1 Kòlentìan 9 - To kə Kəzə̀ kə̀ Fughu ko

Dwaʼa u Tum è Kə̀lestò ki

¹ À lǒ mò Ǹ ndzə̂əm mùghù yo aŋ ŋgəŋ zaŋa a? À lǒ mò Ǹ yo tum è Kə̀lestò a? À lǒ mò Ŋ̀ kâ Mughubè ù sɛ̀ Yɛso kôʼ à? À lǒ mò à ka fɛ mugho ghəŋlo enyəa ghɛ̀ boo fughu â Mughu ù te à?

² Abugho kwo yo mugho enyəa Ǹ lo tum è Kə̀lestò, ghɛ̀ yia a ŋgəə̄ŋ kwo ko mugho. Mughùu zəla ghɛ̀ mughù enyə alo kə fəgha kə mɔ̀ʼ ghɛ̀ à ghê Kə̀lestò, e dêe nù enyəa Ǹ tum è Kə̀lestò

³ Ŋ̀ ghue waŋa u baaŋ səa tsə̀ghà enyə abugho ghî à tɔʼɔ̀ tûe kaŋa ko enyəa Ǹ yo dzə̀ tum è Kə̀lestò.

⁴ À lǒ mò e lo nû enyəa Ŋ̀ ki yo daʼa ko alekelê fəghà kə zəa ko àsùghò kə̀ mʉa ko am fwàʼ kəla M̀ fwaʼā ghè kò à?

⁵ À lǒ mò Ŋ̀ ki yo daʼa ko alenìi kɔʼ wìzən mò ù bǒo fughu â Zə̀ ko aŋ wi a, ghàʼ à ghee e ŋgea nduw a dzə̀m à, tò aŋghəa tum tə Kə̀lestò tə̀ li tən àsùghò waazə̂ a Mughu ù te gho ghèe ghê Sɛfàs fə̀ ghəŋlo à?

⁶ Ŋkāa à lǒ mò e lo enyəa à kà lò ko mugho ghàʼ à Bànabàs ghàʼ ki aletèlè fwàʼ à, sěe ghàʼ sô lo alezə a?

⁷ À lǒ sùghugòʼ è ghɛ̌ zò è fwàʼà tsəā ghue u wə̄n wo, wən à nəŋ ko a? À tǎa tsughu ndùghò kàʼ n ùtwam mò, ù ŋ kè kʉ̂ɛɛ nəgha kətam a tè à? À nyə̀so ndùghò mbɔ̀ŋ tò a, ù n yo alekaā mʉ mele kə te ko a?

⁸ À lǒ mò ŋ ghəa ghən kêaa wò to aŋghəa ghùw nsɔ̌ɔŋnchùw kə̀aa ghəa gho a te a? Lâŋ kə mgbaŋa kəaa sùghò yò ghəa è mɔʼɔ̄ zo a?

⁹ Nu ghe tɔm naŋa an làŋ kə Musî enyəa, “Kǎ tsāʼ an dzughu e mbɔ̀ŋ è gwənlo dzəlà nàŋa abugho è dzùghòo kue gho.” À lǒ mò Zə̀ kə̀ sə e wə̄n e ka naŋa ko a zəŋò mbɔ̀ŋ tə̀ gwəə̄n to a?

¹⁰ À lǒ mò ù ghəa ghən fɛ kə̀aa yò kùu wò sɛ̀ à? Ghe fə̀ ghəa a te a tɔm naŋa â sɛ̀, bòʼ enyəa ghùw wəla ù gwə̀ən sum wo ki alegwəə̄n nduw, chiī nduw tùʼ enyəa e lo kele nù fəgha ko an sum u te wo. Ghùw wəla ù dzùghòo kue gho e chiī sugho tùʼ êzə̀.

¹¹ Abugho e lo enyəa ghàʼ fəgha kəla Zuʼ tə̀ Zɔlɔ tə fughu â ghàʼ am bvʉa zɛʼɛ, à so kǔuwn tughu kə kwò a te â ghɛ̀ alefughu ghaʼ â fʉgha u mbī ù li wən a?

¹² Abugho ghî li a ki daʼa kə te ko alekele fʉgha wən aŋ ghùu ghɛ̀, ghàʼ sô kǔuwn bòʼò kì yo daʼa kə te ko ênzə̂n tsə̀ghàsə ghee a? Ghàʼ kâ dwaʼa u te u kuuwn dè dzə. Ghàʼ fwə̂n ka tsughu ezə alo aghəa a dzəm enyəa mò à lò ko kə kwò e kwo ghàʼ lô fêe naāŋ dzî enyəa ghî à lô zuū làbəlà è Kə̀lestò.

¹³ À lǒ mò ghɛ̀ məghaa nù enyəa dzə zəa ko an dəŋò kəla ghe təŋò naŋā wə̄n a te a? Ghɛ̀ məghaa sughò nù enyəa ghî ghəla ghe fwaʼā an tsaʼ kəla ghî kɔʼɔ sâa fughu fʉgha wo a te zəa am fʉgha u te wo a?

¹⁴ À lò sugho eghəla Mughu te dzɛ̂ tsughu enyəa ghî ghəla ghe naʼn làbəlà è dzùŋ e wə̄n e zəa sugho aŋ ghəa a làbəlà è dzùŋ a te gho.

