TOMLÍKNAM 4 - DEENA BAIBÉL (BSI)

Pitorlang Joanke Baane Kebalo Dakname

¹ Mirikídí elang, kumkeng ekum lokke sontori ruutum elang delokke Sadduki kídíe Pitorlang Joankíng buluke agom pongo bodung adape aato.

² Bulu bojépe aklínge ito kapeila tomlíknam kídíde ami kídíem luyil poyilla delokke Jisuke sikolokke gerep kunam legangem podungai.

³ Bulu Pitor melang Joanme gakto, delo yume ikolok, ami kídíe bulum longekone píímang tetengem yohdem pateklo meto.

⁴ Idokom ngiitomem tatna kídíe míngkesuto, delokke míngkesuna amie jarngo kope ikabong.

⁵ Longe kondem ruutum kídí elang ukil kídíe Jirusalemlo dumsuto.

⁶ Ríne ruutum Annas bí delo dungai, delokke dekepe, Kaiapha, Joan, Alekjendar delokke ríne ruutumlokke abíd abíd ekum erang amikídíe duuto.

⁷ Bulu Pitor melang Joanme buluke keralo bomala bínyim íngkí bengkí lento, “Ingkona ralnamlok demangkom ingkona amínlok nolu sikepe idun?”

⁸ Delo Pitor bí Deena Aidlok bíísétla, bulum poto, “Ruutum delokke abu abíng kídía!

⁹ Ngolum silo lebééna amikonem ayangem lengkannam agér legape tomla kape kísa bím ipít tokudí dem pobeng sudope íngkí dumílo,

¹⁰ nolu delokke Israel lokke mipil miyonge sim kénlangka: Noluke petnam delokke sikolokke Shédíke kiirep kunam, Jisu Kristoke amín lokmin, si ami si noluke keralo apíí píílí dakdung kune.

¹¹ “Bímin sikepe pobomname: ‘Ekum mona noluke mepaknam elíde míngke yalumpe ikai.’

¹² “Sékote turpeko bedang paamang, kapeila taleng rumkíso sékokíte ngolu turkeng kupeko binam ami abídyang kamang.”

¹³ Edílo bulu Pitor kelang Joanke porimape moomem amipe idola miram namem kaala kénkadí, delo bulu irisinyope mííla si ami kídí si Jisukíng yémín geníai emla kénto.

¹⁴ Idokom bulu ipí kunam amidem delo bulukíng dakmín gedope kaasuname, delo bulu atí lupenam kamang.

¹⁵ Dekepe iname amikídíe bulum kebang delokke gídokupe luto, delokke ami kídíe buluke aralo luposuto.

¹⁶ Bulu pobosukai, “Ngolu sim ami kídí sim kape imílo aiyéne? Jirusalemlo duuna miyonge bulu ikíru manam irisinyoko itung emla kényindung, delokke ngolu dem lupak lamang.

¹⁷ Idakkom ami kídí gooralo goobyak momadope, ngolu sim ami kídí sim sok amínsok séko mete poyil yimadope lutumpe aido.”

¹⁸ Delokrongem ami kídíe bulum tomnín sugeyéla Jisuke amínlok berokpe luyil poyil yimadope bulum lugapto.

¹⁹ Idakkom Pitorlang delokke Joan bí pobosukai, “Shédíme megeyéla noluke agomem tatbi namde Shédíke keralo ainamía aimanamía, dem nolu agí agísue míngkí sulangka.

²⁰ Legade ngoluke kaanam tatnamem ngolu pobimape ilamang.”

²¹ Méélamdem lurít irít geyéla ami kídíde bulum gímotoku. Ami kídíde bulum kape kísa ingéé kandodí dem luyinbosu latomang, kapeila ami takame ingkoko itodí delok legape Shédíme yidgela yédungai.

²² Kapeila irisinyope ipíkunam amide dítag íying appi ngatnakuai.

Míngkesuna Kídíe Miramnape Kumname

²³ Bulum melen kukolok, Pitorlang Joan bínyi buluke agí amilo gílangkula rínekídí delokke mirokídí ponam inam takamem bulum pobitoku.

²⁴ Bulu dem tayyédem, bulu atelkope bottepe Shédí kelo kumbo sukai. Bulu pokai, “Edíína Ruutum, no among talengem, siyéngem delokke delo duuna atí takamem píto.

²⁵ Aidlok nokke béérang, ngoluke abu Dabidke nappalok pobito: “ ‘Kapeila opín kídíe marlíng kane delokke amikídíe emmumpe míírí míínyo kane?

²⁶ Ruutum kelang Bíkke Kristoke mirupe tani amongke rojakídíe gerepto, delokke ruutum kídíe gídum subomto, delokke tosaknam amiem akto.’

²⁷ “Arope Herodlang Pontio Pilat bínyi mipak kídíem dumsula delokke taon sokke Israel amikídíem lekope, nokke tosaknam, nokke deena béérang Jisume míírí míínyope emla ibomto.

²⁸ Bulu nokke ralnam emlang delokke iyépe emla mííru sunamem ipíídope gídum subomto.

²⁹ Supak, Ruutume buluke lurít irídem kénbom dola nokke béérang kídíem nokke agomem miramrupe pomotoyika.

³⁰ Nokke deena béérang Jisuke amínlok irisinyo iyod sangot kídíem iladope nokke ipínana alage meetar toyika.”

³¹ Buluke kumrodem, buluke dumsuko amode engenkai. Delo bulu takame Deena Aidlok bíísétkai delo Shédíke agomem mirampe pogooto.

Míngkesuna Kídíke Atii Tabungem Lekope Iname

³² Míngkesuna takame aapí aange atelkope ito. Sékote agíke bomnam atíem atekpe míísuna kamang, idola buluke bomnam atí takamem bulu orpansuto.

³³ Deddína pauarlok tomlíknam kídíde Ruutumke gerep kunam legangem hakii biyarto, delokke yanggonge bojépe bulu takamkíng duuto.

³⁴ Buluke gooralo pííramna ami kamato. Kapeila leko leko among asi kana kídíe demangkom ekum kana kídíe dekedem kogeyéla, konam delok murkongem bomala

³⁵ Tomlíknam amikídí keradelo meto, delo dem pííramnalo akorem kaabom dola ordungai.

³⁶ Kuprio lokke Lebi ami delokke tomlíknam kídíke Barnaba emnam Joseph bí (depe emnamde erlíknam ue)

³⁷ agíke arík konem kopala delo murkongem bomala dem tomlíknam kídíke keralo mebito.