1 Kòlentìan 15 - To kə Kəzə̀ kə̀ Fughu ko

Ghəa a Kə̀lestò à kɔʼɔ səa gho alo evʉ̄

¹ Êzə̄ŋ a waazə̂ ghò, Ǹ so Ǹ zə̂əŋ wô ghɛ̀ an làbəlà zəla mùgho mò bughò naʼà wo â ghɛ̀, ghɛ̀ n zùw è naŋa, ghɛ̌ yia bɔɔ̄m ti ko a te.

² Zən lǒ làbəlà zəla è lo ghəŋlo Zə̀ kə̀ lo bəghāsə̄ ghɛ, abugho ghɛ̀ tɔ̂ʼ kwu kele tsughu shwaʼ wəla mùgho mò bugho naʼa, buw êzè, à f lo enyəa fəgha kəla ghɛ̀ moʼò enyə ghɛ̀ mò boo fughu a te fi lo kènughùnùghù.

³ Mùgho mò â ghɛ̀ dzɛ wo fəgha kəla mùgho fə̀ kele sugho tò ghəa è səŋò e sûesʉ zo: enyəa Kə̀lestò fə̀ kpuw bòʼ bòo tə sɛ̀, aŋghəa ghe tɔm naŋa am mwàʼsò kə Kəzə̀

⁴ enyəa ghe n tsəla tsughu wə̄n, àsùghò enyəa tsùʼu m mô kpeē tsughu ntəgha, Zə̀ kə̀ n zòm nùghù kɔ̌ʼ wə̄n alo evʉ̄, aŋghəa mwàʼsò kə Kəzə kə dzaā,

⁵ asùghò enyəa ù maā an sə kə Pità gbə̂nsə kɔ̀ʼ, bùghò gbənsə kɔ̀ʼ sùghò an sə kə tum tən èghəm à ghè tò tə bəghà.

⁶ Ù n daŋso bùghò gbə̀n sə kɔʼ an sə kə aghì mo ghe n tsəghàsə bɔm to tə tɛ̀ enəghā e mɔ̀ʼ, ndə̀m è ghe e lì nǎam lò nû â tuw ko, aŋghəa e lô ko enyəa à li a mafə kpuw.

⁷ Ù n daŋso gbə̀nsə kɔʼ sùghò an sə kə Dzɛ̂ms, daŋso bùghò gbə̀nsə kɔʼ an sə kə tətūm tə dzə̀m.

⁸ Mò n lo ghùw wəla ù gbə̂nsə gûŋso tsughu an sə kə wə̄n, mùghò wəla ghe fə̀ tsô vûuŋ dzə wô ko enyə mo nəgha è dzəa e mugho e kaām kpe dzə̀.

⁹ Nu am fwàʼ kə tum tə Kə̀lestò, Ǹ lo wɛ̂ɛtùghuu a zəŋò tum to tə dzəm, mò Ŋ̀ kâ bùʼ kɔ̀ʼkpē to ghe e tɔŋɔ enyəa à lǒ tum è Kə̀lestò, bòʼ mùgho mò ndzaŋso kaaŋ tsəgha dzeŋe kə ghì a Kəzə̀.

¹⁰ M̀ fɛ kuuwn lò ko fəgha kəla Ǹ lo ghè kò bòʼ dzɔ̀ e Kəzə. Dzɔ̂ zəla Zə̀ kə mò dê wo â mùghò, kə ka mo sâaŋ màʼà dzə̀. Mùghò ŋ kòom kuuwn biso fwàʼ tsəghà tsùghu ghee a dzəm, à mò buʼ yo mugho, à mò lo dzɔ̂ e Kəzə zəla e lo a zəŋò mùghò.

¹¹ Ŋkāa à mò kəaa wo mugho ŋkāa à mò lo ghee, kən lò fəgha kəla ghǎʼ mò kəaa ghè kò, yìa à lò fəgha kəla ghɛ boō fughu tsughu a te.

Ghəa à kɔʼɔ səa gho alo evʉ̄

¹² Abugho ghî naʼn kaŋlo aŋghea ghe mô zôm nughù kɔʼ Kə̀lestò a te alo evʉ̄, ghɛ̀ à li a lo ênzə̂n aledzaā enyəa ghî à lo kɔʼɔ səa yo alo evʉ a?

