1 Kòlentìan 12 - To kə Kəzə̀ kə̀ Fughu ko

Fughu kəla Zuʼ tə̀ Zɔlɔ tə fughuu â ghì ghò

¹ Êzəŋ a waazə̂ ghaŋa gho, kùu ndùw ghəa a fughu kəla Zùʼ tə Zɔlɔ â ghì gho, Ǹ ləghaa yo enyəa ghɛ̀ doʼo alo kəŋgòmsò aŋ ghəa a te.

² Ghɛ̀ kwo nû enyəa ghəa ghɛ̀ mò naām lô Toʼò zò, ghe n sêe mə̀ŋso kaaŋ ghɛ̀, ghɛ̀ ŋ kɔʼso ndùw mmùʼù mò ŋ kə̀aa yò ghəa gho.

³ Ǹ ləghaa enyəa ghɛ̀ kele tsughu enyəa ghùw ù lì yo dzə̂ ù kə̀a ghəa gho an daʼa kə Zuʼ tə Kəzə̀ lò aledzàa tsughu enyəa, “Kəfəm a zəŋò Yɛso!” Ù lì yo sughò ù lò aledzàa səa wô tughō enyəa, “Yɛso lò Mughu ù te.” À mìaa kô Zuʼ tə̀ Zɔlɔ to aleghəŋlo enyəa ù dzàa tsughu êzə̀.

⁴ Fughu kəla Zuʼ tə̀ Zɔlɔ tə fughuu â ghì ghò lǒ nəŋōnə̄ŋ, dèe êzə̀ mò à dzeŋe fughuu kô Zuʼ tə̀ Zɔlɔ tə̀ mɔʼɔ̄ te to.

⁵ Ndə̀m tə ufwàʼ tə̀ lo kaaŋ nû, a lò ko Mughu ù te u mɔ̀ʼɔ ù ghəŋlo enyəa chìa è fwaʼa nduw fwàʼ kə wə̄ ko nəŋōnə̄ŋ.

⁶ Dziī tə lo sugho nəŋònə̄ŋ aleghəŋlo àghəa a te, yìa à lò ko Zə kə mɔʼɔ̄ ko kə dêe fughuu dziī ten tə̀ dzə̀m â ghì ghò a dzə̀m.

⁷ Zuʼ tə̀ Zɔlɔ tə te tə fwaʼà a zəŋò kə̀chìa aleyoso ghî ghò a dzə̀m.

⁸ Zuʼ tə̀ Zɔlɔ tia tə ghəŋlo ghùw ù lì kə̂aa shwaʼ wəla ù ki tɔ wo, â ghùw Zuʼ tə̀ Zɔlɔ tə̀ mɔʼɔ̄ tə te tə m fughu wə̄n tɔ wo alezuuwkɛlɛ ghəa gho.

⁹ Â ghùw ù lì, Zuʼ tə̀ mɔʼɔ tə te tə m fughu wə̄n â fə̀ŋ e te alebiso boō fughu tsughu â Kə̀lestò, à ghùw ù lì, Zuʼ tə̀ Zɔlɔ tə te tə m fughu tsughu wə̄n â dwaʼa wo alebaaŋ ghî dzaŋa gho;

¹⁰ â ghùw ù li, Zuʼ tə̀ Zɔlɔ tə te tə m fughu wə̄n â fughu kə deē kə nsə̀ghàa kò; â ghùw ù lì, Zuʼ tə̀ Zɔlɔ tə m fughu tsughu wə̄n â fughu kə̀ dzaā kə ushʉ̀ghà u kə Kəzə̀ wò; â ghùw ù lì, Zuʼ tə̀ Zɔlɔ tə te tə ŋ ghəəŋ tsughu wə̄n alekwo enyəa fən lǒ zə̀a fə̀ dzûŋ fò ŋkāa à lǒ fə̀ biigh fo; â ghùw ù lì, Zuʼ tə te tə ŋ ghəəŋ tsughu wə̄n enyəa ù è kəaa ghəa gho an ndə̀m è sàʼà tə tənàʼà; â ghùw ù lì Zuʼ tə te tə ŋ ghəəŋ tsughu ù e zuuw dzaā wo ghəa gho an ndə̀m è sàʼà tə tənàʼà.

