TOMLÍKNAM 25 - DEENA BAIBÉL (BSI)

Paulke Roja Ruutumlo Roguname

¹ Phesto bí amodelo pííla longumko doorongem, Kaisarialokke Jirusalemlo gíto,

² delo ríne kídí elang Judai ruutum kídíe bíkke keralo aala Paulme akgang leríngem lengkanto.

³ Bulu Paulme menape Jirusalemlo langaatoi emla bulum iguldope Phestome roguto, kapeila bulu bedalo Paulme petpe emla tobom dungai.

⁴ Phesto bí poyansukai, “Paulme Kaisarialo bomdung, delokke ngo agíete delo menape endak.

⁵ Noluke ruutum ayoko ngokkíng enmín gela, bí imemko iturumílo, amidem imem leríngem lukan bitoka.”

⁶ Longe píínyi demangkom longe konang atíko bulum yébo surongem, bí Kaisarialo oito, delokke longe kondem bí gusorem bisarpeko dungkolo duula delo Paulme bíkke keralo bomadope lulíkto.

⁷ Paul bí aayédem, Jirusalemlok tokna Judai amikídíe bím daggola, bulu agíe porman bila manam, deddína imemeke bojéko bíkke mirupe lengkanto.

⁸ Delo Paul bí agíem podee sudola pokai, “Ngo Judai kídíke ayonemkom delokke kumkeng ekum ayon dokom delokke Kaisar mekom ipéé sumang.”

⁹ Phesto bí Judai kídíe aipe mííyépe emla míídola Paulme poto, “No Jirusalemlo gílang kula delo ngokke keralo sim imem luketnam agom kídar sim bisar modokupe míídonía?”

¹⁰ Paul bí pokai, “Ngo supak Kaisarke bisar ipomlo dung, delo ngom bisarpe aido. No agíe aipakpe kénsudung, ngo Judai kídíem imem atí imang.

¹¹ Depe idokom, ngo nyokge banam imemko itumílo, ngo sinamdem pesomang. Idakkom so Judai kídí sokke ngokkíng ajéng luket namsi aromamílo, sékote ngom bulukíng melík langkumang. Ngo Kaisarkíng rogudung!”

¹² Delo Phesto bí kebang dem pobola, “No Kaisarkíng rogu tubong Kaisar kímin no gíyéne!”

Paulke Agrippa Kílang Bernikke Keralo Aaname

¹³ Loonyi longumko doorongem Roja Agrippa lang Bernik bínyi Phestome kaape emla Kaisarialo pííto.

¹⁴ Bulu delo oolko duula iname Phesto bí Paulke gusorem rojadelo luposuto: “Phelikke pateklo mepala gínyo kunam amiko so dung.

¹⁵ Ngokke Jirusalemlo gíduem, rínekídí elang Judai kídíke mirokídíe bím akgang leríngem bomala bím lukadope roguto.

¹⁶ Ami akonem bí agíe bím akna kídíem ríksula delokke bím ajéng luketnamem podee sumomape melík namde Romlokke yénam ayonlo kamang emla ngo bulum poto.

¹⁷ Bulu so ngokkíng aamín gename, ngo gusor sim metemang idakkom kebangem longe konlo tomla amidem bomadope ordar bito.

¹⁸ Bím akna kídíde poyédem tatname ngokke matanam imem bottena ajéng atíyang bulu bím luketmang.

¹⁹ Dem megeyéla, bulu agí dormo legang ekelang Jisu emnam sikaana ami, Paulke bí turdung embomnam legang ekemin lukí sudune.

²⁰ Ngo sikena atíem kape kísa malen pene dem míngasuto; dekepe ila bí Jirusalemlo gílang kula sim akgang kídar sim bisar kosu kanmadí emla íngkíto.

²¹ Edílo Paul bí Roja ruutume luyin bodope emla rogutodí, delo ngo bím ngokke Kaisarkíng melíkma tetengem bím mepodope ordar bito.”

²² Delokrongem Agrippa bí Phestome poto, “Sok ami sokke agomem ngo agíe tatsupe míídung.” “Nyampo no bíkke agomem tatyé,” emla bí poyansuto

²³ Longekon delo Agrippa lang Bernik bínyi kekímrupe ami alung dungko delo mite migom ekelang taon lokke yége daggebona ruutum amieke aabosula aato. Phestoke lulíklok Paulme langaato.

²⁴ Phesto bí poto, “Agrippa Roja, delokke ngolukíng duuna takam, nolu sim ami sim kaadung! Bí turyipe aimang emla bottepe gokla, Judai opéé tabunge Jirusalem lolang Kaisaria so bíkke legangem ngom roguto.

²⁵ Ngo kaaname, bím nyokdope ipenam atí paamang, idakkom bí roja ruutumlo rogu tubong iname ngo bím Romlo melíkdope mííyintung.

²⁶ Idola Migom delo bíkke legangem deperung emla atlík penam kamang. Delok legape ngo nolu takamke keralo bím bomang bitung, delokke apekrupe, legangem matarongem ngo atíko atladope emla, Agrippa Roja nokke keralo bomatung.

²⁷ Kapeila ngokke mííname patek duuna amiem bím aknam legangem kangkí tatkímape melík namde aimang.”