Bìoball air-loidhne

1 Kòlentìan 11 - To kə Kəzə̀ kə̀ Fughu ko

¹ Nǐ nlò ghuw kə ebwìi kaŋa ko tò aŋghəa Ǹ nî sughò kə Kə̀lestò kò.

Ghəa à tsəla a kətūw gho abugho a kɔʼsō Zə kò

² M̀ fughûu kɛɛ wɛʼɛ bòʼ ghɛ̀ moʼn nù mugho alo aghəa a dzəm, ghɛ̀ yia naāŋ sughò ghəa ghəla mùgho mò zoʼn naŋa tsughu â ghɛ̀.

³ Ŋ̀ ləghaa enyəa ghɛ̀ zuwkɛlɛ tsughu enyəa Kə̀lestò lò kətuw a zəŋò wìnû, wìnû vʉ̀a ù lò tuw ko a zəŋò wi ù wə̄n, Zə̀ chia kə lô tuw ko a zəŋò Kə̀lestò.

⁴ Wìnûu wəlà ù gɔ̀ŋlo ŋkāa ù dzàa shʉghà wò mò ù tsən naŋâ kətuw, ù fi chwiilwīi Kə̀lestò wəla ù lò tuw ko a zəŋò wə̄.

⁵ Yia kuūwn būghō wìzən wəlà ù gɔ̀ŋlo ŋkāa ù dzàa shʉghà wò mò ù kì tuw kə zum ko, ù fi chwiilwīi num ù wə̄n wəla ù lò tuw ko a zəŋò wə̄n: à lò ko eghəla to ghe lô kɔɔ̄ tsughuu tuw kə wə̄n ko.

⁶ Abugho wìzən tue aletsəla naŋa tuw kə wə̄n, ghe fi ki alekɔɔ̄ maʼà tuw kə te ko. Abugho à lò ghəa a tùw kə dəla ko â wìzən alekɔ̄m tuw kə wə̄n, u fi ki ko aletsəlā naaŋ tsughu tuw kə te ko.

⁷ Wìnûu ndòʼ kì dzə yo aletsəlā naŋâ tuw kə wə̄n, nu ù dèe wò fəgha kəla Zə kə lo ghè kò aŋ kòʼ e wə̄n. Wìzən vʉ̀a ù dèe wò kɔʼso məla wìnû ki aŋ kòʼ e wə̄n.

⁸ Ghe kafə̄ wìnûu bɔm sə kɔ̀ʼ dzə a zəŋò wìzən, à fə lo wìzən ghe fə bɔm sə kɔʼ a zəŋò wìnû.

⁹ Ŋkāa ghe kafə̄ wìnûu bɔm dzə bòʼ wìzən, à fə lo wìzən ghe fə bɔm bòʼ wìnûu.

¹⁰ Zən lò e ghee wìzən ki aletsəla naaŋ tsughu tuw kə wə̄n ko alo kəfəgha tǒ tsə̌a aledèe tsughu enyəa ù lo a tsəlà wìnû àsùghò enyəa tsətəndə̄ghā tə Kəzə tən tə dzəm è koʼō wo.

¹¹ Yia abugho am mùghùu e sɛ̀ â sɛ̀ à ghê Mughu ù te, wìzən yò alemùghù aŋ ŋgəŋ è wə̄n mò wìnû yò, wìnû vʉ̀a ù yò sugho alemùghù aŋ ŋgəŋ è wə̄n mò wìnû.

¹² Tɔŋlō enyəa aŋghəa ghe fə bɔm sə kɔʼ wìzən a zəŋò wìnû, à lò sugho eghəla wìzən dzəā wo wìnû. À ghəa a te gho a dzəm ghəəŋ wò Kə̀zə̀.

¹³ Ghuūghùe zɛʼɛ̄, lɛɛn tsughu nlò enyəa e zɔlɔ nù â wìzən alegɔɔ̄ŋ nduw Zə kò an lùʼù kəla ndə̀mà àghì lò a te mò ù kà tuw ko alo kəfəgha tsən naŋa a?

