1 Kòlentìan 13 - To kə Kəzə̀ kə̀ Fughu ko

Dzì zəla a ki aledeē ləgha zo a te

¹ Abugho Ǹ saʼ kaāŋ wô saʼà tə tənàʼà tò, bùghò sàʼ ndùw sùghò shwaʼ u tsətəndə̄ghā tə Kəzə̀, mò Ŋ̀ kuuwn ki yo ləgha zo a zəŋò ghì ghò, M̀ fi tsôo bùʼn sùghò mbɔ̀ŋ to mbəŋlo ŋkāa ŋgòm lò kuū.

² Abugho Ŋ̀ ki fughu kə te aledzaā shʉghà wò, asùghò tɔ wo alezuuwkɛlɛ nàn tə aghəa to, àsùghò ki fə̀ŋ è te aledzàa ndûw â kàʼà tò enyəa tə səə̄n nughù tsughu, tə n səəŋ nùghù tsùghù è sugho, mò kuuwn ki yo ləgha zo â ghì gho — M̀ fi lo kənughùnùghù.

³ Abugho Ǹ tso bûʼ nî fughu sə mɛʼɛ̀ ndûw ko fʉgha wən ù dzəm Ŋ̀ ki â ghì à laa gho, bùʼ fughu daŋso ndùw sùghò ghue waŋa enyəa ghe kpâa maʼà ndûw, mò Ŋ̀ kuuwn ki yo ləgha zo â ghì ghò, Ǹ yo dzə̂ aletsoō zə fəgha kə li ko a te.

⁴ Ləgha e ghəəŋ nù ghî ghə̀ n zumso tsughu eghue. Ləgha e ghəəŋ nù ghî ghə n dêe èdzɔ̀ aŋ ghùe e ghee. Ləgha e ghəəŋ dzə̀ yò enyəa ghùw è ki mʉ̌ʉn ko am fəgha kə ghûw ù lì, ləgha e ghəəŋ dzə̀ yo enyəa ghùw e kɔʼso kaaŋ ghue wo, ŋkāa ù è tsɔɔ̄ fə̀ŋ alo eghəa.

⁵ Ləgha e ghəəŋ dzə̀ yò enyəa ghùw ù e dala ŋkāa enyəa ghùw è deē ghue wo; ləgha e ghəəŋ nù enyəa ghùw ka e nyəā naaŋ wàazə̀ aŋ ghəa è biigh zo.

⁶ Ləgha e ghəəŋ nù enyəa ghùw ka e tsoʼnlo aleghəəŋ ghəa à biigh gho, mò à lò enyəa ghe e tsoʼnlo aleghəəŋ ghəa ghəla à lô tsəghatsʼha.

⁷ Ləgha e ghəəŋ nù ghùw n lo alenaŋa fə̀ŋ a zəŋò wàazə̀, ghùw n lo alechiī tùʼ alo eghəa, ghùw n lo alebàʼ mbàŋ an tuw kə wàazə̀, ləgha e ghəəŋ nù ghùw n lo alekɔlɔ fèŋ alo aghəa a dzə̀m.

⁸ Ləgha e kê mìaa kòʼ tsəghà yò, yia abugho shʉ̀gha ù dzaā wo, u kê bùghò tsə̀ghàa mìan nù. Alesaʼa kaaŋ saʼà tə ndə̀mà tə tənàʼà tò, ghəa a te a kê tsə̀ghàa mìaa nù, etɔ, e kê bùghò tsə̀ghàa mìaa sùghò nu.

⁹ Tɔŋlo enyəa a kwo mɛʼɛ̄ tsəgha yo a dzə̀m, a kwo mɛʼɛ̄ sugho yo shʉghà wò u dzəm.

¹⁰ Abugho fəgha kəla kə kɔʼ kpe tsughu bugho, kəla kə lo mo kə kâ kɔʼ n nùghùu è tsughu.

¹¹ Aŋghəa mùgho fə̀ naam lo aŋ wɛ̂ɛtùghu, ki sugho tɔ u wɛ̂ɛtùghu, mòʼnlò àghəa tǒ wɛ̂ɛtùghu; a m bùghò M̀ bughò kpe tsughu aŋ ghûw, mùghò n ndòʼ zəghàa màʼà ndùw sùghò ghəa a wɛ̂ɛtùghu.

¹² Fəgha kəla sɛ̀ koʼò êzəŋ tsô lò ko tò vʉʉn kə kəzəŋso alo kəlùŋgɛ̀lɛ; a lo daŋso bughò koʼò dzəə̄ŋ kàʼ mə̀ esʉ̄ sɛ̀ à ghê Kə̀lestò. Fəgha kəla Ŋ̀ kwo êzəŋ kùu ndùw Kə̀lestò nǎam lò ko kəkə̂m; Abugho ù laʼà bugho ebàm, Ǹ lo bùghò kèle mɛ̀ʼn kɔ̀ʼɔ nù ghəa a te gho tò aŋghəa Zə̀ kə̀ tɔ̂ʼ kwo mugho a te.

¹³ E fi lo enyəa ghəa ghən à təgha dòʼò tən nû to mbī kê bughò mîaa, ghəa a te a lo: alegaʼ fə̀ŋ a zəŋò Kə̀lestò, alechìi tùʼ alo eghəa àsùghò ləgha zo. Zəla e kuūwn bvuʼ ghəa a te gho a dzəm à lò eləgha.