1 Kòlentìan 14 - To kə Kəzə̀ kə̀ Fughu ko

Ndə̀mà tə aghəa kùu ndùw fughu kəla Zuʼ tə̀ Zɔlɔ tə fughuu

¹ Ghəəŋ tsughu nlò enyəa ləgha e doʼò tsughu fəgha kəla ghɛ̀ kəŋo ghè kò, dəmà tsùghu sùghò kəla Zuʼ tə̀ Zɔlɔ tə fughuu â ghì gho, a ka dɔ̂m taŋ fughu kən enyəa ghɛ̀ è lo aledzaā shʉ̀ghà u Kəzə̀ wò.

² Ghùw wəlà ù bə̀ən kə̂aa ghəa gho an shwàʼ ù li wo enyə, ù ghəa a kə̂aa wò dzə yò â ghì ghò, ù kəaa ndùw â Zə kò, nu ghùw ù yo alezuūwkɛlɛ fəgha kəla ù kə̌aa ghè kò. Ghùw ù te nàn tə aghəa tə te enyə kə̀a wò mò à ghə̌əŋ tsughu Zuʼ tə̀ Zɔlɔ to.

³ Abugho ghùw kuūwn dzâa shʉghà u Kəzə̀ wò, ù dzàa wò â ghì ghò, aletughusō tsughu ghee, dzə̀n tsùghù sùgho ghee â sə̀ŋ zò, tsəmso tsùghù sùghò ghee.

⁴ Ghùw wəlà ù bə̀ən kə̂aa ndûw ghəa gho am shwaʼ ù li wo enyə yôsò kô ghue u wə̄n, wə̄n wəla ù kuūwn dzâa shʉghà u Kəzə̀ wò, ù yòsò dzeŋe kə ghì a Kəzə̀ enyəa ghe məla tsughu am fə̀ŋ è ghee zəla ghe gaʼ tsughu a zəŋò Zə̀ kò.

⁵ Ǹ ləghaa enyəa ghɛ̀ a dzəm è bəən saʼa shwaʼ ù li wə̄n, yìa Ŋ̀ kuuwn ŋgeē ləghaa enyəa ghɛ̀ è biso dzaā tsughuu shʉghà u Kəzə̀ wò. Ghùw wəlà ù dzàa shʉghà u Kəzə̀ wò tsəghàsə ghùw wəlà ù bə̀ən kə̂aa ghəa gho shwàʼ ù li wo, à gɔ̀ʼɔ̀ mò ghùw fəghaan teso dzɛ̀ wò nù ghəa a te gho â ghì gho, tò ghəa a te a lo aleghəŋlo dzeŋe kə ghì a Kəzə̀ kə̀ məla tsughu am fə̀ŋ zəla ghe gaʼ tsughu a zəŋò Zə̀ kò.

⁶ Êzəŋ a waazə̂ ghò, abugho M̀ bughò kaʼ wô kə̂a ghɛ̀ â ghəa gho an shwaʼ ù li wo mo ghɛ̀ zuuw yo, e sô yòsò nù ghɛ aŋ ghəa è li zo a, mò à gɔ̀ʼɔ̀ ko yo abugho M̀ bugho â ghəa è li zo alebùghò dzɛ̂ â ghɛ̀, ŋkāa Ǹ dêe fughu wô ghɛ â ghəa zəla Zə̀ kə̀ ləgha enyəa ghɛ̀ kele, ŋkāa Ǹ dzɛ̂ wô ghɛ â shʉ̀ghà u Kəzə̀ wò, ŋkāa M̀ mô fùghuu wò ghɛ̀ â tsʉ̀ zò.

⁷ À lò sugho eghala am fʉ̀ghà ù buʼu wəla u ki yô mughù zò, tǒ ndɔ̄ŋ ŋkāa kəbôm, abugho nəŋònəŋ tɔʼɔ̀ dêe səā kɔʼɔ̄ yo an dzə te ghee, ghùw lò ênzə̂n alekēlê bən zə̄lā ghe buʼū lo a?

⁸ Abugho mbuwlì dòʼkè tɔʼɔ̀ kûu səā wô aŋghəa ghî à lo alezuūwkɛlɛ, ghe lo alekele ênzə̂nà enyəa ghe ki alendzùuŋ tsughu ghue e tsam lo a?

