TOMLÍKNAM 6 - DEENA BAIBÉL (BSI)

Igulna Kínítko

¹ Depe ido longe delo luyilsuna kídíe bojé yayang iyéname, Grik agom pona Judai kelang agí agom posuna Judai aralo lumínsuto. Grik agom pona Judai kídíde buluke meyéng kídíem longe longelok donam orkolo aipe kaamang emla pakloto.

² Dekepe ila Tomlíknam íying kolang annyide takamem duudum sumo geyéla poto, “Shédíke agom pogoonamem mepakpala ekurang ornamde ngolukepe imeme.

³ Bíro kídía, noluke gooralok Aidelang kénname bíísétna midum kínítko ullentoka. Ngolu sim eget sim bulukíng melíkpe aido

⁴ delo ngolu kumnam lolang Shédíke agomem pogong kolo apíípe yéyé.”

⁵ Opéé tabunge dem ashépe tatto. Bulu Stephanme ullento, bí míngkenge apííla delokke Deena Aidlok bíísétna amiko; delokrongem Philip, Prokor, Nikanor, Timun, Parmena delokke Antiok lokke Judai dormo laana Nikola me ulto.

⁶ Bulu sim ami kídar sim tomlíknam kídídelo aabola tomlíknam kídíde bulukíng alage leetandola kumlíkto.

⁷ Dekepe ila Shédíke agome byargongkai. Jirusalemlo duuna luyilsuna kídíe menang asak bojéyangkai, delokke mirie bojéko míngkengem toríksuto.

Stephanme Umname

⁸ Depe iname, Stephanbí Shédíke yanggong elang pauare bíísétla, bottena irisinyo iyod sangodem amikídí gooralo ibito.

⁹ Depe idokom kumkeng ekum lokke yégíípe yésuna Kureni lokke, Alekjendria lokke, Kilikia lokke delokke Asia lokke Judai ami kídíe bím aklento. Si ami kídí si Stephanme akmín suto,

¹⁰ idokom Stephanke Deena Aidlok kénla ponamem bulu lukí sulamato.

¹¹ Delokrongem bulu amieke ayoko sikepe pokung líkto, “Ngolu Stephanme Mosi kelang Shédíke mirupe agom podope tatto.”

¹² Dekepe ila bulu ami kídí emlang miro kídíem delokke ukil kídíem luuk pouklíkto. Bulu Stephanme yééla Sanhedrin kebalo bomato.

¹³ Bulu menam hakiiem lengkanto, delokke sikepe pokuubito, “Si ami si deena Kumkeng Ekum emlang ayonem popéé sumape agom pomadí kamang.

¹⁴ Kapeila sim ami sim Najareth lokke Jisu bí sim Kumkeng Ekum sim nyokmo geyéla ngolum Mosike ngiitomnam ayonem angupe iyéku emdope ngolu tatto.”

¹⁵ Sanhedrin kebalo duuna takame Stephan me kanggapto, delo bulu bíkke mingmodem teyong kotoki lokke mingmo kísa idope kaato.