¹³ Abugho ghî à mô kpuūw kɔʼɔ səa yo alo evʉ̄, to ghe ka mō Kə̀lestò zôm nùghù kɔ̀ʼ dzə̀.

¹⁴ Abugho ghe mò dôʼkè zôo nughù kɔʼ Yɛso alo evʉ, à fi lo enyəa shwaʼ wəlà ghàʼ naʼn wô fɛ, u lo kə̀nughùnùghù, àsùghò enyəa fə̀ŋ zɛʼɛ zəla ghɛ̀ gaʼ a zəŋò Kə̀lestò lò sugho kə̀nughùnùghù.

¹⁵ Abugho e lo êzè, à fi lo enyəa ghàʼ kaʼnlo àgha aŋ ghəa ghəla ghàʼ naʼn wô fɛ kùu ndùw Kə̀zə̀, bòʼ enyəa ghàʼ teso dzàa wò enyəa Zə̀ kə mò zom nughuu kɔʼ Kə̀lestò alo evʉ̄, mo kə ka fə ghəəŋ dzə̀ êzə̀, abugho e lô dzə êsəŋò enyəa ghe zôo nùghù kɔ̀ʼɔ ghî gho alo evʉ̄.

¹⁶ Nu abugho ghe zôo nughùun kɔʼɔ yô ghî ghò alo evʉ̄, ghe ka fə Kə̀lestò fi zôm nùghù kɔ̀ʼ sùghò.

¹⁷ Abugho ghe mò dôʼkè zôo nughù Kə̀lestò, ghɛ̌ fə̂ŋ fi gaʼ màʼà a zəŋò wə̄n kə̀nughùnùghù, àsùghò enyəa ghɛ̌ fi naam mùghù ko aŋ ghəa à biigh gho.

¹⁸ À fi lo sugho enyəa ghî ghəla ghe kpuwnlō mo ghe boo fughu à Kə̀lestò fi kwəlà sàaŋ nù.

¹⁹ Abugho à lò enyəa tùʼ zəla sɛ̀ chiī â Kə̀lestò mìaa ko fɛ am mbī zən, à fi lo ghî a ki alekwuso èse a zəŋò ghe tsəghàa taʼà sə aŋghəa ghe kwuso a zəŋò ghì à li ghə̀n a dzə̀m.

²⁰ À kǔuwn lò èsəŋò enyəa ghe maā Kə̀lestò alo evʉ̄ zôom nùghù kɔ̀ʼ, aledèe tsughu enyəa ù fə̀ lo ghùw sûesʉ aŋ ghì à kpuuwn gho ghe fə̀ zôm nughù kɔʼ alo evʉ̄.

²¹ Tɔŋlo enyəa aŋghəa vʉ e fə̀ am mbī bugho am bàm e ghùw u mɔ̀ʼ; à lò sùghò eghala am bàm e ghûw u mɔ̀ʼ ghî à lo kɔʼɔ̄səā alo evʉ̄.

²² Tò aŋghəa ghî ghən a dzə̀m lo kpuwnlo aŋghəa ghe mò lô fəgha ko kə mɔ̀ʼ ghèe ghê Adàm, à lò sùghò eghala ghî ghə̀n a dzə̀m lo doʼn wo ebàm â tuw ko aŋghəa ghe lô fəgha ko kə mɔ̀ʼ ghèe ghê Kə̀lestò.

²³ À sò lò ko enyəa aghî a dzə̀m kè kì ko nəgha e ghee abugho ghe kê zôo nughùun kɔʼɔ ghîi gho alo evʉ̄; Kə̀lestò lǒ ghùw ù sʉ̂esəʉ, ghî ghəla ghe lô ghî a wə̄n gho kè daŋso dzûum ndûw wə̄n.

