TITON 3 - DEENA BAIBÉL (BSI)

Kristan Yéname

¹ Yébo ibona ruutum kídíem gyabbo sulangka, buluke lugo luangem tatla, agér aina lulígem ipe emla míínong sulangka,

² séko meteng iyaktope emla imapeka, aipe tatbo kénbo sulangka, delokke ami takamlo aapí remagem lengkan bolangka.

³ Longeko ngolukom, midepe, lugo luang tatmape, yadnape delokke agíke shénam monam ngai ngasang petomlok yétuai. Ngolu luki lukarla, nesu posula, agíem akkosuna delokke akmínsula yédungai.

⁴ Idakkom edílo ngolum Mosing kuna ngoluke Shédíke ayange delokke igule lenkadí,

⁵ bí ngolum mosing toku, de ngolu aina agérko ibito emko lokmang, idakla bíkke yaasamlok ngolum turmotoku. Ngolum anípe olat sumokuna Deena Aidlok delokke anípe yédope arbín kukolok bí ngolum mosing toku.

⁶ Shédí bí ngolum Mosing bokuna Jisu Kristo kelok ngoluke teyolo bojépe Deena Aidem pílum líkto;

⁷ depe emnamde bíkke yanggolok ngolum yéjiinape imo geyé langkula, ngolu turyarna yénamem míínam sukolo ruutum dogenam tarongem paado kupe itung

⁸ Si agom si aroko. Delokke nolu sim atíkídí sim ralnampe iyépe emla ngo míídung, delomin Shédíme míídíísuna kídíe aina agér inamem bulu agísue kampope ibomdope emla míísuyéne. Si atíkídí si aiyalumdung delokke mipil legape laab pekue.

⁹ Idokom are kamana puupé ruré agomem delokke lenko angko dooyingem, pétkí lukí agomem delokke ayon legalo lumín manmín agomem melangka, kapeila sikesok atí are kamang delokke laab paamang.

¹⁰ Angu arang ibona amiem, leko lunoo pootoka, delokrongem delo lennyinape bím lutokuka. Delokrongem bíkkíng atí ibosuyi mapeka.

¹¹ Nolu kénsudupe, sikena amide miru sogong amie delokke paab alemem gene; bí agíem inyok sudung.

Luyin Agome

¹² Ngokke Artema me demangkom Tukik me melíkrongem, Nikopolilo ngokkíng aape emla rallangka, kapeila ngo dígínso delo duupe emla míídung.

¹³ Ukilpe ina Jename delokke Apollo me buluke bedang enkolo nokke igul lanamem igultoka delokke buluke míínam kídíem paapope paayindope kaabo sutoka.

¹⁴ Ngoluke amikídíe buluke yénamem emmumpe yémape, buluke aro pííram namem paayin iyin sudope aina agérem ila yépenamem kénpe aido.

¹⁵ Ngokkíng yémín gena mipíe nolum salamem bidung. Ngolum míngkelok ayana kídíem salamem bilangka. Yanggonge nolukíng takamlo duudak langka.