¹¹ Ghəa ghən a dzə̀m ènyə, à ghə̌əŋ tsughuu kô Zuʼ tə̀ Zɔlɔ tə̀ mɔʼɔ̄ tə te to enyəa ghe e lo êzə̀, təla tə fughuu ko chìa â fughu kə wə̄n aŋghəa tə tsə̂m tsughu.

Gwən e ughùe e mɔ̀ʼ à nyùŋ u ughùe wò ndə̀m

¹² Aŋghəa gwən e mɔ̀ʼ e ki ndə̀m e nyùŋ u ughùe, mò à lǒ ndə̀m è nyùŋ u ughùe zen e ghəəŋ kɔʼ gwən e ughùe zən zo, à lò sughu ghəa è mɔʼɔ̄ êzə̀ â Kə̀lestò.

¹³ À fə̀ lo sugho Zuʼ tə̀ Zɔlɔ tə̀ mɔʼɔ tən to ghe fə̀ fughu sɛ̀ â mùghù ŋ Kə̀zə̀ mò a te — ŋkāa à lǒ Tə̀dzûu ŋkāa à lò Etoʼò, ukɔ̂ ŋkāa ghî ghəla ghe ndzə̂əm mughu — Zə̀ chia kə dzə̂n wô Zuʼ tə̀ Zɔlɔ tə mɔʼɔ tə to am fə̀ŋ tə sɛ̀.

¹⁴ Nu à kà yò ko nyùŋ kə ughùe kə mɔ̀ʼ gwən e ughùe è ki, nyùŋ ughùe ù lo ndə̀m.

¹⁵ Abugho ghuw kə mô lo aledzaā tsughuu enyəa, “Aŋghəa Ǹ yô dzə̂ ghu ko, M̀ fi yo dzə nyùŋ kə ughùe kò.” To e ka mò tsò dòʼò dzə enyəa ghuw kə yo dzə̂ nyùŋ kə ughùe.

¹⁶ Abugho tuūŋ kə mô dzâa tsughuu sughò enyəa, “Aŋghəa Ǹ yô dzə̂ sə zo, M̀ fi yo dzə nyùŋ kə ughùe kə̀ li ko.” To e kà mò daŋso dòʼò dzə enyəa tuūŋ kə yo dzə nyùŋ kə ughùe kò.

¹⁷ Abugho gwən e ughùe e dzəm è mô lô sə zo, to e maʼà ghəa a zūuw ênzə̂n? Ŋkāa abugho gwən e ughùe e dzəm è mô lô tuūŋ ko, to e maʼà luʼu tə lemè zǔuw ênzə̂n?

¹⁸ À fɛ kuuwn lò enyəa à fə̀ nyùŋ u ughùe u te wo u dzə̀m biaan naŋa kaaŋ wo Kəzə̀ êzə̀ aŋghəa kə mò tsə̂m tsughu enyəa zə e lo êzə̀.

¹⁹ Abugho nyùŋ u te wo u dzə̀m mo lo ko kə mɔ̀ʼ, to gwən e ughùe e te e mô nùghù wò ghɛ̀?

²⁰ Aŋghəa e lo êzə̀, nyùŋ u ughùe u lo ndə̀m, gwən e ughùe zəa e lô ko e mɔ̀ʼ.

²¹ Sə e yo aledzɛ̀ â ghu ko enyəa, “Ŋ̀ ki yo ghəa è li zo ghàʼ à ghù.” Ŋkāa tuw kə e soō â ghuw ko enyəa, “Ŋ̀ ki yo ghəa è li zo ghàʼ à ghù.”

²² À fɛ fwə̂n lò enyəa nyùŋ u ughùe wəla u lô ko to u nyɛʼɛ lɛ̄ɛ tsəghà tsùghù waazə̂, u naam ki ko kəfwàʼ.

