TOMLÍKNAM 17 - DEENA BAIBÉL (BSI)

Thesalonikalo

¹ Delo bulu Amphipoli delokke Apollonia lokke gíla Thesalonikalo gíto, delo Judai kídí lokke kumkeng ekumko dungai.

² Paul bí agí gíyasupe, kumkeng ekumdelo gíto, delo longum nana longedelo bí bulukíng yémínla Dooying kitablok poboto,

³ delo Kristo bí sigepala siko lokke gerepyéku emnamdem porman lengkanbola pobeng bito. “Si ngokke nolum pokan binam Jisu simino Kristo bí” emla bí poto.

⁴ Judai amieke ayoko arope mííla, amín kana mime ayokon kékonlo deddína Shédíme pesona Grik amikídíe inam kísape bulu Paulkílang delokke Silakíng yémín geto.

⁵ Idola Judai kídíde nela, bedalo yégoona atímana amiem tomdum sula milung kope ipala taon delo ebínmoto. Bulu milung delo lengkanpe emla Paul melang delokke Silame matape Jasonke ekumdelo aadum subomto.

⁶ Idakkom bulu ami kídídem paamang yédem Jason melang delokke bírueke ayoko taon delokke ruutum kídí keralo hogoo bomla sikepe pokai: “Among tabungem ebín bona ami kídí si supak so aadung,

⁷ delokke Jason bí bulum agí ekumlo torík sutung. Roja konko Jisu emnamko kadung embola bulu takam Kaisarke niyomlokke mirupe ití goodung.”

⁸ Bulu dem tayyéname, milung delang taon delokke ruutum kídíde markai.

⁹ Delokrongem bulu Jason melang abíd kídídem ajéng langgeyéla bulum melíktoku.

Berialo

¹⁰ Adenge pííyé pakdem bíro kídíde Paul melang Silame Berialo megen líktoku. Delo pííla, bulu Judialokke kumkeng ekumlo gíto.

¹¹ Depe idudelo Beria ami kídíde Thesalonika lokke ami kídíem pemílo milo aro yangkai, legape bulu dooyingem tallírupe talla delokke Paulke ponamde arodudí dem kaape kénpe emla loodíke Dooying kitabem an gapto.

¹² Judai ami kídíe bojéko míngkesuto, amín kana Grik mime kelang Grik amiekete arope míngkesuto.

¹³ Thesalonikalo duuna Judai ami kídíe Paul bí Berialo Shédíke agomem pobodung emla tayyédelo, bulu delote gíla ami kídíe ebíndope luk pouklíkto.

¹⁴ Bíro kídíde menang asak Paulme siyéng robelo megen líkto, idola Sila lang delokke Timothi bínyi Berialo duuto.

¹⁵ Paulme gíbosuna angong kídíde bím Athenlo melíkto delokke Paulke Sila melang Timothime menape píímín gelangka emnam políknam agomem gelangala gítoku.

Athenlo

¹⁶ Paul bí bulum Athenlo toyala duudungem, taon delo murti mílípe kaala airupe duuk kai.

¹⁷ Dekepe ila bí Judai ami kídíem kumkeng ekumlo; delokke Shédíme pesona Grik kídíem delo bedu bedalo gídakla dakmín gena takamem lukísuto.

¹⁸ Epikurian delokke Stoik philosophy amieke bí akkí sulento. “Si mide si ingkokoi pope ikí dungane?” emla bulu ayokone pokai. Ayokone poto, “Bí angu amolokke shédí kídar lokke ngiitomem pogoona amikope.” Paul bí Jisuke legang delokke gerep kunam legang tatpona dooyingem pobo kolok bulu depe emto.

¹⁹ Delokrongem bulu bím gíbola Ariopaga emnam taon kebalo bím aaboto. Delo bulu bím sikepe poto, “Nokke pokan goonam luyil anísim ngolu kénlayédí?

²⁰ No tatkí rumanam agomko ngoluke nyorulo, podung, delokke ngolu deke delokke ortuem tallídung.”

²¹ (Athen lokke ami takame delokke atí agér imape idola aní agom kídarem tallí polína angu amikídíe delo yédungai.)

²² Delo Paul bí Ariopaga kebadelo dakrepla pokai, “Athen lokke amikídía! Takam yénamem ngokke kaaname nolu dormorupe yédung.

²³ Kapeila ngo gígoola noluke kumbom namem kaaname, ngo sikepe kumsuko moolop kolo KÉNMANAM SHÉDÍKELO, emla attupe paatung. Noluke kénmape kumsunam atí dem supak ngo nolum pokan bipe.

²⁴ Tani among emlang so duuna atí takamem pína demin teyong kelang amosokke ruutume delokke bí tani alaglok pínam kumkeng ekumlo duumang.

²⁵ Ngolu biladope bí tani alaglok atí inamem míímang kapeila bí agíe tani takamem turnam emlang nganamem delokke atí takamem bine.

²⁶ Ami kídísi among tabungem duubomdope emla ami atellok opín takamem píto; delokke bí buluke yépe dakpe namemlang buluke duupekuem bito.

²⁷ Mipil ngolu kelokke bí mooteng malateng tani kídíe bím matala bím pííla mapaadope emla Shédí bí depe ito.

²⁸ Kapeila bíkkímin ngolu duula, yéla delokke ngoluke yékengem paadune. Noluke abéé ayokonem ponam kísape ‘Ngolu bíkke ome-ookídíe.

²⁹ Delok legape ngolu Shédíke ome-oope idula, ngolu arem tadogem, esing elíng tanike kénnamlok mimang pínamem teyong atí kísape míípe aimang.

³⁰ Kerape Shédí bí kénmape sikena imemem kaayu pesu dungai, idokom supak ami takame rego mipílo míílat suyékupe emla bí ngiitomdung.

³¹ Legade bíkke melíknam amikolok arolok tani amongem bí bisar dokupe emla longeko meruutung. Bí sikolokke bím kiirep langkula sokke pormanem ami takamlo lengkantung.’ ”

³² Bulu sikolokke gerepkunam legadem tayyédem, buluke ayokone ngilkaato, idakkom abíde poto, “Ngolu lekoda nokkelok sim agom sim tatkupe míídung.”

³³ Delo Paul bí kebang delokke gítoku.

³⁴ Amieke ayoko Paulkíng yémín gela míngke sunape ikai. Buluke aralokke Ariopaga lokke membor akon Dionusio bí ito, bíkke kékonlo Damari emnam mime kolang delokke abíd amieke katuai.