1 Kòlentìan 5 - To kə Kəzə̀ kə̀ Fughu ko

Ghəa à nuūŋ gho an Dzeŋe kə ghì a Kəzə̀

¹ Ghe kûu dzɛ̀ enyəa ghî à nûuŋ kàŋlo èghue am bvʉa zɛʼɛ̄, an dziī zəla ghî ghəla ghe doʼkè boō fughu â Zə̀ kò bùʼù yo aleghəŋlo. A zuw enyəa ghùw u lì lò am bvʉa zɛʼɛ̄ ù bùʼù nyəə̄ŋ ghɛ̀ wì ù tsele.

² Ghɛ̀ sô yia ghaŋso sùghò èghue a? Ghɛ̀ mô ki alelaam diī nû, lò sugho alo ese. Ghɛ̀ ki aledzùu sə ghùw wəlà ù fòʼ ghəa zən zo am bvʉa zɛʼɛ̄.

³ Nu aŋghəa ghuūghùe waŋā u bûʼ buw ko a fì a vʉ̀a ghɛ̀, fəŋ zaŋa lo sɛ̀. Ghəa e bûʼ lo ko tò Ǹ lo fì êzə̀ sɛ̀, mùghò m mbɛ an tuw kə ghûw wəla ù fôʼ ŋgòʼ e eghəa tò zən bɛ an zən e Mughùbè ù sɛ̀ Yɛso

⁴ Abugho ghɛ̀ bughò dzeŋe tsughu, fə̀ŋ zaŋa n lo sɛ̀, an daʼa kə Mughùbè ù sɛ̀ Yɛso

⁵ Ghɛ̀ ki alezèe fughuu ndûw ghùw wən â Satàn tò ù wiī maʼà tsughu gwən e ughùe e wə̄n, to fə̀ŋ è wə̄n e ke lo alezə kətuw an tsuʼ wəla Mughùbè Yɛso lo bughoo ebàm a te.

⁶ Fəŋ zəla ghɛ̀ tsɔ̂ɔ kaŋlō, ghəa a te a dzɔ̂ɔ dzə yò. Ghɛ̀ kwo ko nû enyəa sə fə mbvùŋ fə bughōo fə n nyəŋ kǎan ndùw tuʼ kə kəbɛ̄ kə dzəm enyəa kə kɔʼɔ kɔʼ a?

⁷ Sǔuw màʼa sə kɔʼ nlǒ mbvùŋ è wìi zən tò ghɛ̀ doʼo tsughu tò tuʼ kə kəbɛ kə̀ fughu ko mò mbvùŋ yò a te, aŋ ghəa ghɛ̀ tɔ̂ʼ lo. Nu ghe maā Kə̀lestò sɛ̂ an tuw kə sɛ̀ tǒ ndzì è Zə kə̀ Zəŋso naaŋ ko.

⁸ Bùghò nlò tò sɛ̀ zə zə kən ko, mo a kâ zə̀ dzə̀ am bɛ kəla kə ki mbvùŋ è wǐi zən — mbvùŋ è wǐi zen lo ebo àsùghò fə̀ŋ è biigh; mo a zə kən kə laam zə am bɛ kə̀ fughu kəla kə ki yo mbvùŋ — mo a zə kən kə zəa am fə̀ŋ tə̀ zɔlɔ to àsùghò alo êsəŋò.

⁹ Mùgho mò tɔm naʼā wo â ghɛ̀ am mwàʼsò kaŋa enyəa e kwo ghɛ̀ lô təmādzəə̄ŋ ghî ghəla ghe ghəə̄ŋ kaāŋ dzə̀adzə̀ tə aghəa tə̀ nuūŋ tə eghùe zo;

¹⁰ à dɔ̀m yò dzə ghee ghəla ghe ki mwam è biigh zo fɛ am mbī, ŋkāa ghî ghəla ghe səā â sə gho am fʉgha u mbī wo ŋkāa ghî à tsɔŋɔ gho, ŋkāa ghəla ghe kɔʼsō mùʼù mò. Abugho ghɛ̀ lo ghəə̄ŋ dzə̂ êzə̀, ghɛ̀ lo ki alesəā nughù kɔʼ fɛ am mbī.

¹¹ Mùgho mò dzɛ̂ enyəa ghɛ̀ ka e təmadzəəŋ ghî ghəla ghe dzɛ̂ enyəa ghe lo waazə̂ ghɛʼɛ abugho ghe lo mo ghe nûuŋ kǎaŋ nù, ghe yia səa â sə gho am fʉgha u mbī wo, kɔʼso mmùʼù, sùwnlò àghì, mʉa kala, ŋkāa tsɔŋɔ, kà tsobùʼ zə dzəəŋ sùgho ghɛ̀ à ghê ŋgòʼ è aghì to ghən.

¹² E zaŋa e lo kwo a te â mùghò alesaʼa ghî ghò mo ghe yo an dzeŋe kə ghì a Kəzə̀ à? À lò ghɛ, ghɛ̀ ki alesaʼ ghî ghəla ghe lo an dzeŋe kə ghì Kəzə̀ kɛʼɛ.

¹³ À lô ghì ghəla ghe yo an dzeŋe kə ghì a Kəzə̀ saʼa ko Kə̀zə̀. Ghe tɔm naŋa am Mwàʼsò kə Kəzə̀ enyəa, “Dzǔu sə nlǒ ghùw wəla ù ki fə̀ŋ è biigh am bvʉa zɛʼɛ̄.”