Bìoball air-loidhne

1 Kòlentìan 16 - To kə Kəzə̀ kə̀ Fughu ko

Ghəa à fughuu a kəfəgha gho â ghì ghəla ghe boō fughu tsughu

¹ Êzə̄ŋ kùu ndùw fəghàa fə zuūŋ fo aletɔ̀ɔm ndûw ghì à Kəzə ghəla ghe lo am mbùʼ e Dzùdîa, ghɛ̀ e bɔɔm ghəəŋ nduw ko ghəa ghəlà mùgho mò dzɛ̂ naŋā an dzeŋe kə ghì a Kəzə̀ an naʼ e Gàlashìa.

² Ghɛ̀ naŋa tsughu Tsuʼntsə̄ wə ŋkalà wò tò tsuʼ fəla chìa wɛʼɛ ki alenaaŋ səa kɔʼɔ fəghà fo am fəgha kə ù kele tsəgha, e kwo ghɛ̀ lô kôom chuūw zeē fəgha ko abugho M̀ bugho.

³ Abugho Ǹ lo nyə wo, ghî ghəlà ghɛ̀ lo shîaa kɔʼɔ̄, Ǹ lo tɔɔ̄ tsughu mwàʼsò kə̀ dzûŋ kò an tuw u ghee, Ŋ̀ kê tuū ndûw ghee â mwàʼsò kə te ko àsùghò fʉgha vʉa ghɛ̀ zûuŋ tsughu â ghì a Kəzə̀ ghò an naʼ e Dzɛ̀lusālɛ̀m.

⁴ Abugho e mô dzɔ̂ɔ enyəa to M̀ mô ndûuw sughò, ghàʼ à ghee lo dzeŋe ndûw à dzəm.

Tsʉ̂ zəla Pôl fughu gûŋsò tsughu

⁵ Ǹ lô fì alô ghɛ̀ bughòo sùghò mò Ǹ nughù dàŋso wò am Màsɛ̀donìa, nu Ǹ ləghaa aletsəghàa wô dzə̂ dzì a fughu.

⁶ Sòmkwò Ǹ lo bùghò dòʼn nǔ fì êzə̀ sɛ̀ tò fwôo è kê buʼù bughò chîaa, tò ghɛ̀ lo nəəŋ təma kɔʼ mugho alo kəfəgha tò Ǹ ndûw tɔ̂ɔm ndûw ùghue a te fiā Ǹ nduūw.

⁷ Nu Ǹ ləghaa yo alekòʼ ghɛ̀ êzə̄ŋ mò Ǹ tsəghàa dàŋso dzì, M̀ moʼò aletsoō bughò doʼò kəŋo ndûw fì êzə̀ sɛ̀ an də̀ghà kə kəghāa, abugho Mughu ù te kê boō dzə̄.

⁸ Ŋ̀ kuuwn dòʼn ko fɛ̄ am Ɛfɛ̄sùs to nəgha e zə kə Pɛntɛ̄kɔ̀st è lo kpeē tsughuu dzə̂.

⁹ Ghəa ghî à kətūw ghaŋā a bûʼ lô ko fɛ ndə̀m, ghəa a lo dzɔ nû fɛ an dziī zəla ghùw lò alemūʼn fwaʼà dzɔ̂ɔ tsughu fwàʼ kə səŋò kò a te.

¹⁰ Abugho Timotì kpaʼ būghō fì êzə̀, ghəəŋ tsughu nlò enyəa ghɛ̀ ni naŋa tsughuu wə̄n aŋ ghu kə̀ dzûŋ kò am bvʉ̄a zɛʼɛ̄, tɔŋlo enyəa ù fwàʼà Mughu ù te, aŋghəa M̀ bɔɔ̄m fwaʼà sugho â Mughu ù te.

¹¹ E kwo ghùw lò so e koʼòkèe wə̄n. Ghɛ̀ lo bɔɔm təma zəghāa kɔʼ sugho wə̄n kədzûŋ, aŋghəa ù bùghò ebàm alebùghò kôʼ mùghò; nu M̀ fɛ lə̄əm wə̄n ghàʼ à ghêe waazə̂ a sɛ̀ li ghən.

