TOMLÍKNAM 19 - DEENA BAIBÉL (BSI)

Paulke Ephesolo Yéname

¹ Apolloke Korinthlo duudung adape Paul bí doolung raadalok gíla Ephesolo pííto. Delo bí ayoko luyilsuna amieke paala

² delokke bulum íngkíto, “Noluke míngke sudagem nolu Deena Aidem paatonía?” Bulu poyansukai, “Paamang, ngolu Deena Aidko kadung emnam kote tatkímang.”

³ Delo Paul bí íngkíto, “Demílo ingkona baptis em nolu isutone?” “Joanke ibonam baptis emmin” emla bulu poyansuto.

⁴ Paul bí pokai, “Joanke baptis de míílat suku nana baptis emino. Bí bíkke méélampe aanakelo ami kídíem míngke sudope poyilto, demino Jisu bí.”

⁵ Dem tatla bulu Ruutum Jisuke amínlok baptis isuto.

⁶ Edílo Paulke alage buluke teyolo pitan todí, delo Deena Aide bulukíng aala, delo bulu angu angu agom pola delokke méélam kerang agom poto.

⁷ De tabude midum íying kolang annyikope kato.

⁸ Paul bí kumkeng ekumlo poolo angumkope Shédíke yéta legangem ponompe emla miram rupe poto.

⁹ Idakkom ayokone tallí mape ito; bulu aapí angkam gela ruutumke bedangem ami keralo lupaksuto. Dekepe iname Paul bí bulum mepakla gítoku. Bí luyilsuna kídíemte laala loodíke Turan emnam poyilko ekumkolo legangem potí bosuto.

¹⁰ Asia amolo duuna Judai kídí delokke Grik amikídí takame Ruutumke agomem taddope, tagnyi kokai dekepe ibosula yéto.

¹¹ Shédí bí Paul kelok botteruna irisinyuem ikanto.

¹² Bíkke egem lang rumalem ukkína ami kídíe, kiname aitoku delokke atímana uyue bulum duknyok getoku.

¹³ Uyuem monpakla ina Judai mílí sodong amieke ayoko uyu duubomnam ami kídíem Ruutum Jisuke amínlok dekena agérem idope emla ito. Bulu poto, “Paulke pogoonam Jisuke amínlok, ngo nom gígéé langkuka emdung.”

¹⁴ Judai miri ríne, Skeukake oo kínítde dekepe idungai.

¹⁵ Atímana aidde bulum poyansukai, “Jisuke legangem ngo kéndung delokke Paulke legangem ngo kéndung, idola nolu séko?”

¹⁶ Delokrongem urompe tumna amide bulukíng yobala bulum takam ikumto. Bí bulum demngéé sékréla iname bulu ekumlokke mílípe iyyie bídla duklen geto.

¹⁷ Ephesolo duuna Judai kídí elang delokke Grik amikídíe dem kényédem, bulu takame pesue ito, delokke Ruutum Jisuke amínem botterupe mííto.

¹⁸ Delo míngkesuna kídíe bojéko aala agí imemnam agérem takame taddope ponkansuto.

¹⁹ Jadu montrong ina amieke bojéko buluke kitabem laadumsula takam keralo rompakto. Dekepe delokke arem sandum suname jarying pilngo abal kope ito.

²⁰ Dekepe Ruutumke agome bojéko goobyakkai.

Ephesolo Ebínname

²¹ Si takamsi dekepe irongem, bí Makedonialo delokke Akaialok gíla Jirusalemlo gípe emla mííto. Bí pokai, “Dekedem kanggeyéla, ngo Romlokom gíperung aiyé.”

²² Bím igulna annyi, Timothi melang Erasto bínyim Makedonialo melíkto, bidan Asialo anyongko duupoto.

²³ Dekepe idudelo Ruutumke bedang legape botterupe ebínto.

²⁴ Demetrio emnam baldín pína amikone Artemi mime Shédíke mimangem píla bíkkíng agér ina kídíem airupe paamotuai.

²⁵ Bí bulum gokdumsula bíkke kísape agér ina kídíem tomdum supala poto, “Ami kídía, ngolu sok agér sok bojéko paadung dem nolu kénsudung.

²⁶ Dekepe iduuso nolu kaasu tatsudung si Paul emnam ami si Epheso sokke ami kídí petommang Asia amosokke tabung amiem lunom ponomla deddína amiem bojéko yadlen dungku. Tani pínam atíde Shédímang emla bí pobodung.

²⁷ Dekepe imílo ngoluke pangkeng dokeng agér petomsi nyokmayé, idakkom mime shédí Artemike kumkeng ekumem inyokyé, delokke Asia tabung elang tani amonge kumsunam, mime shédíme amín kamo yimayé.”

²⁸ Dem tayyédelo, bulu agí margíla uklenkai; “Ephesia kídíke Artemide botterune!”

²⁹ Menang asak taon tabude ebínkai. Amikídíe Paulke Makedonialok enbosunam Gai melang Aristarkme umla atelkope imanko ekumdelo dukdum suto.

³⁰ Paul bí amikídí keradelo dagape míítuai, idakkom luyilsuna kídíde bím melíkmang.

³¹ Amodelo duuna Paulke amikídí, Paulke angong kídíe, bím imanko ekumdelo gímapeka emla lutumto.

³² Kebade loorí yimang. Ayokone angu konpe, ayokone atí konpe ukto. Ami alume bulu ingko legape delo aatodí dem kénpete kénmang.

³³ Ayokon ami kídíde Aleksandermin sikepe imotune, emla mííla Judai ami kídíe bím keralo níílento. Bí agíem podéésupe míídola agí alaglok ami kídíem asoope emla ruuto.

³⁴ Idola edílo bulu bí Judai amiko emla kénsu tokudí, bulu takam gonta kope agom atelpe ukbosula poto, “Ephesia kídíke Artemide botterune!”

³⁵ Taonlokke kéranie ami kídíem lumap dola pokai, “Epheso lokke ami kídía, Epheso taonde teyong telok oletna botteruna Artemi kumkeng ekumem bomne delokke bíkke mimangem kumne dem tani amonge kénmape idunía?

³⁶ Delok legape si atí si arorunge iname, nolu asoope duupe aido dem ebínpe manpenam kamang.

³⁷ Si ami kídí si kumkeng ekum sim inyok petemang, lukaa petemang, ilate nolu bulum langaatung.

³⁸ Demílo, Demetri lang bíkke agér ibosuna kídíe akonem aklíng namko kadumílo, bisar pekue duusudung.

³⁹ Delokke kékonlo atíko lukan bipenamko kadu mílote, dem kebang ayonlo berokpe luyinpe aido.

⁴⁰ Sok kísape siloke akorlok imílo ngolum ebíndung emla ngolu ebín ajéngem donggeyé. Depe iyém, ngolu atí legang kamape sikena ebín ajéngem dunggeyé.”

⁴¹ Bíkke depe porodem, bí kebadem mepan suyintoku.