¹⁴ Ghəa a Kəzə̀ ghən fɛ am mbī mgbaŋa dèe wò nù â ghɛ̀ enyəa à lò ghəa a tùw kə dəla ko â wìnû alekī nyûŋ tə̀ dəghà tò alo kə tuw.

¹⁵ Yia abugho â wîzən, nyûŋ tə dəghàa tə lo ufwəŋ â wə̄n; tɔŋlo enyəa ghe wə̄n â nyùŋ tə dəghàa tə fughu tsughu tò fəgha kə tsəla kə kətūw ko.

¹⁶ Abugho ghùw ù lì dzɛ̀ enyəa e so komso mùghò, ù fi ki alekele tsughu enyəa a kôom kì dzə yo bughōo kə li ko, dzweŋe ù ghì a Kəzə̀ vʉa u kôom ki kpeʼe sugho yo dzì è lòʼ ghe lô alekɔʼso Kə̀zə̀ a te.

Ghəa ghî a ki alenìi bɛ kə Kəzə̀ ko a te

¹⁷ Tsʉ̂ zəla Ǹ so M̀ fughuu wô â ghɛ̀ lò alekuūwn kûɛɛn naŋā wô ghɛ̀ fɛ a te, Ŋ̀ kɛɛ wò dzə yò ghɛ, nu à mò kì alelō ghəa è dzûŋ zò abugho ghɛ̀ bughò zûuŋ tsughu alekɔʼso Kəzə, à ŋ kòom dòʼò ndùw ghəa è biigh zo.

¹⁸ Ghəa e sûesʉ e lo enyəa, Ǹ zuw enyəa abugho ghɛ̀ bughò zûuŋ wô ghue zɛʼɛ zo tò dzeŋe kə ghì a Kəzə̀, ghɛ̀ n ndzughùun lò kaaŋ tsəgha alo eghùe. mùghò m fəm tò mùghò è boō mɛʼɛ̀ ghəa a te gho enyəa à lò êsəŋò.

¹⁹ Ghɛ̀ bûʼ kì nû alendzùghùun doʼò alo eghùe to a e lo alekòʼòkɛlɛ̄ wô baabâ ghì ghəla ghe boō fughu â Kə̀lestò.

²⁰ À fi lo enyəa abugho ghɛ̀ bughò zûuŋ tsughu ghue zo, à yò dzə̂ bɛ kə Kə̀zə̀ ghɛ̀ zəa tsəgha.

²¹ Abugho ghɛ̀ zəā, chìa n ndûuw ko â sə ko alezə̄ fʉghàzə u wə̄n, ghùw ù lì n lo dzə̀ŋ, ù lì ŋ kuūwn kālā.

²² À lò enyəa ghɛ̀ ki yo ndughu to â ghɛ̀ alezəa a te, mʉa ndùw sùghò ù fʉgha a fughu a? Ŋkāa à lò enyəa ghɛ̀ koʼò kèe nù dzeŋe kə ghì a Kəzə̀ ko à, dənsò sùghò tuw u ghì ghəla ghe ki yo kə zəa ko a? Mùghò è buʼù kə̂aa wô êndughō â ghɛ̌ a? À lǒ mò ghɛ̀ ləghaa enyəa Ŋ̀ kɛɛ̄ wô ghɛ̀ aŋ ghəa ghən a? Ɛ̂ŋgaŋ, Ǹ tso yò alekɛɛ̄ wô ghɛ̀ aŋ ghəa ghən.

