Bìoball air-loidhne

1 Kòlentìan 3 - To kə Kəzə̀ kə̀ Fughu ko

Kɔ̀ɔ ŋ Kə̀zə̀

¹ Waazə̂ ghaŋa gho, mùgho fə̀ yo dzə̂ alekəaa wo ghəa gho â ghɛ̀ tò aŋghəa Ǹ lo alekə̀aa ndûw â ghì ghəla ghe ki Zuʼ tə̀ Zɔlɔ to, mùgho fə̀ ghəa gho â ghɛ̀ kəaa wo to wɛghêtùghù ghəla fə̂ŋ tə ghee tə lo mo tə kaām nɛɛ dzə̀ aŋ ghəa a Kə̀lestò.

² Mùgho fə̀ ghɛ nii tsəgha alo kəmēlē, à mò yo dzə aŋ fʉ̀ghàzəa ù tughu wo; nu ghɛ̌ fə̀ lo mò ghɛ̀ kaām noo kpe alezə fʉghàzəa ù tughu wo. Alebùʼù bughò tâa wô ko êzə̄ŋ, ghɛ̀ kaām naam bûʼ kpe ko nû alezə fʉ̀ghàzəa ù tughu u te wo.

³ Tɔŋlo enyəa ghɛ̀ naam mùghù ko làŋà kə e mùghù kə ghì a mbī gho. Abugho ghɛ̀ mʉʉ̄n ghue zɛʼɛ zo, buu kəŋgè alo eghùe e fi mgbaŋa dèe ko enyəa ghɛ̀ lo ghî a mbī gho, ghɛ̀ yia ghəə̄ŋ sughò ghəa ghəla ghî a mbī a ghəə̄ŋ kaŋlo.

⁴ Tɔŋlo enyəa abugho ghùw dzɛ̀ tsughu enyəa, “Ǹ lo ghùw ù Pôl.” Ù lòʼ wən dzɛ̀ tsughu enyəa, “Ǹ lo ghùw ù Apolòs.” E fi mgbàŋ yò ko enyəa ghɛ̀ tsô lò ko tò ghî a mbī gho a?

⁵ Apolòs fi lo ndugho a? Pôl vʉ̀a ù lò ndugho a? Ghe ŋkɔ̂ɔ ghɛ̀ mò tsəghà tsughu a bàâ ghee alebùghò boo fughu â Kə̀lestò, mò chìa fə̀ fwaʼā nduw ko fəgha kela Mughu ù te mò fughu â wə̄n enyəa ù fwàʼ.

⁶ À fə̀ fʉgha u te u tam nduw mugho, Àpolòs mo èbvʉnlo, Zə kə̀ ŋ kuūwn ghəəŋ tsughuu enyəa fʉgha u te u noō səā kɔʼ.

⁷ Ghùw wəlà ù taā fʉgha u te wo ŋkāa wəla ù bvʉ̀nlo tso yò dzə̂ fəgha kə li ko, à mìaa ko Kəzə kə ghəŋlo enyəa fʉgha u te u noō səā kɔʼ.

⁸ Ghùw wəlà ù tam fʉgha u te wo lo ko eghala ghèe wəlà ù bvʉ̀nlo, ghe lô chìa tsəa ko kùu ndùw fwàʼ kə wə̄n.

⁹ Tɔŋlo enyəa ghàʼ lo ghî a kəfwàʼ ghàʼ dzeŋe fwaʼā â Zə kò, ghɛ̀ yia kuūwn lô sum u Kəzə wò. Ghɛ̌ yəa lô sugho ndughu è Kəzə.

¹⁰ Mùghò fə̀ ni kɔʼ namso kela Zə kə̀ mò fughu â mùghò, kuʼ kɔʼ kəbəghànlò a te tò baabâ ghùw wəla ù kwo alebəgha, ghùw nùghù vʉ̀a ù bəghāa ezə̄ŋ a te. À sò kǔuwn lò ko enyəa chìa kì aleghòom tsughu an dzì zəla ù bəghāa a te;

¹¹ Nu Zə kə̀ n Yɛso Kə̀lestò nàŋa tən wò tò kəbəghànlò, mò à lò ko kə te ko, fəgha kə li kə yò alekòom kuʼ bəghàan kə li ko.