¹² Yia abugho wàazə ù sɛ̀ wən Àpolòs, mùgho mò buʼ səso tsughu kəghu enyə â wə̄n enyəa ù bùghò bwîin kôʼ ghɛ̀ ghèe ghê waazə̂ à li ghən, ù ŋ kuuwn ŋgə̄msō ləghaa yo alebùghò èzə̄ŋ. Abugho ù lo kele tsughu nəgha zo, ù lo bùghò bwìin kòʼò nù ghɛ.

¹³ Tiso kɔʼ nlò tuw ko e dzūŋ, tɔ̀ʼɔ tee tsughu nlò aŋghəa zəla ghɛ̀ gaʼ fəŋ a te, kǎ nlò ghəa zo e tsəŋo, e tughuu nlò.

¹⁴ Ghəa ghəla ghɛ̀ ghəŋlo a dzəm, ghɛ̀ è ghəəŋ nduw alo eləgha.

¹⁵ Êzəŋ a waazə̂ ghò, ghɛ̀ kwo nû enyəa kèndughu kə Stɛ̀fanàs kə mò lo ghî a sûesʉ gho alefə̀là doʼò wô ghì a Kə̀lestò aŋ Àkaeyà, ghe yia gaʼ ten tsughu sugho fə̀ŋ è ghee alefwaʼā â ghì a Kəzə ghò.

¹⁶ M̀ buʼu kəghu enyəa to ghɛ̀ mô zǔuw ndùw â ŋgòʼ è ghì ghən, àsùghò ghì ghəla ghe təmādzəə̄ŋ wô ghɛ am fwàʼ kən, ghe n dəmà tə̀la tsughuu sùghò alefwaʼā nduw fwàʼ kə te ko.

¹⁷ Ǹ duʼn nù aŋghəa Stɛ̀fanàs bùgho, àsùghò Fòtùnatùs, àsùghò Akaekùs; boʼ ghe m bùghò fwàʼ fughu fwàʼ kɛʼɛ ko;

¹⁸ Tɔŋlo enyəa ghe bughò nùmsò kɔ̌ʼ kàŋ zaŋa, àsùghò è zɛʼɛ. E koʼōkɛ̄lɛ̄ nduw nlǒ ŋgòʼ è ghì ghən.

¹⁹ Dzweŋe u ghì a Kəzə̀ wəla u lo am mbùʼ è Ɛshìa tùm wò ghɛ̀ â tɔɔŋ zo. Àkuilà àsùghò Pə̀leskà, tum wò ghɛ̀ à tɔɔŋ zo am fə̀ŋ e ghee e dzə̀m ghèe ghê ghì a Kəzə ghəla ghe bughò dzeŋe an ndughu alô ghee an zən e Mughu ù te.

²⁰ Waazə̂ a sɛ̀ ghəla ghaʼ à ghee lô fɛ a dzə̀m tum tɔɔŋ wò ghɛ̀. Tɔ̀ʼɔ tɔɔŋ zuw tsughu nlò ghue zɛʼɛ zo aŋ ghəa à dzûŋ ghò tò ghî Kə̀lestò.

²¹ Zən kuuwn lò tɔɔŋ zaŋa mùghò Pôl, Ǹ tɔm tsughu aŋ ghu kaŋā.

²² Tsû ù lo â ghùw wəla ù tue maʼà aleləgha Mughu ù te. Bùghò a Mughu ù te!

²³ Ŋ̀ gôŋlò enyəa to Mughùbè Yɛso mò dê ghɛ̀ â dzɔ̀ e wə̄n zo.

²⁴ Ǹ ləghaa ghɛ̀ a dzə̀m aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò Yɛso. Zə e lo ko êzə̀.

« Roimhe

Air adhart »

2020

Lean sinn:

Ceanglaichean taic

Sanasan