¹⁵ Ŋ̀ kâ kǔuwn dè dzə daʼa kə li ko an dwaʼa wən, Ŋ̀ ghəa ghən êzəŋ buʼù tɔ̌ɔ dzə yò enyəa to M̀ mô nîi kele kɔʼ dwaʼa u te wo aŋ ghùe waŋā. Â mùghò alezəghàa tsughu enyəa ghùw ù lì bùghò ghəə̄ŋ tsughu enyəa Ŋ̀ ka e tsɔɔ̄ fə̀ŋ am fəgha kəla Ǹ ti a te, to M̀ biso kpuw a te.

¹⁶ Ŋ̀ ki dzə yo daʼa kə li ko aletsɔɔ̄ fə̀ŋ enyəa sō Ŋ̀ naʼn wò dzə̀ làbəlà è dzùŋ zən. À fwàʼ kən â mùgho fughu Kəzə̀. Utsû a zəŋò mùgho abugho Ǹ doʼkè naʼà làbəlà è dzùŋ e te!

¹⁷ Abugho M̀ mô fwàʼ kən kə fwaʼà enyəa à tsò tsəm kɔʼ ko mùghò, to ghe mô tsə̌a mùghò a te. Abugho à kuūwn lô enyəa à kà mùghò tsə̂m kɔ̀ʼ dzə̀, à fi lo enyəa M̀ fɛ fwàʼà fəgha kəla Mughu ù te fughu â mùghò enyəa mùgho è fwaʼā.

¹⁸ Namso kaŋā kə lo kwo a te a? Namso kaŋa ko a te lo enyəa mùghò e naʼn wo làbəlà è dzùŋ e te mo ghe tsəa yo mugho, àsùghò enyəa mùghò bvʉa zee yo ghɛ â fʉgha wəla M̀ mô ki alebvʉ̄ aŋghəa Ǹ naʼn wo Làbəlà è dzùŋ e te.

¹⁹ Aŋghəa Ǹ tsô ndzə̂əm lô ko fɛ, Ŋ̀ ghəəŋ naŋa tsughu ghue waŋa tò kəkɔ̂ â ghì ghən à dzəm, nyəa to M̀ mô tsòo fəghaan ghəəŋ ndùw ko enyəa ghî ghə̀ e boom fughuu nduw â Kə̀lestò.

²⁰ Abugho Ǹ lo ghàʼ à ghê Dzûu tò, mùghò n lo tǒ ghùw u ghee, enyəa Ŋ̀ ghəŋlo ghe boō fughu â Kə̀lestò. Abugho Ǹ lo ghàʼ à ghê ghì ghəla ghe lo a tsəlà làŋ kò, mùghò n dòʼò ndùw tǒ ghùw ù ghee, aŋghəa M̀ bûʼ yo ko a tsəla làŋ kò, aleghəŋlo enyəa ghe boō fughu â Kə̀lestò.

²¹ Abugho Ǹ lo ghàʼ à ghê ghì ghəla ghe yo dzə a tsəlà làŋ kò, mùgho n dòʼò tǒ ghùw ù ghee, (aŋghəa Ǹ lo mò ŋ kaām bûʼ nɔ̂sə aŋ ghùu làŋ kə Kəzə̀ ko, mò Ŋ̀ kuuwn naam lo ko a tsəlà làŋ kə Kə̀lestò kò), enyəa to M̀ mô lò aleghəŋlo enyəa ghî ghəla ghe kwo yo lâŋ kò è lo aleboō fughu â Kə̀lestò.

²² Abugho Ǹ lo ghàʼ à ghê ghî lɛɛ ghəla ghe ki you fə̂ŋ tò, mùghò n dòʼò ndùw sùghò tǒ ù ghee, enyəa to M̀ ghəŋlo ghe boō fughu â Kə̀lestò. Mùghò m bùghò dòʼò fʉgha wən ù dzəm â ghì ghən à dzəm, enyəa Ŋ̀ kəŋo tsughu tədziī tə dzə̀m alebəghaasə ghee à li gho a te.

²³ Ŋ̀ ghəa a te gho a dzəm ghə̌əŋ ko alezùghòo làbəlà è dzùŋ è te, enyəa to M̀ mô kele sughò bughuso zəla e lo aŋ ghəa a te gho.

²⁴ À lǒ mò ghɛ̀ məghaa nù enyəa à dzèŋe nyəŋo tsə̀ghà ndə̀mà tə aghì abugho ghe bânlo alenyəŋ a, à ŋ kuuwn nyəŋ zə ko ghùw ù mɔ̀ʼ namso kə te ko a? Ghɛ̌ fi ki aledə̀mà təla tsughu alenyəŋo zə namso kə te ko.

²⁵ Ghî à nyəŋo ghən à dzəm kì aletɔʼɔ̄ naaŋ tsughu lwâŋ wəla ghe zoʼn tsughu ghee a te. Ghe enyə ghəŋlo enyəa to ghe mô lò alekele kə̀lɔ̀ʼɔ mo kə lo boo mìaan nù, sɛ̀ kuuwn kəŋo alekelê lɔʼɔ kəla kə kê boō mîaan koʼò tsəghà yo.

²⁶ Zən lò e ghee Ǹ nyəŋō dzə̂ yo tǒ ghùw wəlà ù nyəŋō maʼn kənughùnùghù, buu sùghò yǒ ŋgè kò tǒ ghùw wəlà ù shùaan kêe kaāŋ kʉ̌ɛɛ ko alo kəmbùʼ.

²⁷ Ǹ nîi nǎaŋ tsūghûu ghue waŋa tò kəkɔ̂ a tsəlà mùghò enyəa e kwo Ǹ lô so e kuūwn gùuŋ namso kə te ko mò à làbəlà è dzùŋ è te zughòo mùghò â ghì ghò.