Bìoball air-loidhne

1 Pità 2 - To kə Kəzə̀ kə̀ Fughu ko

Tia zəla e mughu àsùghò Naʼ è zɔlɔ zo

¹ Ghəa e lô enyəa Zə̀ kə m fughu ghɛ â mùghù è fughu zo, e fi lo enyəa, ghɛ̀ kuwnlo nlò fə̀ŋ tɛʼɛ tə̀ biigh to, ghɛ̀ maʼa ghəa a kə̀bàŋàdzə̀m ghò, gha à kaʼn gho, kə̀mʉ̀nlo, ghɛ̀ maʼa sugho nùʼ tò.

² Ghɛ̀ doʼo tsughu tò wɛ à bughu gho, à è zuʼso təla ko ghɛ fə̀ŋ è mele kə̀ zɔlɔ kəla kə lô shwāʼ u Kəzə̀ wò, tò enyəa, abugho ghɛ̀ mʉā ko ghè kò, ghɛ̀ ke noo kɔʼ wo aŋghəa Zə̀ kə̀ ləghaa, tò ghɛ̀ ke zə tuw ko.

³ Tò aŋghəa shwāʼ u Kəzə̀ ù dzɛ̂ enyəa, “Ghɛ̀ n zoʼn ŋ kele kɔʼ aŋ ghùe zɛʼɛ̄ aŋghəa Mughu ù te dzɔɔ̄ a te â fə̀ŋ.”

⁴ Bùghò nlò a vʉ̀a Mughu ù te, a vʉ̀a tia zəla e mughu, zəla ghî a mbī a tue maʼa kɔʼ enyəa e ki yo fwàʼ kò, mò Zə̀ kə ŋ kuūwn shìaa sə wo tò kɔ kə kəfəgha.

⁵ Bùgho nlò a vʉ̀a Mughu ù te tò tia ghəla a ki mughù zò, ghe nîi kɔʼ ghɛ ghe bəghāa tiso kɔʼ ndùghù è shʉghà e Kə̀zə̀ a te, ghɛ̀ e ke fwaʼ tǒ fɔ̀e tə̀ zɔlɔ to alekɔʼɔ fughuu fughu kə̀ ushʉ̀ghà kəla kə kpe â Zə̀ kò am bàm e Yɛso Kə̀lestò.

⁶ Tɔŋlo enyəa shwaʼ u Kəzə̀ ù dzɛ̄ enyəa, “Kòʼo nlò, Mùghò n shìaa kɔ kə etīa ko, kəla Ŋ̀ kuʼū nyəa tsughu tò tia zə ebuw zo am bə̀ghàan kə Zayɔ̀n; àsùghò enyəa, ghùw wəla ù boo fughu tsughu dzə â wə̄n kè kèle kòʼ yò tuw kə̀ dəla ko.”

⁷ Tia zən lò kɔ kə etiā kə̀ səŋò kò â ghɛ̀ ghəla ghɛ̀ boō fughu â ghè zò. Yia kuūwn bughò ghî ghəla ghe taʼkè boo fughu, “Tia e mɔʼɔ̄ zəla ghî à bəgha a fə̀ tue maʼa enyəa e yo fəgha ko, zə ŋ kòom bùghò dòʼò tia zə ebuw zo.”

⁸ Ghe yia tɔm naŋa sugho am Mwàʼsò kə Kəzə̀ enyəa, “Zən lò tia zəla ghî à kê tsɔ̂ɔn tsəghà ghuw gho a te; nɛ kəla ghî à kê tâaŋ bvʉā a te.” Ghe kê ghuw a tsɔ̂nlo bòʼ ghe fə̀ tsughoso maʼa shwaʼ u te wo; tò aŋghəa Zə̀ kə fə̀ fôʼ naŋā â ghee.

⁹ Yia a kuūwn bughò ghɛ, ghɛ̀ lo aghî mo ghe ghɛ shîaa nù, fɔe kə təfɔ̀e, naʼ è zɔlɔ zo, ghî a Kəzə̀, ghəla ghe tsɔʼ kɔʼ alezughoo nduw dzɔ̀ e fwàʼ kə wə̄n wəla ù mò tɔŋɔ̄ nughù sə wo ghɛ alo kələm, naŋa wò ghɛ̀ an dzɔ̀ɔdzɔ̀ kə tsə̄ kə wə̄n.

¹⁰ Sʉèsʉ, ghɛ mò buʼ yo tsəgha dzə ghî a Kəzə̀ ghò, yia a kuūwn bugho êzə̄ŋ, ghɛ yia lô ghî a wə̄n gho; alekòom nîi tsughu, Zə̀ kə̀ ka fə dê se e wə̄n e kwuso zo a zəŋò ghɛ̀, yia a kuūwn bugho êzə̄ŋ, ghɛ̀ n tɔ̀ʼ kòʼ aŋghəa Kə kwuso se zo a te a zəŋò ghɛ̀.

E mughu nlò tǒ kɔ̀ɔ ŋ Kə̀zə̀

¹¹ M̀ buʼu kə̀ghu â ghɛ̀ a fən ghaŋā gho, ghɛ̀ tò ghì ghəla ghe bwîin nyə wô nû fɛ am mbī àsùghò ghəla ghe nɔe mughu. Nǐi nùghuu nlò moʼn zɛʼɛ zo am fʉgha wəla gwən e ughùe e ghûw è ləghaa, tɔŋlo enyəa fʉgha u te u tɔɔŋ tsàm a zəŋò ghue zɛʼɛ zo.