²⁴ A kê bughò an tî kə te ko, abugho ù kè dzûw maʼà tsughu dwə̀ŋ u mbī wo, àsùghò zə̀a m bǐigh məla n saʼā mbī zen, àsùghò dwaʼa wəla u lô fɛ am mbī; ù kè daŋso nîi fughuu tsəghàa ndùw fɔe u te wo u dzəm â Zə̀ kò tɔɔŋ Tsele.

²⁵ Nu Kə̀lestò tèlè ki ko alezə ndàŋ è kədə̀ŋ e wə̄n alendùw tâa tsughu an tì kəla Zə̀ kə̀ kê nîi naāŋ wô ghîikətuw a wə̄n gho a tsəla efwēe e wə̄n

²⁶ Ghùwkətuw wə ebàm wəla ghe kê ki aletəmazəa mɛʼɛ̀ kɔʼɔ̄ lo evʉ.

²⁷ Tɔŋlo enyəa Mwàʼsò kə Kəzə kə̀ dzɛ̂ enyəa, “Zə kə n naŋa fʉgha wo u dzə̀m enyəa Kə̀lestò gaʼnlo aghuw a te.” Abugho a dzɛ tsughu enyəa, “Ufʉgha u dzə̀m.” E fi dêe dzə yo enyəa a taŋ dzəŋlo â Zə kò a te. À lò Kəzə̀ kə fughu fʉgha wo u dzə̀m enyəa Yɛso gaʼnlo aghuw a te.

²⁸ Abugho fʉgha wən ù dzə̀m bùghò doʼò tsughu a tsəlà wə̄n, ghuūghùe u Wɛ̀ ù te u lo daŋso doʼò tsughuu sughò a tsəlà Zə̀ kò, kəla kə naŋā fʉgha wən ù dzəm a tsəlà Wɛ ù wə̄n, enyəa à mìaa ko Kə̀zə̀ alo aghəa a dzə̀m, chia kə lɛnlo â ghəa gho a dzə̀m.

²⁹ Abugho e mô lo enyəa ghe zôo nùghùu wò yò ghî ghò alo evʉ̄, e mô so e moʼnlò êndughō alenì mùghù ŋ Kə̀zə̀ a an zə e ghì à kpuuwn gho a? Abugho à lò èsəŋò enyəa ghe tso yò dzə̂ alezòo nughù kɔʼ ghîikpuuwn gho alo evʉ̄, ghî à sô mùghù ŋ Kəzə n nîi kwò an zən a a ghee à?

³⁰ Â ghàʼ sughò, à sò lǒ kə kwo ghàʼ sô naāŋ ghue zaʼa zo an utsù nəgha tən tə̀ dzə̀m a?

³¹ Ǹ lo ko an dzughu zə evʉ̄ an tsuʼu mən n dzə̀m, tò aŋghəa Ǹ tsɔɔ̄ fə̀ŋ a te a zəŋò ghɛ̀ aŋghəa sɛ̀ lô fəgha ko kə mɔ̀ʼ sə̀ à ghê Mughùbè ù sə̀ Kə̀lestò Yɛso.

³² Abugho e mô kpɛʼɛ lô enyəa M̀ mafə ŋgè kə bu ghàʼ à ghê nyòm tə ŋgwən to, aŋghəa ghî à buʼù nîi ko ghəa gho a te, M mô a te so e zəa kɔʼɔ kə̀ kwò? Abugho ghe yò alezòo nughù kɔʼ ghî à kpuuwn gho alo evʉ̄, ghən lò ghəa ghəla ghî à li a dzâa tsughu enyəa, “Bùghò nlò tò sɛ̀ zə, a mʉ, tɔŋlo enyəa sɛ̀ lo kpūuwn nù tsʉtsʉ.”

³³ E kwo ko ghùw ù lì lô bughò sêe məŋso tsughu ghɛ̀, “Fən à biigh a boon màʼn ghùw ù dzùŋ.”

³⁴ Kwən nyə̀ wò nlò an tɔ wɛʼɛ ù səŋò wò, ghɛ̀ ka ghəa à biigh a kôom ghə̌əŋ sùghò. Ghɛ̀ â li a kwo dzə yo Zə kò. Ŋ̀ ghəa ghən â ghɛ̀ kə̂aa wò enyəa Ǹ dənsò tsughu tuw kɛʼɛ̄.