⁹ À fi lo enyəa aŋ ghùe zɛʼɛ̄, abugho ghùw wɛʼɛ ù lì kə̀aa ghəa gho n shwaʼ ù nughù wò mo ghî à zuuwkɛlɛ yo, ghùw lò ênzə̂n alekelê fəgha kəla ù kə̌aa ghè kò a? Ghùw ù te fi kêaa àghəa â kuɛ̌ɛ ko

¹⁰ Saʼà tə lo fɛ am mbī ndza, ù li u yo dzə̂ a te mo ghî a te a zuuwkɛlɛ yo ghəa ghəla ghî a ghee à li a kəaa.

¹¹ Abugho Ǹ sô kuūwn zuūwkɛ̄lɛ̄ yo shwaʼ u te wo, M̀ fi lo ghùw ù kətum â ghùw wəlà ù kə̀aa ghəa gho an shwaʼ u te wo, ghùw ù te vʉ̀a ù lò sugho ghùwkətūm â mùghò.

¹² Ghuūghùe zɛʼɛ̄ zə e lo sugho êzə̀; aŋghəa ghɛ̀ muʼū â mbuuw mò alekelê fughu kəla Zuʼ tə̀ Zɔlɔ to, ghɛ̀ è dəma təla tsughuu alekelê fughu kəla kə lo aleghəŋlo enyəa dzeŋe kə ghì a Kəzə̀ kə̀ e nomlo a te.

¹³ À fi lo enyəa ghùw wəlà ù saʼā shwaʼ wə enaʼ ù nughù wò kì alegɔ̀ŋlò enyəa Zə̀ kə̀ fughu wə̄n â daʼa ko aleteso dzaā wo fəgha kəla ù kə̌aa ghè kò.

¹⁴ Nu abugho Ŋ̀ gɔ̂ŋlo an shwaʼ wə enaʼ ù nughù wò mo ghî a zuuw tɔɔ yo, fèŋ zaŋa ŋ gɔ̂ɔŋ sùghò, tuw kaŋa kə ŋ kuuwn yò aŋ ghəa ghəla Ŋ̀ kəaa.

¹⁵ Ǹ lo aleghəŋlo êndughō? Ǹ lo e gɔɔ̄ŋ tsughu am fə̂ŋ zaŋa, gɔ̀ɔŋ tsùghù sùghò aŋghəa Ǹ zuūwkɛlɛ tsughu a te. Ǹ lo e zoo tsughu ghəa gho am fə̂ŋ zaŋa, zoo tsughu sùghò ghəa ghəla Ǹ zuūwkɛlɛ̄ tsughuu.

¹⁶ Abugho ghù gɔ̀ɔŋ ko Zə̀ kò am fə̂ŋ zə̀ghà, ghùw wəlà ù lǒ tò ghûwkətum lo ênzə̂n aledzàa tsughu enyəa “Zə e lo ko êzə̀.” Aŋghəa ghùw fughuu zɔ̀ɔŋ kò â Zə̀ kò aŋ gɔ̀ɔŋ zə̀ghà mò ù zǔuwkɛlɛ yo ghəa ghəla ghù dzàa səa wo a?

¹⁷ To ghù kǔuwn kpuwso fughu ko nu zɔ̀ɔŋ â Zə̀ kò, mo e kuuwn yòsò yǒ ghùw ù lǐ vʉ̀ enyəa noo.

¹⁸ M̀ fughûu kə̀zɔ̀ŋlò â Zə̀ kò enyəa Ŋ̀ kə̂aa nù ghəa gho an shwaʼ ù li wəla ghî à zuūwkɛlɛ yo tsə̀ghàsə̀ a dzəm.

¹⁹ An dzeŋe kə ghì a Kəzə̀, â mùghò alekə̀aa tsughu kam tə aghəa eghə̄m an shwaʼ ù li wo mo ghî à zuuwkɛlɛ yo, to M̀ biso kə̂aa səā wô kô sə gho aghəa a tɛ mò a kwuu èghəa aletsʉ̀a ndûw ghì à li ghən a te.

²⁰ Waazə̂ ghaŋa gho, kà nlò è moʼn dzə̄ ghəa gho tò wɛghêtùghu. Ghɛ̀ doʼo tsughu ko nlò tò wɛghêtùghu aŋ ghəa à biigh gho, nu ghə kwo yo nəŋònə̄ŋ aŋ ghəa è dzûŋ zò ŋkāa è biigh zo. Ghɛ̀ kuuwn ghînoo gho an dziī zəla ghɛ̀ moʼn ghea gho a te.

