1 Dzɔ̌n 3 - To kə Kəzə̀ kə̀ Fughu koWɛ a Kəzə̀ 1 Kòʼ nlò ləgha è ne è ne zəla Tsele ù te de wo â sɛ̀ a, enyəa ghe e tɔɔŋ sɛ̀ enyəa, sɛ̀ lo wɛ a Kəzə̀ a; sɛ̀ yia a kǔum lô sùghò wɛ a Kəzə̀ ghò a. Ghəa zəla ghî a mbī a kwo yo sɛ̀ enyəa sɛ lo wɛ a Kəzə̀ lò enyəa ghe mò kwo sugho yo Zə̀ kò. 2 Waazə̂ ghaŋa gho, sɛ̀ êzəŋ e lo wɛ a Kəzə̀, sɛ̌ yia sô kaam kwo yo fəgha kəla sɛ̀ kê bughò doʼn ghê kò. Yia a kuuwn kwo enyəa abugho Kə̀lestò kè dê wô ghue wo, sɛ̀ kê bɔ̌ɔm lò sugho tǒ wə̄n, tɔŋlo enyəa an tì kə tə ko, sɛ̀ lô wə̄n koʼò ndùw aŋghəa ù lò a te. 3 À fi lo enyəa ghùw wəla ù chǐi tùʼ a zəŋò Yɛso, ù fi sūw zɔ̀nso tsughu ghue u wə̄n, tò aŋghəa Kə̀lestò zɔlɔ̄ a te tsɛʼɛ̀tsɛʼɛ̀. 4 Ghùw nsɔ̌ɔŋnchùw wəla ù ghəə̄ŋ tsughu bo zo, ù fi zaʼ kəlâŋ, tɔŋlo enyəa aleghəŋlo ebo lo alezaʼ kəlâŋ. 5 Ghɛ̀ kwo nû enyəa ù fə̀ fɛ am mbī nyə wo alebùghò alenìi nughù bôo tə sɛ̀, mò ù ka fə ghəəŋ boon kòʼ ghəa e li zo. 6 Ghùw ù li yo ù ti ghu ko kə mɔ̀ʼ ghèe Kə̀lestò vʉ̀a ù kòom ghəəŋ bo zo. Ghùw wəla ù ghəə̄ŋ ndûuŋ ndûw ko bo zo, ù kwò yo Kə̀lestò, ŋkāa ù kaam bûʼ kòʼ kòʼ sùgho wə̄n. 7 Wɛ ghaŋa gho, e kwo ghɛ̀ lô bomlo enyəa ghùw ù lì sèe məŋso ghɛ! Ghùw wəla ù ghəə̄ŋ ghəa ghəla a lô tsəghatsəgha, ù lô ghùw ù tsəghatsəgha, tò aŋghəa Kə̀lestò lò tsəghatsəgha a te. 8 Ghùw wəla ù ghəə̄ŋ zeē bo zo lǒ ghùw ù avʉatsə̄a. Nu vʉatsə̄a à fə̀ sə tən wo ko â bo zo alekaʼa nughù wô. Soo kə eghəa kəla Wɛ ù Ghùw fə̀ bugho a te, fə̀ lo alebùghò saʼà maʼà fwàʼ kə avʉ̄atsəa kə te ko. 9 Ghùw wəla ù lo wɛ u Kə̀zə̀ ghə̂əŋ ndùuŋ yò bo zo, bòʼ mwam u Kəzə̀ ù lo a zəŋò wə̄n. Ù kòom yo dzə̂ aleghəəŋ bo zo, bòʼ à wə̄n dzə Kəzə̀. 10 Zən lǒ ghəa zəla è dêe tsughuu enyəa wɛ a Kəzə̀ à lo nəŋo nəŋ a zəŋò wɛ a Satàn ghò: enyəa ghùw wəla ù ghə̂əŋ yò ghəa zəla e lô tsəghatsəgha, vʉ̀a ù ləghaa sughò yo wàazə̀, ù fi yo dzè wɛ u Kə̀zə̀. Ghɛ̀ è ləghaa nlò ghue zɛʼɛ zo tò waazə̂ 11 Wən lò shwaʼ wəla ghɛ̀ mò zuw zîi wo; enyəa sɛ̀ e ləghaa ghue e sɛ̀ zò to waazə̂. 