1 Kòlentìan 4 - To kə Kəzə̀ kə̀ Fughu ko

Fwàʼ kə Tum tə Kə̀lestò

¹ Ghî à ki aleniī ghaʼ tǒ ghî a kəfwàʼ a Kə̀lestò ghe naŋā tsughu enyea ghe e teso dzaā wo səŋò zəla a nân dòʼò aŋ ghəa a Kəzə.

² Ghəa zəla ghe ləghaa â ghì ghəla ghe naŋa tsughu enyəa ghe e lɛnlo â ghəa ghən gho lo ko enyea, ghe ki alefwàʼ â Mughùbè ù ghee am fə̂ŋ e ghee a dzə̀m.

³ Yia a bugho mugho, Ǹ dòʼò nǎaŋ yo tuūŋ ko enyəa ghɛ̀ saʼa mùghò, ŋkāa à lo ghî à nughù gho e ghe saʼā mugho; m buʼù saʼa sùghò yò ghue waŋa wo.

⁴ Fəŋ zaŋa zɔlɔ nù, à yò dzə̂ enyəa ŋ kuuwn ki yo ghəa è biigh zo. À mìaa ko mugho ù te ù lo alesaʼ mugho.

⁵ A fi lo enyəa ghù ki dzə yo alesāʼ ghùw u li mo nəgha è te e kaām kpe. Saʼ è gbǒo tee zə aghəa ki alebɔɔm ləmā to Mughu ù te kê bughò; ù ke bugho nìi nǎŋ wo tsɔŋ tə aghəa tə kələm to an ndɛ, ù dèe fughuu kɔʼ môʼn zəla ghùw ki alekele aŋ ghuu Zə kò. A kê bugho an nə̀gha e te zo, Zə̀ kə̀ lo e fughu nduw ko chìa â kɛɛ wəla u kpe â wə̄n.

⁶ Waazə̂ ghaŋa gho, yìa Ǹ nî kɔʼ ghue waŋa wo ghàʼ Àpolòs tǒ tsə̌a aŋ ghəa ghən enyəa to ghɛ̀ mo zoʼn kele kɔʼ fəgha kəla shwaʼ wən dzâa tsughu enyəa, “E kwo ko ghɛ̀ lô tɛ̂ɛn daŋso bəŋ ko am fəgha kəla ghe tɔm naŋā.” Tò enyəa ghɛ̀ lô kɔʼso ghî à li gho, ghɛ̀ è alechwiīlwii à gho.

⁷ À kòʼò ndùghò ghəa è li zo e lo nəŋònəŋ a zəŋò ghɛ̀ a? À lò kə kwò ghɛ̀ ki a mò à kà fughu Zə kò a? Abugho à fə̀ fughu Zə̀ kò â ghɛ̀, ghɛ̀ sô fə̀ŋ tsɔ̀ɔ aŋ kwò tò a è so ghɛ̌ fə̀ fʉgha u te kele aŋ ŋgəŋ zɛʼɛ a?

⁸ Ghɛ̌ ghəŋlo tò ghɛ̀ m fʉgha wən u dzə̀m ghɛ̀ mò ləghaa kele mɛ̀ʼɛ̀! Tò ghɛ̀ n dòʼò tən ghî à kuu gho! Tò ghɛ̀ m bùghò dòʼo dwəŋ wò, mò ghue zaʼa e kaam yǒ dwə̀ŋ wò! Abugho à mò lo enyəa àghì lɛɛn ghɛ̀, to sɛ̀ mô dzèŋe lɛɛn ndùw à dzəm.

⁹ Nu Ŋ̀ kwo enyəa Zə̀ kə̀ n dè wò ghaʼ tsə̀təndə̄ghā tə Yɛso tò, tò ghî ghəla ghe lô bam ko aŋ ghì ghən à dzəm enyəa ghî ghə̀ e tɔʼɔ̄ koʼo wo, tò ghî ghəla ghe lo mo ghe n tsughu tsən an tia e saʼ enyəa ghe kpuuw nù. Ghe ŋ ghe ŋ ghàʼ tɔŋ zaa fɛ am mbī àsùghò â tsə̀təndə̄ghā tə Kəzə̀ tò àsùghò ghì ghò a dzə̀m.