²¹ Ghe tɔm tsughu am mwàʼsò kə kəlàŋ enyəa, “Mùghò Mughu ù te Ǹ dzɛ̂ enyəa, Ǹ tsəghàa tsùghuu a bàâ ghì ghəla ghe kə̂aa saʼà tə tənàʼà tə̀ nughù tò àsùghò a bǎà tùu tò alekə̀a àghəa â ghì ghaŋa gho. Mò abugho M̀ bûʼ kə̂a ndûw ko ghəa gho â ghee êzə̀, ghe lo zuuw yo â mùghò.”

²² Alekəaa ghəa an shwaʼ ù li wo mo ghî à zuuwkɛlɛ yo lo tsə̌a â ghì ghəla ghe doʼkè boō fughu â Kə̀lestò, à yò dzə tsə̌a â ghì ghəla ghe boō â Zə̀ kò. Aledzaā shʉghà u Kəzə̀ wò lǒ tsə̌a a ghì ghəla ghe boō fughu â Kəlèsto, e kuuwn yo dzè tsə̌a â ghì ghəla ghe doʼkè boō fughu â Kə̀lestò.

²³ Abugho ghî a Kəzə̀ à bughò zûuŋ tsughu a dzə̀m, ghee a dzə̀m yo kə̂aa kaāŋ ghəa gho an shwaʼ ù li wo mò ghùw ù ghee u mɔ̀ʼ yò alezuūwkɛlɛ̄, ghùw ù nughùnùghù vʉ̀a ù kpaʼ ndûw nyə wo fughu ŋkāa ghùw mò ù kaam boo fughu â Kə̀lestò, ghe so dzàa yò enyəa tuw u ghee wə bosə a?

²⁴ Abugho ghee a dzəm kuūwn dzâa shʉghà u Kəzə̀ wò, ghùw wəlà ù dòʼkè boō fughu ŋkāa ghùw ù nughùnùghù vʉ̀a ù ndùw nyə wo fughu, ghe sò zǔuwkɛ̄lɛ̄ nǔ ghee, ghəa a te ghəla ù tɔ kɔʼ sô kɔlɔ̀ tsughu wə̄n aŋ ghəa a wə̄n à biigh gho.

²⁵ Abugho tsɔŋ tə aghəa təla ù ki am fə̂ŋ bùghò dê sə kɔʼ ghue wo an ndɛ, ù lo təm tə̀ŋgūʼ a vʉ̀a Zə kò, ù e fughuu ndûw wən â kɔʼso mò, dzàa səā wô mgbaāŋ wô enyəa, “Zə̀ kə̀ kûm lò nû am bvʉa zɛʼɛ̄.”

Dzì zəla ghəa a ki alebwiī a te an dzeŋe kə ghì a Kəzə̀

²⁶ Waazə̂ ghaŋa gho, sɛ̀ lo aledzɛ̀ êndughō a? Abugho ghɛ̀ bughò dzeŋe tsughu, ghùw u mɔ̀ʼ n tsʉ̀ kɔ̀ʼ ezom, ù lì n zoʼn wò àghì, ù n dzɛ̀ fughu wò ghəa ghəla Zə̀ kə̀ lo mo kə n dzɛ̀ â wə̄n, ghùw ù lì ŋ kə̀a wò àghəa an shwaʼ wəla ghî à zuūwkɛlɛ yo, ghùw ù lì wə̄n n teso dzàa wò ghəa a te gho. Ghəa yì à dzəm kì alelō ko aleghəŋlo enyəa dzeŋe kə ghì a Kə̀zə̀ kə̀ è nomlo.

²⁷ Abugho ghî à kpaʼ lo ghe kə̂aa ghəa gho an shwaʼ ghî à zuūwkɛlɛ yo, ghe ki alelo ko a bə̀ghà ŋkāa a təgha e tɔ̀ŋ, mò ghùw wə̄n kə̀a tsughù nû, waazə̀ ù lì wən ŋ kə̀a è tsughu, ghùw u li n lo aletɔ̀ʼɔ̀ teso dzaā wo shwaʼ u te wo â ghì ghò.

