1 Kòlentìan 6 - To kə Kəzə̀ kə̀ Fughu koSaʼ tə saʼa to am bvʉa e ghì a Kəzə̀ 1 Abugho ghù ki tsû wǒ ghɛ̀ à wàazùghù, ghù sò â wə̄n an ti esāʼ a vʉ̀a ghì ghəla kɔʼso yo Zə̀ kò ndûw kwò, mò ghù kà ndùw â wə̄n a vʉ̀a ghì à Kəzə̀ à zɔlɔ gho a? 2 Ghɛ̀ kwo yo enyəa à lô mbī zən saʼâ ghì Kəzə̀ à zɔlɔ gho a? Êzə̄ŋ abugho ghɛ̀ lo ki alesāʼ mbī, ghɛ̀ kuuwn ghà kè nù alesāʼ làŋà n təsaʼ mən a? 3 Ghɛ̀ kwo yo enyəa sɛ̀ lo ki alesaʼ tsə̀təndə̄ghā tə Kəzə à? Abugho sɛ̀ kê lo alesaʼ tsə̀təndə̄ghā tə Kəzə̀, à fi lo enyəa sɛ̀ lo sughò nû alesaʼa ghəa ghî ghən fɛ am mbī! 4 À sò lǒ kwò enyəa, abugho ghɛ̀ ki saʼ to kùu ndùw ghəa ghən fɛ̀ am mbī, ghɛ̀ n nîi nduw a vʉ̀a ghì ghəla dzeŋe kə ghì a Kəzə̀ kə̀ lɛɛ̄n kêe lo a, mo ghe nîi wò ghɛ̀ â tuw kə̀ dəla ko a? 5 Ŋ̀ ghəa ghən kə̂a wò enyəa Ǹ də̂nsò wô tuw kɛʼɛ. To e fɛ lò enyəa ghùw yò am bvʉa zɛʼɛ̄ ù tɔɔ̄ tò ù è biaan ghəa gho am bvʉa e waazə̂ a wə̄n a, tɔ̂ɔŋ ghì a Kəzə̀ a? 6 Chìa fɛ fwəlà nùghùun nyə̌a ndùw alo təsāʼ ghèe wàazə, nìi ndùw sùghò enyəa ghî ghəla ghe doʼkè boō fughu â Zə̀ kò e saʼā saʼ tə te to! 7 Abugho ghɛ̀ ki kaāŋ saʼ to aŋ ghùe zɛʼɛ̄, e dêe enyəa ghɛ̀ mughu dzə yo tò ghî ghəla ghe lo mo ghe m boo fughu â Zə̀ kò. Ghɛ̀ yo alebisō boō ndûw ko enyəa ghùw ghəə̄ŋ boon ghɛ̀ â ghəa zo a, ghɛ̀ fala nduw a te a? Ghe yo alezə̀ghàa ndûw ko enyəa ghe biso tsê ghɛ̀ à? 8 Ghue e eghùe zɛʼɛ̄ e ghəəŋ boon sùghò àghəa tsèe sùghò àghì, bùʼù ghə̌əŋ ghəa yi a zəŋò waazə̂ ghɛʼɛ gho. 9 Ghɛ̀ kwo yo enyəa ghî ghəla ghe yô dzə̂ tsəghatsəgha lo zəa yo fɔ̂e u Kəzə̀ wò à? E kwo ko fəgha kə li kə lô nɔɔ̄m ghɛ; ghùw ù li aŋ ghì ghən, ŋkāa à lò nùuŋ kə ghûw, ŋkāa wəla ù kɔʼsō mùʼù mò, ŋkāa wəla ù lǒ bwìkòʼ kò, ŋkāa ghînû ghəla ghe nyə̂əŋ dzəə̄ŋ ghue zo ghèe ghê yìnû à li gho, 10 ŋkāa à lǒ ghùw ù tsɔ̀ŋɔ, ŋkāa à lò wəla ù səā â sə gho am fʉgha u mbī wo, ŋkāa à lǒ ghùw ù kàla, ŋkāa à lò wəla ù màʼn nùʼ tò an zən a aghì, ŋkāa à lò wəla ù bvuʼū luʼū to, ghe ghən à dzə̀m lo zə yo fɔ̂e u Kəzə̀ wò. 11 Ghɛ̀ â li a fə̀ buʼu ghəəŋ tsəgha sugho ŋgòʼ è ghə̀a ghən. Ghe ŋ kuuwn sùw màʼà