12 Sɛ̀ ki dzə̂ yo aledòʼò to Kɛ̂ɛn wəla ù fə̀ lo wɛ ù avʉatsə̄a, ù n wi màʼà tsughu wàazə̀. Ù fə wàazə̀ wən enyə wi bòʼ kwò a? À fə̀ lo bòʼ ù fə̀ ghəəŋ ghəa biigh gho, wàazə̀ ŋ kuuwn ghə̂əŋ ghəa à dzûŋ ghò. 13 E kwo ko dzughu e lo sô zuuw ghɛ a waazə̂ ghaŋa gho abugho mbī bâa ghɛ. 14 Sɛ̀ kwo nû enyəa sɛ̀ n sə̀ nùghùu wò aŋ kɔ̀n kə evʉ̄, tsə̀ghà wò am mùghù zəla e doʼò tən, bòʼ enyəa sɛ̀ ləghaa nù waazə̂ a sɛ̀ ghò. Ghùw wəla ù ləghaa yo waazə̂ ghò, ù fi nǎam lò ko am fàŋa kə evʉ̄. 15 Ghùw wəla ù bâ wàazə̂, lo ghùw wəla ù wiī ghî ghò; ghɛ yia a kwo sughò enyəa ghùw wəla ù wiī ghî ghò ki yo mughù è doʼn təla zo. 16 Ghəa ghən ghə ŋ ghəŋlo sɛ̀ yia a zoʼn kele kɔʼ fəgha kəla ləgha e lo ghe kò, mo e lo enyəa: Tò aŋghea Kə̀lestò fə̀ boo tsughu alekpuw an tuw u sɛ̀, sɛ̀ ki aleboo tsughuu sughò alekpuw an tuw u waazə̂ a sɛ̀. 17 Abugho ghùw ki fʉgha u mbī wo, vʉ̀a ù kòʼò nduw wàazə̀ wəla ù kuuwn laʼā kee, vʉ̀ ù ləghaa yo alefughu wə̄n, ù lô ênzə̂n aledzɛ̀ enyəa e ki nû ləgha e Kəzə̀ zò an fəŋ è wə̄n à? 18 Wɛ ghaŋa gho, sɛ̀ ki yo aleləghaa ko ghue zo aŋ ghəa à nəghaan kəaa gho, a ki sughu aledeē nduw ləgha zo an fwàʼ kə sɛ̀ àsùghò alo êsəŋò. Ghɛ̀ e do lo a vʉ̀a Zə̀ kò 19 Ghən lo aŋghəa sɛ̀ lo kele a te enyəa sɛ̀ fɛ ti an dzì zə̀ səŋò, sɛ̀ e ke do lo sugho a vʉ̀a Zə̀ kò — 20 abugho fə̂ŋ tə sɛ̀ tə̀ kê kɔlɔ̀ ko sɛ̀, nu a kwo nû enyəa Zə̀ kə̀ ghaʼ tsəghà fə̂ŋ tə sɛ̀, àsùghò enyəa kə kwo aghəa a dzə̀m. 21 Fən ghaŋa gho, abugho fə̂ŋ tə sɛ̀ tə̀ geēn yo sɛ̀, sɛ̌ fi dô lo nû a vʉ̀a Zə̀ kò, 22 kele sùghò fəgha kəla sɛ̀ bvʉ̀a nduw â wə̄n, bòʼ sɛ̀ sô naāŋ lâŋ kə wə̄n ko, ghəəŋ sùghò ghəa ghəla a dzoō an sə kə wə̄n. 23 Kən lo lâŋ kə̀là ù tsəghàsò tsughu enyəa: Aleboo fughu an zən e Wɛ ù wə̄n ù nùu, Yɛso Kə̀lestò, àsùghò enyəa sɛ̀ e ləghaa ghue e sɛ̀ zo, aŋghəa Kə̀lestò fə̀ dzɛ̂ naŋa. 24 Ghî ghəla ghe naaŋ lâŋ kə Kə̀zə̀ kò lò alo kəfəgha kə mɔ̀ʼ ghèe ghê Zə̀ ko, Zə̀ chia kə lo sugho ghèe ghee. Ghən lò sugho aŋghəa sɛ̀ kele a te enyəa Zə̀ kə̀ lo sɛ a ghee. Sɛ̀ ghəa ghən fɛ kele bò Zuʼ təla kə fughu â sɛ̀. |
2020