²³ Ghəa ghəlà mùgho mò dzɛ̂ fughu wô sughò â ghɛ̀, à dzɛ wo Mughu ù te â mùghò, enyəa: Mughu ù te Yɛso nì kɔ̀ʼ kəbɛ an tsuʼ fəla ghe mò fêe fughu wə̄n a te

²⁴ a m bùghò ù fughu nduw zɔ̀ɔŋ kò â Zə̀ kò, ù m bòʼ è tsughu, dzɛ̀ tsùghù enyəa, “Nì nlò, ghɛ̀ zə, zən lò gwən e ughùe zaŋā M̀ boʼn fughu wo â ghɛ̀. Ghɛ̀ è ghəəŋ tsughuu ghəa ghən gho enyə alezəəŋ tsughuu mugho a te.”

²⁵ A m bùghò ghe zə mɛʼɛ̀ kɔʼ kûun tò, ù m bɔɔm nì kɔ̀ʼ sùghò wʉ̀a zə̀ nlʉ̀ an dziī è mɔ̀ʼɔ, dzɛ̀ tsùghù enyəa, “Wùa è nlʉ̀ zən lo kàa maŋa m fùghu mò aŋ kàŋ taŋa, e ghəəŋ tsughuu nlò ghəa ghə gho abugho ghɛ̀ mʉā ghè mò alezəə̄ŋ tsughu mugho a te.”

²⁶ Tɔŋlo enyəa ghəa ghɛ̀ lò zəā zeē tsəghà bɛ kən ko, mʉa zee sùghò wʉ̀a zən, ghɛ̀ fi zə̂əŋ zěe ghue zɛʼɛ an vʉ e Mughu ù te to ù kè tèlè bughò.

²⁷ À fi lo enyəa ghùw wəlà ù zə bɛ kə Mughu ù te ko ŋkāa ù mʉ aŋ wùa è wə̄n an dziī zəla è fughuu yo kɔ̄ʼsō mò â Mughu ù te, ù ki alekele tsughu enyəa ù fi ghəŋlo èbo â gwən e ughùe e Mughu ù te zo àsùghò â kàŋ tə wə̄n.

²⁸ E fi lo enyəa ghùw kì aletɔʼɔ lɛɛn tsughuu ghue u wə̄n wo sěe ù sə zəā bɛ kə te ko ŋkāa ù mʉā aŋ wùa è te.

²⁹ Tɔŋlo ghùw wəlà ù zə kɔʼ, mʉ̀ kɔ̀ʼ sùghò aŋ wʉ̀a è te mò ù kwò yo enyəa zən lo gwən e ughùe e Mughu ù te àsùghò kàŋ te wə̄n, ù fi zəa, sùghò kəfəm a zəŋo e ughùe u wə̄n.

³⁰ Zən lò e ghee ndəm zɛʼɛ ki yô nûŋ wò, à li yia dzâŋlo, à li yia lo mo ghe m kpūwnlō.

³¹ Abugho sɛ̀ kuūwn tɔ̂ʼ lɛɛ̄n tsughu ghue e sɛ̀ zò, to Zə̀ kə̀ kâ sɛ̀ saʼ sùghò.

³² Abugho Mughu ù te laām saʼā sɛ̀ ènyə, ù fi ghəŋlo enyəa sɛ̀ kâ bughò bvʉ̀ dzə̌əŋ nduw sāʼ sɛ̀ à ghì mbī.

³³ Waazə̂ ghaŋa gho, e fi lo enyəa abugho ghɛ̀ bughò zûuŋ wo alezə kùun tə Mughu ù te, ghɛ̀ n ləma mɛʼɛ̀ tsughu ghue zɛʼɛ.

³⁴ Mò dzə̀ŋ zǎa ghùw wɛʼɛ ù li, ù n zə tən kɔʼ an ndughu alô wə̄n, enyəâ e kwo Zə̀ kə̀ lô saʼā ghɛ abugho ghɛ̀ bughò zûuŋ wo. Abugho Ǹ lo bugho, Ǹ lo bughò fughuu mɛʼɛ̀ wô tsʉ̀ è li zən.

« Roimhe

Air adhart »

2020

Lean sinn:

Ceanglaichean taic

Sanasan