¹⁰ Ghàʼ lo tò fʉgha ù laʼsō wo aŋghəa ghàʼ fwaʼa â Kə̀lestò, ghɛ̀ yia kuūwn tɔɔ̄ aŋghəa ghɛ̀ lô fəgha ko kə mɔ̀ʼ ghɛ̀ à ghê Kə̀lestò. Ghàʼ lo bvùʼù mə aghì, ghɛ̀ yia kuūwn lô ghî à tughūu gho. Ghe kɔʼso ghɛ̀, ghe yia kuūwn chwiīlwiī ghāʼ.

¹¹ Alebùghò sə êzə̄ŋ, dzəŋ n za ghaʼ, fəŋ è m̀mùghu zə̀a è zuʼso ghàʼ, a ki yo ndzʉ tə səŋò tò a zəŋo e eghùe, ghe n zàʼa ghàʼ alo ŋkwə̀n, ghàʼ yia a ki sugho yo luʼū kə mughuun ko.

¹² Ghàʼ yia wiī ghue zaʼa zo am fwàʼ ù tughu wo. Abugho ghe sûuwn wô ghaʼ, ghàʼ ŋ kuuwn fughuu ndùw ghee â bughuso zo; à m bùghò ghe ndzaŋso kaāŋ ghaʼ, ghàʼ ŋ kuuwn kɔlɔ tsughu ko tə̀fə̀ŋ.

¹³ Abugho ghe boōn zən ghaʼā gho, ghàʼ n dəmà ko alekə̀a shwaʼ ù dzûŋ wò. Ghàʼ yia a bughò doʼò tsughu dzʉ u mbī wo êzə̄ŋ, tò fəgha kə kwəlā maʼn ko am fʉgha wən ù dzəm.

¹⁴ Ŋ̀ ghəa ghən tɔɔ wò dzə yò aledə̀nsò wô tuw kɛʼɛ, à lò alekʉ̀ɛn wô ghɛ̀ tò wɛ ghaŋā à tsuʼu gho.

¹⁵ Tɔŋlo enyəa abugho ghɛ̀ bûʼ ki ko ghî à chinlo a ghɛ̀ gho təkam eghə̄m aŋghəa ghɛ̀ à ghê Kə̀lestò lò fəgha ko kə mɔ̀ʼ, ghɛ̀ ki dzə yo ghê tsele ndə̀m. Nu mùgho mò doʼō tsele wɛʼɛ aŋghəa ghɛ̀ mò bugho doʼò fəgha ko kə mɔ̀ʼ ghɛ̀ à ghê Kə̀lestò Yɛso mò ghɛ̀ zuw tsughu làbəlà è dzùŋ e te.

¹⁶ M̀ fɛ buʼu wò kəghu â ghɛ̀ êzəŋ enyəa ghɛ̀ ni ghuw kə e bwìi kaŋa ko.

¹⁷ Zən lò e ghee Ǹ dzɛ̂ enyəa Ǹ tuu wò nù Timotì, wɛ waŋā ù tsùʼu wəla ù gaʼ fə̀ŋ a zəŋò Mughu ù te, ù zə̂əŋ wô ghɛ̀ an dzìi taŋā tə ghəəŋ tə aghəa to aŋ ghəa M̀ fwaʼa â Kə̀lestò, aŋ ghəa Ǹ zoʼn kaŋlo an luʼū ten tə dzəm an ndzweŋe u ghì a Kəzə̀ wən u dzə̀m.

¹⁸ Ghɛ̀ à li a dêe èghue, tò a è so mùgho mò bughōo yo a vʉ̀a ghɛ̀.

¹⁹ Ǹ lo kuūwn kùʼù bùghò tàa nù a fì a vʉ̀a ghɛ̀, abugho Mughu ù te boō dzə. Abugho Ŋ̀ kê bugho, Ǹ lo kəŋo kele səā kɔʼ mùghò â nə ko daʼa kəla ghî à ghaŋso ghə eghùe ghən ki, mò à yò ko ghəa ghəla ghe kə̂aa səā wo alo edzughu.

²⁰ Nu fɔ̂e u Kəzə̀ ù yo ko an dzughu è fughuu zo, u lo an daʼa kəla u ki.

²¹ Ghɛ̀ ləghaa kə̀ kwò à? M̀ bughò â kwùu zò alô ghɛ̀, ŋkāa â ləgha zo am fə̂ŋ è bùghùnlo à?