¹² E deē nlò mwam è dzûŋ zò am bvʉ̀a e ghì ghəla ghe kaām kwo yo Zè kò, to zə e lo enyəa mo ghe kwuu ko ùgəŋ a zəŋò ghɛ̀, ghe ŋ koʼò wo fwâʼ kɛʼɛ kə̀ dzûŋ kò, fughuu ùkɛɛ â Zə̀ kò an tsuʼ wəla kə kê kôom bughoo a te ebàm.

¹³ An zən e Mughu ù te, e zuuw nduw nlò â ghî ghən a dzə̀m ghe tsuʼ naŋa kɔʼ enyəa ghe e lɛnlo â ghì ghò; ŋkāa à lò Də̀ŋ kə̀ ne kəla tsəghàsə dwə̀ŋ wò u dzə̀m,

¹⁴ ŋkāa à lǒ dwə̀ŋ u təkɔlɔ wəla à tsɔʼ kɔʼ wə̄n wəla ù lǒ də̀ŋ kə̀ ne ko enyəa ghe e fɔeso ghî ghəla ghe ghəə̄ŋ ghəa à biigh gho, kɔʼso ghəla ghe fwaʼà dzɔɔ̄.

¹⁵ À lò moʼnlò e Kəzə̀ enyəa ghɛ̀ e ghəəŋ ghəa zəla e lo êsəŋo alekomso làʼsò e ghî ghəlà ghe mughù alo kələm.

¹⁶ Mughu tsughu nlǒ tò ghî ghəla ghe mughu ndzə̀əm kə emùghù kò; e kwo ko ŋgòʼ e èmùghù zən lo sô e doʼn tò kəndzə̀ghā â ghɛ̀ aleghəəŋ bo zo, e kuuwn mughu nlò tǒ kɔ̀ɔ ŋ Kə̀zə̀.

¹⁷ E fughuu nlò kɔʼso mò â ghî ghə̀n à dzə̀m; ləghaa dzeŋe kə wɛ a ndùghèkə̀zə̀, e mughù nlò an tsəŋ e Kəzə̀, ghɛ̀ è fughuu sugho kɔʼso mò â də̀ŋ kə̀ ne ko alo enaʼ.

Fala e Kə̀lestò è lo tǒ tsə̌a â sɛ̀

¹⁸ Ghî à fwaʼa gho, e zuuw nduw nlò â ghê mughùbè ghɛʼɛ, fughuu sugho ghe â kɔʼso mò am fə̂ŋ zɛʼɛ e dzə̀m, ghəŋlo êzə̀ mò ghɛ̀ taŋso yo enyəa ù lǒ ghùw ù dzùŋ ŋkāa ghùw ù bǐigh.

¹⁹ Ghɛ̀ kwo nû enyəa Zə̀ kə̀ duʼn nù â ghùw abugho ghe fəmso wə̄n alo eghəa mò ù kà ghə̌əŋ bonlo, bò enyəa ù kwò lâŋ kə Kəzə̀.

²⁰ Namso kə̂a kə̀ kuuwn lǒ kwò a te à, abugho ghe buū ghû alo eghəa mò ghù ŋ ghəəŋ bonlo, ghù vʉ̀a ghù dzə̀n tsughu fə̀ŋ a te a, lò ko nû a. À sò fɛ kuuwn lò enyəa abugho ghù fanlo an dzɔ̀ zəla ghù ghəŋlo, ghù vʉ̀a ghù dzə̀n tsughu fə̀ŋ, Zə̀ kə n bughuso ghù.

²¹ Kən lò fəgha kəla ghe fə̀ tɔŋɔ ghɛ a te, tɔɔŋ fala zəla Kə̀lestò fə̀ fala bòʼ ghɛ̀. Fala zəla ù fə̀ fala ghè zo n zoʼn tsughu ghɛ alefwaʼā tǒ wə̄n, enyəa ghɛ̀ e bɔɔm bwiī an dzə̀ tə wə̄n.

²² Ù ka fə bo è li e ghəəŋ kòʼ dzə̀, ù ka fə gha è li tso kàʼ kòʼ sùghò.

²³ Ghe mò sûuwn ko wə̄n, ù ŋ kè buʼù sûuwn ghee, abugho ù mò faān ko nû, ù tɔɔn yo â dzə̀, ù ŋ kuuwn naŋa tsughu ko fə̀ŋ è wə̄n a zəŋò Zə̀ kò, tɔɔŋ ghùw wəla ù saʼā sāʼ è tsəghatsəgha.

²⁴ Ghuūghùe u Kə̀lestò ù mafə boʼò mbuŋ kə təbòo kə sɛ̀ kò alo kədàŋlo, enyəa tò sɛ̀ e lo tò ghî a kpuuwn gho abugho e bughò tɛ̌ tsughu aleghəŋlo ebo, sɛ̀ è mughu mughù e tsəghatsəgha zo. Fəŋ ghəla ù fə̀ kele mafə̄ baaŋ sɛ̀.

²⁵ Tɔŋlo enyəa ghɛ̌ fə̀ lo tsəgha tò təndzì, tə laʼà bwîi, zə e lo ezəŋ enyəa ghɛ̀ ŋ kòom bùghò nyə ebàm an ghu kə bàʼàtə̀ndzì, tɔɔŋ ghùw wəla ù lɛnlo â mughù zɛʼɛ zo.

« Roimhe

Air adhart »

2020

Lean sinn:

Ceanglaichean taic

Sanasan