tsùghù ghɛ, ghe ŋ ghəəŋ tsùghù è sugho ghɛ̀ n zɔ̀n dòʼò è tsughu, ghe ŋ ghəəŋ tsughu sùghò enyəa ghɛ̀ doʼo tsughu ghî à tsəghatsəgha gho an zən e Mughu ù te Yɛso Kə̀lestò àsùghò an Zuʼ tə̀ Zɔlɔ to. Nǐi kɔʼ nlò ghue zɛʼɛ zo alefughuu kɔʼso mò a te â Zə̀ kò 12 Ghɛ̀ â li a dzâa tsùghu nù enyəa, “Ǹ ki nû daʼa ko aleghəŋlo àghəa à dzə̀m.” Òo, e lo nû êsəŋò, à sò kǔuwn lò ko enyəa à yò dzə̂ aghəa a dzəm a dzɔɔ̄ â ghù. M̀ mô lò sugho nû aledzàa tsughu enyəa Ǹ lo nû aleghəŋlo àghəa a dzəm; à kǔuwn lò enyəa Ǹ yo alebōo aledòʼò kəkɔ̀ â fəgha kə li ko. 13 Ghùw ù lì lò sugho nû aledzàa tsughu enyəa, “Fʉghàzəa u lo fəgha kə nʉ̀ghà kò, nʉghà vʉa u lô fəgha kə ufʉ̀ghàzəa ko.” Òo; à kǔuwn lò ko enyəa Zə kə lo dzùuw màʼn fʉgha u te wo u dzəm. Zə kə ka fə gwən e ughùe e ghûw è bɔm wò dzə aŋ ghəa a nuūŋ kaaŋ ghe eghùe gho, à fə̀ lo enyəa zə e lo alefwaʼā â Mughu ù te, enyəa Mughu ù te e lɛɛn sugho â gwən e ughùe e te zo. 14 Zə̀ kə̀ mafə Mughu ù te alo evʉ̄ zôm nùghù wò an daʼa kə wə̄n, ù lo zòo nùghùun wò sùghò nǔ sɛ̀. 15 À lǒ mò ghɛ̀ kwo yo enyəa ghɛ̀ lo nyùŋ u ughùe u Kə̀lestò. À lǒ mò Ŋ̀ ki nû alenìi kɔʼ nyùŋ kə ughùe kə Kə̀lestò Ǹ ndûw təmadzəə̄ŋ kɔʼ ghèe ghê kpàlà kò à? Ɛ̂ŋgaŋ dzə̂, Ǹ tso yò. 16 Ŋkāa ghɛ̀ kwo yo enyəa ghùw wəlà ù ndùw təmdzəə̄ŋ ndûw kpàlà kò ghèe wən bùghò dòʼò kɔʼ tò gwən e ughùe e mɔ̀ʼ à? Nu ghe tɔm naŋa am Mwàʼsò kə Kəzə̀ enyəa, “Ghe a te gho a bə̀ghà kè bùghò dòʼn kɔ̀ʼɔ egwən e mɔ̀ʼ.” 17 Ghùw wəla ù laām təmdzəə̄ŋ kɔʼ ghue u wə̄n wo ghèe Mughubè ù te, zuʼ tə wə̄n ghèe tə Mughu ù te tə m bùghò dòʼò kə̀fəgha kə̀ mɔ̀ʼ. 18 Zəgha màʼa nlò ghəa à nuūŋ kaaŋ gho. Bo è li e yo dzə̂ ghùw ghəŋlo e mɔ̂ɔ gwən e ughùe e wə̄n zo; ghùw wəla ù nùuŋ kaŋlo kuuwn ghəŋlo èbo a zəŋò gwən e ughùe e wə̄n zo. 19 À lǒ mo ghɛ̀ məghaa nù enyəa gwən e ughùe zɛʼɛ̄ e lo tsughu e Zuʼ tə̀ Zɔlɔ təla tə mùghù a zəŋò ghɛ̀, mò à fə fughu Kəzə â ghɛ̌ a? À ghue zɛʼɛ e ki dzə yo ghɛ, à ghɛ̀ ki Kəzə. 20 Zə̀ kə fə̀ tuw wɛʼɛ u zue sə wo aŋ wən è tughu zo. Ghɛ̀ ki alenaŋā tsughu gwən e ughùe zɛʼɛ̄ alekɔʼso Zə kò a te. |
2020