TITON 1 - DEENA BAIBÉL (BSI)

¹ Ngo Paul agí Shédíke pakbo delokke Jisu Kristo kelo Shédíke ullennam míngkeng delokke nyogapla yénamlo gíbona aro kénnam legape tomlíknam amie.

² De míngkeng delokke arode turyarna míínam sunamlo kadung. Menam kamana Shédí bí ngolum sim lenmang aamang adapekai pébisutung,

³ delokke bí moodí arolo bíkke ngiitom dooyinglok lengkan bitung. Dem ngom bilíktung, delokke ngolum Mosingkuna Ruutum Shédíke lulíklok ngo pogoodung.

⁴ Ngoluke míngkeng atello duuna ngokke oo arope ina Titonkelo; Abu Shédí kelang ngoluke Mosingkuna Ruutum Kristo Jisuke yanggong elang yéponame duudak langka.

Kretelo Titonke Agére

⁵ Ngokke nom Kretelo mepala gíkunam legade ngokke políknam kísape, ingoola menam agérde kampope jonnampe ila delokke taon mipílo miro kídíem megong líkdope iname.

⁶ Miro amide lukaa penam kamadope yépe aido, méng atel bomna milope ipe aido, bíkke ome-oode arope míngkesula delokke mitum soga ila lugo luang tatmang emko sunape ipe aimang.

⁷ Ordén inam amide Shédíke agér egedem paanade bí lukang kosupe aimang. Bí tebegem dongge lamana, aapí berekna, onggur alang tíítana, mosém díísémna, panggí malok paana dona amipe ipe aimang.

⁸ Dem megeyéla bí daadééna, aina atíem matana, élgapna, eerína, deena delokke jonna niyomlok yéna amipe ipe aido.

⁹ Bí poyil botonam aro ngiitomem edíípe bomgapnape ipe aido. Dekepe imílomin bí aro ngiitom aabanglok amiem luyil bolayéne delokke sim akna kídílokke akmem lumemem ngiitom layéne.

¹⁰ Legade ebínpe akna amie deddíko kadung; nappang béédamne, delokke yadnam petomem kénne, akonpakpe dínbíng iyodsuna opéélo kadung.

¹¹ Bulum lutum rungkupe aido, kapeila agí panggang dogalok buluke pope manam atíem poyilla bulu buluke ekum erang tabungem nyokmodak.

¹² Buluke agí ami polu poor bonakoteng, “Krete lokke ami kídíde yadneke, kaníng adí amoneke, ríksodola dotaneke” emla podung.

¹³ Si lubisunam agom si aropage. Delok legape bulum jonnampe lusémtoka, demílomin bulukom míngkelo edíí yékune

¹⁴ delokke bulu Judai kídílokke agomem tatbi kumape yéna delokke aruem akna kídílokke polígem tatma yéne.

¹⁵ Arolok deenampe yénakídí kepe, takam atíde deene, idakla atímana delokke arue emla míímana kídí kepe, ingkuete deemang. Arope lumílo buluke aapíe delokke mííyi míísang ekom belumdung.

¹⁶ Bulu Shédíme kéndung emla ludung, idokom buluke belede bím tomang. Bulu ramkine, lugoluang tatmane delokke aina agér atí koteng ikénmane.