TITON 2 - DEENA BAIBÉL (BSI)

Eerína Aabange

¹ No eerína aabang adulok luyilem luperung aido.

² Abíyana kídíem jondope, míngge badope, elgapla yédope delokke míngkenge edíídope ayanglo donggap dope luyilpe aido.

³ Deke kísape, abíyana mime kídíem, buluke yénamlo deenampe pesola yédope, amiem luak iyaknape demangkom onggur alang tíítanape imape, idakla ainem poyildope, luyilbope aido.

⁴ Delomin bulu aníyana mime kídíem buluke agí miluem delokke ome-uem ayang bosula,

⁵ agíe élgapsula delokke deenampe yédope, ekumlo miríí sudope, remakdope, delokke buluke agí milolo gyabbo sudope terníngem biyéne, depe emnamde Shédíke agomem gérmape imo madope iname.

⁶ Delok kísape aníyana kídíem agíe yémgapsula yédope pogaptoka.

⁷ Atí takamlo aina atíem bulum kaayil iyiltoka. Nokke luyil dungem nokke aapí bodongem, mínggap namem, delokke

⁸ lukaa lamanam agom aangem lengkan sutoka, delo nom akna kídíe annyi suyéku kapeila bulu ngolum delo atímang emla lupeko kamang.

⁹ Abíl kídíem atí takamlo ruutumkídí agomlo dongge dope, bulum mííyum sudope, bulu bulum luyan sumadope,

¹⁰ delokke bulukelok pyoomadope, idakla bulu míída subape lengkan sudope luyiltoka, delomin takam bedanglo ngolum Mosing bokuna Shédíke agomem tatbang moyéne.

¹¹ Legade turnam bomana Shédíke yanggode takam amilo píngkai.

¹² De yanggode ngolum agí míídupe yénamem delokke tani among yékampe yénamem mepakdope ludung delokke agíe élgapla, kampope yénam, delokke tani amoso deenampe nyogapla yépenamem luyildung;

¹³ ngoluke míínam sunam ngoluke ashédíku Longem toyala duudungem angun ralnam kana bottena Shédí delokke Turmokuna Jisu Kristo bí lenyéku.

¹⁴ Aina agér gérlína delokke bíkkíng yéna amikídí ngolum petom deedokupe delokke atímana mirul agérlokke ngolum mosing dokupe emla ngoluke legape bí agíem bisuto.

¹⁵ Demílo sim atíkídí simmin no poyilbope aidune. Ermo langka delokke takam ruutum yékor isaplok paklo langka. Séko meteng no lukang kosu mapeka.