³⁵ Ghùw ù lì nǎam bvʉa tsughuu ko nù enyəa, “Ghe ghùwkpǔuw zôo nùghùun kɔʼɔ ênzə̂n alo evʉ̄? Ghe sô yia boʼò ki ŋgòʼ e gwen e ughùe è ghɛ̀ zo a?”

³⁶ Ghùw ù te boʼò làʼsò ênzə̂n! Abugho ghù tam tsughu fəgha ko, kə yo alefùuw səā kɔʼ, à gɔ̀ʼɔ̀ mo kə kpuw tsughu nû.

³⁷ Fəgha kəla ghù taā ndûw sugho, kə bûʼ yò dzə̂ aŋ gwən e ughùe tò kəla kə fûuw sə kɔʼ, abugho à tsò lò ko sə e kue ŋkāa sə e fəgha kə li ko.

³⁸ Zə kə̀ ŋ kuuwn fughu tsughu sə e fəgha kə te ko â gwən e ughùe zəla kə tsəm tsughu, fughuu ndùw ko ŋgòʼ â gwən e ughùe e wə̄n zo.

³⁹ Gwən a ughùe a dzə̀m à yo dzê alo eghəla e mɔ̀ʼ, ghî à ki ŋgòʼ e mɔ̀ʼ, nyôm tia tə ki è ghee, nwən mìa ŋ ki e ghee zo sughò, tsəghaa tia tə ki sugho è ghee.

⁴⁰ Gwən a ughùe a fʉgha u kəwālā lo nû, a fʉgha u ghueekətsə̄ yia a lô sugho; nyəghanlo e kòʼ e fʉgha u kəwālā e lo nəŋ, e fʉgha u ghueekətsə̄ zəa e lô sugho nəŋ.

⁴¹ Bâŋ zə ezūuw e lo nəŋ, bâŋ e dzɔ̄ŋ zəa e lo sugho nəŋ, bâŋ zə nsə̀ghàbəlà zəa e lô sugho nəŋ; Sə̀ghàbəlà mìa n lò sugho êzə mò chìa kì nduw ko bâŋ e wə̄n nəŋ.

⁴² Ghən lò ghəa ghəla a kê bɔɔ̄m lo a te abugho Zə̀ kə̀ zôo nughùun kɔʼɔ̄ ghî ghò a te alo evʉ̄. Fəgha kəla ghe tam nduw kə fîaa nù, kəla ghe nî sə kɔʼ wo kə fîaa dzə yò.

⁴³ Abugho ghe taā nduw, zə n laan yo alekòʼò ndûw, à m bùghò ghe nî sə kɔʼ wo, zə ŋ ŋgee lanlo alekòʼò ndûw. Abugho ghe taā nduw, ghə n tughu yo, à m bùghò a noō sə kɔʼ wo, ghə n tughuu dzɔ̀ ki sugho esə̂ŋ.

⁴⁴ Abugho a tam nduw, a taa nduw ko gwen e te zo, à m bùgho e fûw sə kɔʼ wo, Zuʼ tə Kəzə̀ tə n nyəən tsughu a zəŋo ghè zò. Abugho gwən e ughùe è lo, ghue wəla u ki Zuʼ tə Kəzə̀ tò n lo sugho.

⁴⁵ Zən lò e ghee ghe tɔm tsughu enyəa, “Ghùw ù sûesʉ, Adàm, m bùghò dòʼò wò ghùw wəlà ù mùghu am mbī.” Adàm wə̀ ebàm wən bùghò dòʼò wò Zuʼ tə Kəzə̀ təla tə fughuu mughù zò.

⁴⁶ Zuʼ tə̀ Zɔlɔ tə kɛ fə bughò dzə̀ esə̄, à fə̀ sə kə bugho ghùw sěe Zuʼ tə̀ Zɔlɔ tə sô bughoo.

⁴⁷ Ghe fə̌ ghùw ù sûesʉ wən bɔm sə kɔʼ alo təzùʼ, ù lò ghueekətsə̄. Ghùw ù ebàm wən n sə tsùghù wo alo kəwālā.