¹² Abugho ghùw so e bəgha am bə̀ghàan kə te ko, ù lo alenì kɔʼ ndə̀mà tə ufʉgha tə̀ li to tò wən: etsɛ, bvuʼ u nyəghaan wo, kɔ tə atia, ŋkâʼ, àsùghò ghue ko alebəgha a te.

¹³ Fwàʼ kə ghûw ù mɔʼɔ̄ kə e ke deē səa wo ko ghue wo, nu Tsuʼ fəla Kə̀lestò kə bugho a te kê nìi nǎaŋ səa wò ghəa a te gho an tsə̂. Ghe kê dèe fùghuu wò ghəa a te gho an uwə̀n, wən u te wə e ke mɔɔ̄ zuuw tsughu ghu a kəfwàʼ a ghûw ghò.

¹⁴ Abugho fəgha kəla ghùw mò bɔm doʼkè pfʉ an wə̀n u te wo, ghùw ù te kê kelê namso kə wə̄n.

¹⁵ Abugho fəgha kə te kə pfʉ kɔʼ an wèn u te wo, ghùw wəla ù mò bɔm fəgha kə te ko n dòʼke kele kə̀namso, ù n naam kuuwn zə ko kə̀tuw tò ghùw wəla ù nɔ̀səā tsughu alepfʉ an uwə̀n.

¹⁶ À lǒ mò ghɛ̀ məghaa nù enyəa ghɛ̀ lo tsughu e Kəzə̀ à, àsùghò enyəa Zuʼ tə Kəzə̀ tə̀ mughu a zəŋò ghɛ̀ a?

¹⁷ À fi lo enyəa abugho ghùw sàʼ maʼà tsughu ndùghù e Kəzə e ne, Zə kə lo dzûw maʼà tsughu wən; tɔŋlo enyəa tsughu e Kəzə è lo fəgha kə baa ko, ghue e ghùe zɛʼɛ̄ e lo tsughu è wə̄n.

¹⁸ E kwo ghùw lò nɔɔ̄m ghue u wə̄n wo. Abugho ghùw wɛʼɛ ù lì mòʼò enyəa e tɔɔ nù aŋghəa ghî a mbī a nîi a te, ù kì alelo tǒ ghùw ù làʼso, tò ù kè doʼò ghùw ù tɔ̌ɔ.

¹⁹ Tɔŋlo enyəa ghəa zəla mbī kwo enyəa e lò etɔ, e lǒ kənùghnùghù an sə kə Kəzə. Aŋ ghəa Mwàʼsò kə Kəzə kə dzɛ̂ tsughu enyəa, “Zə kə ghî a tɔɔ a bêen kɔ̀ʼɔ ko an tɔ e ghee.”

²⁰ Shwaʼ u Kəzə ù li vʉa u dzɛ̂ tsughu sughò enyəa, “Mughu ù te ù kwo nû enyəa tɔ e ghì ghəla ghe moʼnlò enyəa ghee tɔɔ nù yò dzə̂ fəgha kə̀ li ko.”

²¹ E fi lo enyəa ghùw kì dzə yo aletsɔ̀ fəŋ aŋ ghəa zəla ghî à lô aleghəə̄ŋ ghè zò. Ghəa ghən à dzəm lò â ghɛ̀.

²² Ŋkāa à lò Pôl, ŋkāa à lǒ Apolòs ŋkāa à lò Pità; mbī zən, ŋkāa emughùu, ŋkāa evʉ, ŋkāa tî kən êzə̄ŋ, ŋkāa tî kəla kə ki alebùghò — ghea a te gho a dzə̀m lò â ghɛ̀.

²³ À ghɛ̀ lo a tsəlà Kə̀lestò, Kə̀lestò vʉ̀a ù lo a tsəlà Zə̀ kò.

« Roimhe

Air adhart »

2020

Lean sinn:

Ceanglaichean taic

Sanasan