e fɛ êzəŋ e kpee wò nù â ghəa gho a dzə̀m alebùghò mîaa. E fi lo enyəa ghɛ̀ tee kɔʼ nlò alo efwee, ghɛ̀ naŋso tsughu ghuw kə ebwìi kɛʼɛ ko, tò ghɛ̀ è ki sə̂ŋ zò alegɔ̀ŋlò.

⁸ Ghəa è səŋò zəla e lo ghè zò lò enyəa, e ləghaa nlò ghue zɛʼɛ zo am fə̂ŋ e mɔ̀ʼ, bòʼ kwò enyəa à lò eləgha e tsəla nàlà ndə̀mà tə tə̀bòo tò.

⁹ Kà nlò e səmlo alenaŋâ ndughu tɛʼɛ̄ tughoo â ghì ghəla ghe bùghò a vʉ̀a ghɛ̀.

¹⁰ To aŋghəa Zə̀ kə lo mo kə m fughu chìa â fwàʼ kò, tò ghî a kəfwàʼ à dzûŋ ghò, ghɛ̀ ki aleyoso nduw ghî ghò am fwàʼ kədzûŋ kəla Zə̀ kə̀ namso ghɛ a te.

¹¹ Abugho à lò ko ndughoo ù nàʼn tum è Kə̀zə̀, ù ki alenàʼà ko fəgha kə̀là Zə̀ kə̀ dzɛ; mò a lo ndughoo ù fughuu yosò zò â ghì ghò, ù ki aleyosō ghee an daʼa kəla Zə̀ kə̀ fughu â wə̄n; to zə e lo enyəa alo aghəa a dzə̀m, aghî ghə̀ è fughu Zə̀ kò â kɔʼso mò am bàm e Yɛso Kə̀lestò. Səghanyəgha n lo â wə̄n àsùghò dwaʼa wo, to mbī kê bughò mîaa. Zə e lo ko êzə̀.

Ghɛ̀ ki alefanlo tò ghî a Kəzə̀

¹² Fən ghaŋa à dzûŋ ghò, e kwo ko dzughu e lô so e zuu ghɛ̀ aŋ ŋgaam kə efala kəla ghɛ̀ fanlo êzə̄ŋ. Ghəa ghən lo alemɔ̀msò kôʼ ghɛ̀, tò ghɛ̀ è bəla moʼnlò enyəa à lǒ fɛ̀ɛn kə eghəa kə̀ li ko kə səā a zəŋò ghɛ̀.

¹³ E laam lo nlò alo eduʼnlo enyəa ghɛ̀ nyɔʼɔ̀ faan sùghò tǒ Kə̀lestò, tò ghɛ̀ e ke lo alekele sughò duʼnlo è ne zo abugho ù kè dê sə wô ghaʼ e wə̄n zo.

¹⁴ Dzɔ̀ lò â ghɛ̀ abugho ghe sûuwn ko ghɛ enyəa ghɛ̀ lo ghî a Kə̀lestò; bòʼ enyəa ghaʼ e səghanyəgha n Zuʼ te Kə̀zə̀ n lo a zəŋò ghɛ̀.

¹⁵ E kwo ko ghùw wɛʼɛ ù lì lò so e fanlo enyea e lo gbǒoghùw, ŋkāa tǒ ghùwtsɔ̀ŋɔ, ŋkāa tǒ ghùw wəla ù ghəə̄ŋ ghəa à biigh gho, ŋkāa wəla ù də̀ma alenyəso kaaŋ ghu ko aŋ ghəa a aghì.

¹⁶ Abugho e bûʼ kuūwn lô ko enyəa ghùw wɛʼɛ faan nù bòʼ ù boō fughu â Zə̀ kò, e kwo ko ù lo so e də̂nsò kə̀tuw, ù ki alelaam fughuu zɔ̀ɔŋ kò â Zə̀ ko enyəa ù bǒom zən e Kə̀lestò.

¹⁷ Tɔŋlo enyəa nəgha zə m kpe â Zə̀ kò alesāʼ mbī, mò ù bùʼù kàʼa nùghù tsùghù dzə̀ a zəŋò ghì a wə̄n gho. Abugho saʼ tə te tə ki alekaʼā nughù tsughu a zəŋò sɛ̀ wɛ a Kəzə̀, e lo bòʼò bǒo ênzə̂n a zəŋò ghì ghəla ghe lo mo ghe boom yo làbəlà e Kəzə̀ a?

¹⁸ Mwàʼsò kə Kəzə̀ kə̀ dzɛ̂ enyəa, “Abugho e tughu alebəghaasə ghùw ù dzùŋ, à lô yia boʼò sə̌a kə̀ kwò â ghì biigh ghəla ghe kwo yo Zə̀ kò a?”

¹⁹ A fi lo enyəa ghî ghəla ghe fanlo aŋghəa Zə̀ kə̀ ləghaa, ki alefwaʼā nduw ko fwàʼ kə ghee kə̀ dzûŋ kò, fughuu mɛʼn ndùw ghue e ghee â Zə̀ kəla kə bɔm ghee, Zə̀ kəla kə naāŋ dzughu e wə̄n zo aŋ ghəa zəla kə fə̀ to naŋa enyəa zə e lo ko êzə̀.