TOMLÍKNAM 3 - DEENA BAIBÉL (BSI)

Lebéénakonem Pitorke Ipíkuname

¹ Longekonem Pitorlang delokke Joan bí doonyi yutok rongem angum baji kumdílo kumkeng ekumlo gíduai.

² Depe iduem delo “Kampona Lamgé”, emnam delo, ojing lokkekai lebyana amiko duuto. Kumkeng Ekum delo gína ami kídarlok abal kodope emla loodíke bím lamgé delo jongang ayarto.

³ Pitorlang delokke Joan bí aapepak idope bí kaayédem, bulum poisar koto.

⁴ Joan lang Pitor bínyi bím kanggapto. Delo Pitor bí “Ngolum kaasutola!” emto.

⁵ Dekepe iname amide atíko bulukelok paape emla an gap bomto.

⁶ Delokrongem Pitor bí poto, “Ngokke arem tadok kamang, idakkom ngo ingkuem kadudí nom biyé. Najareth lokke Jisu Kristoke amínlok gísu langkuka.”

⁷ Bí lakbíklok gakbomdola, amidem gakrepto, delokke delopak ami delokke ale lepyue edíngkaku.

⁸ Bí agí alelok tíkrepla gísu lenkaku. Delokrongem bí buluke lekope kumkeng ekum delo gíbosula pogonla gídola, delo Shédíme yidgeto.

⁹ Ami takame bím gísula delokke Shédíme yidgedope kaayédem,

¹⁰ bulu si ami si “Kampona lamgé” emnam delo duula kogoona ami rungekulo emla kangkénto, delo bulu bím kape kape itodí dem kaala kapei emla irisinyope mííto.

Kumkeng Ekumlo Pitorke Ngiitome

¹¹ Kogoona amide Pitor kílang Joankíng umdasula dakdungem, ami takame kaalom sula bulukíng “Kolonade” emnam Solomonke baranda delo dugaato.

¹² Pitor bí dem kaayédem, bulum poto, “Israel ami kídía, sim nolu kapeila kapei emla míídune? Nolu kapeila ngoluke agísu pauarlok demangkom deenam ralnamlok sim ami sim gídokupe ina kísa ngolukíng kaadune?

¹³ Abrahamke, Isaakke delokke Jakobke, ngoluke abu kídílokke Shédí bí bím igulna Jisukíng angun ralnamem bito. Nolu bím géépaksuto, Pilat bí bím melenkupe emla mííduem nolu bím mokadope emla Pilatke alaglo melíkto.

¹⁴ Nolu Deenemlang yéjiinem mepak geyéla imemna amikonem melen bidokupe kosuto.

¹⁵ Nolu turnam binem petto, idakkom Shédí bí sikolokke bím kiireptoku. Ngolu sokke hakiie.

¹⁶ Míngkelok Jisuke amínlok, sim noluke kaanam delokke kénnam ami sim ralmodung. Si Jisuke amínlok delokke bíkkelok aana míngke lokmin nolu takam kaadope bím apíípe ipítokune.

¹⁷ “Supak, bíro kídía, nolum yégebona ruutumkídí akampe, nolu kénmape depe ito emla ngolu kéndung.

¹⁸ Kristome irééyé emla kaaluna miri kídí takamke poruu binamem Shédí bí ipíí binape ikai.

¹⁹ Demílo míílat sulangkula Shédí kelo aalangka. Noluke paabem mobín dokupe, kapeila Ruutum kelok míípo yéponam moodíe pííyé,

²⁰ delokke bí nolukepe bíkke ullennam Messiah emnam Jisume melíkyé.

²¹ Bíkke kerango pekai deena kaaluna miri kídílok pébi sukampe, Shédíke atí takamem mosing díkue píímang tetengem bí teyong amolo duuporuyé.

²² Kapeila Mosi bí poto, ‘Noluke agí ami arasulok noluke Shédí Ruutum bí noluke legape ngok kísana kaaluna miriko lenmoyé; bíkke nolum ponam takamem nolu tatgap rupe aido.

²³ Sékodí bíkke agomem tatgap mayédí bíkke ami kídí lokke bím berokpe mepakyé.’

²⁴ Aropakpe Samuel kelok ilangala, kaaluna mirikídí takame deddíko sim longe kídí sim poruubito.

²⁵ Delokke kaaluna miri kídí emlang delokke noluke abu kídílo Shédíke mobosunam daapongem yégene nolu. Bí Abrahamme poto, ‘Nokke otíng oyinlok amo sokke ami takame géryé.’

²⁶ Edílo Shédí bí bíkke béérangem lenmo todí, noluke atímana bedalokke nolum mipilem míílat sumo langkula, nolum ayang igulem bipe emla, Shédí bí kera yalumpe nolukíng bím melíkto.”