²³ Nyùŋ u ughùe wəlà sɛ̀ doʼkè tɔʼɔ̀ naŋa èsə a te, à lò u ghee sɛ̀ ghôom tsəghàso a te, wəla kôʼ è kuūwn dzɔ̂ɔ yo, yia a tɔʼɔ̀ ghôom tsughu enyə a te

²⁴ Mo wəla a ŋge gaʼ sə zo a te ndoʼò ləghaa zēe yo ŋgòʼ è ghòom zə. Zə kə n nì nyùŋ dzə̌əŋ kaaŋ wo nyùŋ u ughùe u dzə̀m, wə ŋ ghəə̄ŋ kɔʼ gwən e ughùe e mɔ̀ʼ, ghəəŋ tsughu enyəa nyùŋ u ughùe wəla a ləghaa yo alekòʼ u e ki kɔʼso mò.

²⁵ Zə̀ kə̀ ŋ ghəəŋ tsughu enyəa to gwəne ughùe ù kamò dzùghùu dòʼò dzə̀, enyəa nyùŋ u ughùe ù è dzeŋe lɛnlo â ghue e ghee zo.

²⁶ Abugho nyùŋ kə ughùe kə mɔ̀ʼ kə̀ fanlo, nyùŋ ù li wən n dzeŋe fala mɛ̀ʼɛ̀ ndùw ko u dzə̀m; mo ghe fughu ŋkɔʼso â kə li ko, nyùŋ u te wə n dzeŋe duʼn ŋgə̀a ndùw ko ù dzə̀m.

²⁷ Êzə̄ŋ ghɛ̀ fɛ lǒ tò gwən e Kə̀lestò, chìa vʉ̀a ù lò nduw ko nyùŋ kə ughùe kò kə mɔ̀ʼ aŋ gwən e te zo.

²⁸ Zə kə fə̀ sûesʉ tsuʼ naŋa kɔʼ tum tə Kə̀lestò esə̄ an dzeŋe kə ghì a Kəzə̀, kə n daŋso tsuʼ naŋa kɔʼ ghiīshʉ̀ghà a Kəzə̀, aŋ ghì a kə̀təgha gho Zə̀ kə n tsuʼ naŋa kɔʼ ghê wàdè, daŋso tsuʼ kɔʼ ghî ghəla ghe deē sə̀ghà mò, daŋso tsuʼ naŋa kɔʼ ghî ghəla ghe baāŋ ghì a dzaŋa gho, kə n tsuʼ naŋa kɔ̀ʼ ghì ghəla ghe kwo alebianlo àghəa aleyoso aghì, tsuʼ tsughu ghiīshʉ̀ghà, tsuʼ tsughu, tsuʼ tsughu ghêe wàdè, tsuʼ tsughu ghî ghəla ghe deē səghàa mò, tsuʼ tsughu ghəla ghe baāŋ ghî ghò, tsuʼ tsughu ghəla ghe yôso, daŋso tsuʼ naŋa kɔ̀ʼ sùghò ghəla ghe saʼā ndə̀m è sàʼà tə tənàʼà tò.

²⁹ À lǒ mò à lò aghî à dzə̀m tum tə Kə̀lestò to a? À lǒ mò à lo ghee a dzə̀m ghiīshʉ̀ghà a Kəzə̀ ghò à? À lǒ mò à lo ghee a dzə̀m ghêe wàdè à? À lǒ mo à lo ghee a dzə̀m ghe deē səghàa mò à?

³⁰ À lǒ mò à lo ghee a dzəm ghe ki fughu kə baaŋ kə aghì kò à? À lǒ mòg à lo ghee a dzəm ghe saʼà ndə̀mà tə təsàʼà tò à? Ŋkāa à lǒ mò à lo ghee a dzəm ghe lô alezuuw dzaā wo ghəa gho an shwaʼ u e naʼ ù nughù wo à?

³¹ E Kuuwn dəma ko nlò alekele fughu kəla kə tsəghàsə wən u dzə̀m. Ǹ lo dèe wò ghɛ̀ â dzì zəla è ŋgeē dzɔɔ̄.