TOMLÍKNAM 5 - DEENA BAIBÉL (BSI)

Anania Delokke Saphir

¹ Depe iduem Anania emnam ami kolang, bíkke méng Saphir bínyi lekope bínyike ekurang ayoko koto.

² Bíkke ménge kénbee dope bí murkong attung konem agíkepe mesu pala abídem bomala dem tomlíknam kídíke keralo lenga bito.

³ Delo Pitor bí pokai, “Anania, kapeila Soitane nokke aapí aangem duubomla, nokke among konamlok nokke murkong paanam ayokonem agísukepe leesula, no Deena Aidem yaddune?

⁴ Dem komang adape de nokkepe imanía? Delokke dem korodem, murkode nokke bipe nampe imanía? Ingkuedí nom dekepe idope míímotune? No taniem yadmang idakkom Shédí memino yattone.”

⁵ Anania bí dem tayyédem, oletla sikai. Dem tatla takame pesorunge ikai.

⁶ Delokrongem yaamé kídíe aala, bíkke simadem maayét yétpala, joobomla bím yuto.

⁷ Gonta angumko doorongem bíkke méng dete, kape ikadí dem kénmape aato.

⁸ Pitor bí bím íngkíto, “Sia Anania nonyike among are?” Mimede, “E, demoko are” emto.

⁹ Pitor bí mimedem poto, “Nonyi Ruutumke aidem darkaape emla kapeila mííbo sukane? Kaalangka! Nokke miluem yuna ami kídíe eyablo daggu dubong, delo bulu nomkom joolen bomyé.”

¹⁰ Menang asak mimede bíkke alelo oletla sikai. Delokrongem yaamé kídíe aala delo, bím sidope kaala, bím joolen bomla bíkke miluem yuko ampeng delo mimedem yuto.

¹¹ Mondoli tabung delang dem tatna takame pesorunge ito.

Irísinyo Iyod Kídare

¹² Tomlíknam kídíde amikídí gooralo irisinyuem delokke iyod sangodem bojéko iboto. Delo míngkesuna takame Solomonke barandalo gídum suyar dungai.

¹³ Sékote bulum yidgela erkí gedolate ami kídíde bulukíng aamín gelana kamang.

¹⁴ Depe ilate bojéyape mime milue bulukíng míngkesula aatemkai.

¹⁵ Depe ikolok, ami kídíe kina kídíem Pitorke abír ayuekom bedalo gína ayokonem íkpo dope emla, kina ami kídíem ketpu pakpe bedu bedalo jongang líkdungai.

¹⁶ Jirusalemlo luyu lunggong taonlokke deddína amiekom kina ramna kídíem delokke deemana aid kídíe itu siréénam kídíem bomato, delokke bulum takam ipítoku.

Tomlíknam Kídíem Itusirééname

¹⁷ Delokrongem ríne ruutum delang bíkke opéé. Sadduki amieke bím nekai.

¹⁸ Bulu tomlíknam kídídem umla delokke bulum pateklo meto.

¹⁹ Idakkom yoh delo Ruutumke teyong kotoki kone pateklok eyabem siyyala bulum laalentoku.

²⁰ Teyong kotokide pokai, “Kumkeng Ekumlo gíla, anípe yékunam ngiitom legangem ami kídíem apíípe pobitoka.”

²¹ Píange karyédem, bulum pokampe bulu kumkeng ekumlo gíla, delo ami kídíem luyil poyil lento. Ríne ruutum elang bíkke opééye píngkane, bulu Israel mirokídí kebang Sanhedrin baanem gokdumsuto, delokrongem tomlíknam kídíem patek lokke goklen dokupe ami melíkto.

²² Idola patek delo pííla kaaname, ami kídíde bulum delo paatomang. Depe ila bulu gílat sulangkula pokantoku.

²³ “Ngolu patekdem edíírupe sabi etkap pala, delo sontoriem eyablo dakbom dope kaato; idokom ngolu sabiem etyala kaaname, séko mete patek aradelo duudope kaamato.”

²⁴ Sim agom sim tayyédem, kumkeng ekum lokke sontori ruutum delang ríne kídíde míngasuto.

²⁵ Delokrongem amiko aala pokai, “Kaato langka! Noluke pateklo líknam ami kídíde kumkeng ekumlo dakla ami kídíem ngiitomdung.”

²⁶ Delo, sontori ruutumde bíkke ami kídíem gíbola tomlíknam kídíem bomatoku. Bulu díínam monam imato kapeila ami kídíe bulum elíng gepelo emla bulu pesoto.

²⁷ Tomlíknam kídídem langaang geyé langkula ami kídíde bulum Sanhedrin baanelo ríne ruutumde íngkí bengkí dope dagamoto.

²⁸ Ríne ruutumde poto, “Ngolu sok ami amín sok pogoo lugong namapeka emla nolum lugaptuai. Depe ilate nolu noluke ngiitome Jirusalemlo bíísét moto delokke sok ami sokke sigape nolu ngolum ajéng luketpe idung.”

²⁹ Pitorlang tomlíknam abíd kídíde poyansuto, “Ngolu tani kempemílo Shédíke tomlígem tatperung aido.

³⁰ Noluke esiilo pansaala pettonam Jisume ngoluke abu kídíke Shédí bí sikolokke kiireptoku.

³¹ Israel amiem míílat sukunamem bila delokke paabem maab dokupe Shédí bí bím bíkke agí lakbíklo duumola Mopít bokuna ruutumpe meto.

³² Ngolu sikesok hakii kídíe, delokke Shédíke bíkke agomem tatbina kídíem binam Deena Aid dekom dekepe ine.”

³³ Bulu dem tayyédem sengéépe marla bulum mokape emla mííto.

³⁴ Idokom Gamaliel emnam, ami takame mínggenam, ukilpe ina Pharisi kone Sanhedrin kebadelo dakrepla ami kídíem luyulo gígéé dope hukum bito.

³⁵ Delokrongem bí bulum lutet potet bokai, “Israel lokke amikídia, sim ami kídí sim nolu kape ipe míídudí dem aipe míngíí sutoka.

³⁶ Kerape Theuda bí bottena amikope posula ikolok língko appikope amie bíkkíng gímín geto. Bím petto, bíkkíng gímín gena takame nyokpan sukai, delokke de atí are katomang.

³⁷ Bíkke méélampe, Galil lokke Juda bí ami isapdí longelo lento delo ami opééko bíkom yégeto.

³⁸ Delok legape, sok legasimkom nolum ngo podung; sim ami kídí sim bulum petom melíktoka! Bulum gímo langkuka! Legade buluke míínamde demangkom agér anamde tanilok lendumílo, de nyoksuyéku.

³⁹ Idakkom de Shédí kemílo, nolu sim ami kídí sim itummayé; nolu agísuemino Shédíme mirupe imín suyéne.”

⁴⁰ Bíkke agomdem bulu tatbangkai. Bulu tomlíknam kídídem tomala demto. Delokrongem Jisuke amínlok agom pogoo yimadope hukum bipala, bulum gímotoku.

⁴¹ Tomlíknam kídíde ashépe Sanhedrin kebang delokke gítoku kapeila Jisuke amínlok bulu iréé kosuto.

⁴² Longe koyayang, kumkeng ekumlo delokke ekum ekumlo, bulu meyimape Jisu bímin Messiah emla tatpona dooyingem poyilgooto.