SANNAM 5 - DEENA BAIBÉL (BSI)

Notkoem Deenampe Mesiiname

¹ Ruutum bí Mosime poto,

² “Notko aralo tííd gena demangkom amíl amolok iyyi bítlenna demangkom simang atíem ugla dormo ayonlok deeyimana amiem notko luyulo melen dope Israel kídíem lulíg langka.

³ Milokong dokom mime dokom, buluke gooralo ngokke duumín geko notkoem deemang-amope imadope, akampe melen langka.”

⁴ Ruutum ke Mosime poyil nampe Israel kídíe dekena amiem notko luyulo melenla ito.

Imem Ajéng Dorkuname

⁵ Ruutum bí Mosime poto,

⁶ “Israel kídíem sipe polangka; Edílo milokong kone demangkom mime kone tanike iyang ségupe ami akon teyolo imemko kala Ruutum ke keralo loorí mape ikadí, de amide imemkai.

⁷ Bí agí paab imemem ponkan supe aido. Bí agíke imem ajéngem apíípe dorkuko teyolo adu pilngo nana aduko dortem geyéla imemlík tonam amidem ajéngem bilangka.

⁸ Idola imemlík tonam amide sinamko kala, delokke bíkke ali-atod kote kamape, ajéng abaldem dorkeng líkpenam kamayémílo, deme Ruutum kelo dorlíkla miriem bilangka. Delo imemna bíme ipít kunape mér kote bitak sulangka.

⁹ Israel kídíke mirilo bomanam deena aman tabude miri kepe iyé.

¹⁰ Mipilke deena amande agíke sue delokke ingkuem bí mirilo boma biyédí de miri kepe iyé.”

Méng Míngumem Igepenam Ayone

¹¹ Ruutum bí Mosime poto,

¹² “Israel kídíem sipe polangka: Edílo amikonke mime loorímape ila milolo jonnampe yébimape, akon ami kolo immín gela,

¹³ deme agí milolok rumnyokla, bíkke deemang-amoem gagko sumape iyédí (Mime dem dekepe idungem kaana-tadnako kamape gagma yémílo),

¹⁴ idola, milode arope míímape míngki-hakkie kayémílo delokke mimedem míngum yémílo demangkom mimede deelate milode míngumla, míngki-hakki kayémílo,

¹⁵ delo bí méngdem miri keralo aabope aido. Mime delokke ayanpe bí sapa patírlok kilogram atel kope, olib tél atí píyél sumape demangkom nampona atoem ilíkmape bomalangka. Kapeila de aroem angunlo lengkan dokupe míngumna milo lokke ali-ayé amane.

¹⁶ Miride mime dem gíabola runggu keralo dagamoyé.

¹⁷ Bí kédéng ekung kolo deena asiem ayoko purlíkla delo Ruutum ke Tombu delokke rumkíng kédénglok anyongko laala asi delo kosang dope hoyél sulíkyé.

¹⁸ Delo bí mime delokke dumídem taala sapa patír delokke aman dem mime delokke alaglo bommoyé. Miri de alag delo béénamem bomana, kosana asi kana ekudem bomyé.

¹⁹ Delo miride bíkke pésunam agomdem mimedem elíkmoyé, ‘No ami, atí ibbo-dobo sumamílo, delokke no loorímape imamílo delokke nok milo gooralo duudungem deemang-amo imamílo, si béénamem bomana kosana asi si nom atímangem iket mapeka.

²⁰ Idola nokke milo gooralo duudungem no loorímape ila, nok milo kékonlo abíd amiem ibbo-dobo sula no deemang-amo itumílo,’

²¹ depe emdudem miride mimedem bíkke péko aralo pélíkpe aido. ‘Ruutum bí ami kídí aralo nome pénam amipe imola edílo nokke ekonge sanla akiiem bíímoyédí nome bulu míípakla idope imolangka.

²² Béénamem bomana asi si nok amíllo aala nok ekongem sanmola delokke nok akiiem bíímolangka.’ Delo mimede ‘Dekepe ilangka,’ emla elíkla pésupe aiyé.

²³ “Miride sim pénam agom kídísim tídbuumnam kitap kolo atgeyéla deme kosana asilo arkut líkkupe aiyé.

²⁴ Delo bí béénamem bomana delokke amíl aralo aala yagorupe kimona, kosana asidem, mime dem tíímope aiyé.

²⁵ Depe irodem miride mime alag delok ali-ayé amandem laala Ruutum ke keralo leesakla runggulo bomalangka.

²⁶ Delokrodem miride aman deloge lakyumko mínggenam amanpe laala runggu delo romlangka.

²⁷ Mimede deemape ila agí miloem yaddumílo, edílo béénamem bomana asidem tííyédí, delo aside amíl delo yagorupe kimoyé. Bík akiide bííyé delokke bíkke ekongde sanyé, delokke agí ami aralo bí pékanampe iyé.

²⁸ Idola mimede deemang-amo imape agíem deenamrupe mesutumílo bíkkíng kinam atí kamayé delokke bí ome-oo oyé.

²⁹ Simoko mime lokke milo gooralo duudula agíem deemang-amope isula loorímape inem demangkom,

³⁰ milo lokke mime teyolo míngumla, míngki-hakkiyém igepenam ayone. Miride mimedem Ruutum ke keralo dagamope aido delokke sim ayon tabung sim mime teyolo ilíkpe aido.

³¹ Milode míímem-samemlok apít-arayé idola mimede imem yémílo imem ajéngem paasuyé.”