⁴⁸ Tò aŋghəa ghe fə̌ ghùw ù sûesʉ bɔm sə kɔʼ lo təzùʼ, aghî a dzə̀m fi lo sugho təzuʼ. Ghî ghəla ghe lo alo kəwālā bɔɔm lò sugho tǒ ghùw ù sûesʉ wəla ù fə̀ sə tsughu wô alo kəwālā.

⁴⁹ Tò aŋghəa sɛ̀ bɔɔ̄m lô sugho tǒ ghùw ù sûesʉ wəla ghe fə̀ bɔm sə kɔʼ alo təzùʼ, sɛ̀ kê bɔ̌ɔm lò sugho tǒ ghùw wə̀ ebàm wəla ù fə̀ sə tsughu wô alo kəwālā.

⁵⁰ Fəgha kəla ŋ kəā ghe kǒ a waazə̂ ghaŋa gho lo enyəa, fəgha kə təkàŋ kə yo alenyə am fɔ̀e u Kəzə, fəgha kəla kə yo alefìaa kôʼ yo dzə̂ alezə bəla e fəgha kəla fə lo alelo alefìaa.

⁵¹ Kòʼo nlò! Natò Ǹ dzâa wô ghɛ̀ â nàn kə eghəa kə li ko! Sɛ̀ ghən a dzəm lo kpuuw mɛ̀ʼn yo, a lo kuuwn tsòo dzeŋe nùghùun kǔuwn kɔʼɔ ko èkòʼ enyə alo enəgha e mɔʼ tsuetsue, tò abugho a mwɛ̂ɛn tsughu se gho, abugho mbuwlì kè kùm guŋù sə wo.

⁵² Nu abugho mbuwlì è te kê kûm sə wo, ghî à kpuwnlo a kê zôo nughùu wô, ghe doʼò təla wô â tuw ko, kôʼ e ghee e kê kuūwn kɔʼɔ̄ sughò.

⁵³ Tɔŋlo enyəa gwən zəla e boō mianlo kê kuūwn kɔʼ kôʼ e wə̄n zo alô n zəla e yo aleboō mîaa kôʼ. Gwən zəla e kpuūw sugho kè kuūwn kɔʼ alô n zəla e kê kpuūw koʼò tsəghà yo.

⁵⁴ Abugho gwən zəla e boō mianlo kê kuūwn kɔʼ kôʼ e wə̄n zo alô n zəla e yo aleboō mîaa kôʼ, àsùghò enyəa gwən zəla e kpuūw sugho kè kuūwn kɔʼ alô n zəla e kê kpuw kôʼ tsəghà yo, à fi lo enyəa shwaʼ wəla ghe tɔm naŋā am mwàʼsò kə baa ko ke lo êsəŋò enyəa, “Zə̀ kə̀ n vʉ e tughu tsəghà!”

⁵⁵ “O vʉ zo, dwaʼa wʉ̂a ù wɛ̂ɛ alekòom təma zə aghî a te a? O vʉ zo, fən zəghà zəla ghùw təghaa ghî ghò a te zɛ̂ à?”

⁵⁶ Vʉ e daʼa kə wə̄n kə kele am bo zəla ghùw ghəə̄ŋ tsughuu. Lâŋ chia kə fughuu bo zo.

⁵⁷ Sɛ̀ ki alefughuu zɔ̀ɔŋ kə Kəzə aŋghəa kə fughu tsughu sɛ̀ â daʼa ko aletughuu tsəghà evʉ àsùghò bo zo am bàm e Mughubè ù sɛ̀, Yɛso Kə̀lestò.

⁵⁸ Waazə̂ ghaŋa ghəla Ŋ̀ ŋgeē ləghaa, tɔ̀ʼɔ tee tsughu nlò, e kwo ko fəgha kə̀ li kə lô noʼsò ghɛ. Ghɛ̀ fughu nduw ghue zɛʼɛ zo alefwaʼā ko â Mughu ù te, ghɛ̀ e kwo tən enyəa fwàʼ kɛʼɛ kəla ghɛ̀ fwaʼā â Mughu ù te yo dzə kə̀nughùnùghù.