²⁸ Abugho ghùw yo dzə̂ aleteso dzaā wo shwaʼ u te wo, ghe m bɔɔm dòʼò mɔŋ an dzeŋe kə ghì a Kəzə̀ kə te ko — ghe kə̀a tsughu ko aŋ ghùe e ghee àsùghò â Zə̀ kò.

²⁹ Ghɛ̀ m fughu tsughu sùghò kəbûʼ â ghiīshʉ̀ghà a Kəzə̀ ghò a bə̀ghà ŋkāa a təgha, ghe n dzɛ̀ wò sùghò ùshʉ̀ghà, ghî à li ghə n lo aletɔ̀ʼɔ̀ lɛɛ̄n nyəā tsughu ghəa yia ghe ghiīshʉ̀ghà yi mô dzɛ̂ wo.

³⁰ Abugho Zə̀ kə̀ dê fughu wô ghəa zo a ghùw ù li wəla ù mò doʼ enyəa ù dzàa wô â ghì gho, ghùw wəlà ù mò buʼù kə̂aa ghəa gho ŋ kə̀a bùghù dòʼò è kɔʼ.

³¹ Tɔŋlo enyəa to ghɛ̀ a dzəm ŋgəə̄ŋ kəaa shwaʼ u Kəzə̀ wò abugho chìa kə̀aa mɛʼn tsughuu, wàazə̀ ù lì wə̄n ŋ kə̀a è tsughu, aleghəə̄ŋ enyəa ghî à zoʼn kɔʼ ghəa a te àsùghò aledzə̀n fə̀ŋ tə ghee.

³² À fughu kəla ghùwshʉ̀ghà ù Kə̀zə̀ dzàa shʉghà wò a te kwu kele wə̄n.

³³ Zə̀ kə̀ ləghaa yo enyəa sɛ̀ è ndzəghaan lo kaaŋ tsəgha, kə kuuwn ləghaa enyəa sɛ̀ è lo alo kəfəgha kə mɔ̀ʼ. Aŋghəa e lo an dzweŋe u ghì a Kəzə̀ à zɔlɔ gho a dzə̀m,

³⁴ ghîzən a ki aledòʼò mɔŋ abugho ghe lo an dzeŋe kə ghì a Kəzə̀. Nu ghe ki dzə yo daʼa kə̀ li ko alekə̀a èghəa, ghe ki ko alebɔɔ̄m zuuw nduw ko â num a ghee gho aŋghəa lâŋ kə̀ deē.

³⁵ Abugho ghe mô ləghaa alekelê ghə̀a è li zo, ghe m bvʉ̄ ndùw â num a ghee gho an ndughu tə ghee: tɔŋlo enyəa à lò ghəa a tùw kə dəla ko â wìzən alekəaa ghəa gho an dzeŋe kə ghì a Kəzə̀.

³⁶ Hô! À lǒ mò shwaʼ u Kəzə u fə̀ tso kaʼ nughu tsughu alô ghɛ̀ a? Ŋkāa à lò enyəa kà lò ko â ghɛ̀ à ghe mò bughò kə̂a shwaʼ u Kəzə̀ wə̀n à?

³⁷ Abugho ghùw mòʼò enyəa e lo ghùwshʉ̀ghà ŋkāa e lo ghùw wəla ù ki Zuʼ tə̀ Zɔlɔ to, ù kì tsughu boō tsughu enyəa ghəa ghəlà Ǹ tɔɔ̄ wô fɛ à tsə̀ghàso tsughu Mughu ù te enyəa Ǹ tɔɔ̄ wô.

³⁸ Abugho ghùw tsùghòsò maʼà ghəa ghən gho, ghe lo tsughòsò maʼà sughò wə̄n.

³⁹ Waazə̂ ghaŋa gho, à fi lo enyəa ghɛ̀ ki alemuʼū â mbuuw mò aledzaā shʉghà u Kəzə̀ wò. Ghɛ̀ ka bughu naŋa dzə̀ alekəaa ghəa ghò an shwaʼ ù li wəla ghî à zuūwkɛlɛ yo.

⁴⁰ Ghəa a te gho a dzə̀m kuuwn bɔ̌ɔm ki alebwiī kɔʼɔ nduw shìa fə̀shìa aŋghəa a ki alebwìi a te.