SANNAM 4 - DEENA BAIBÉL (BSI)

Kohath Kídíe

¹ Ruutum bí Mosi melang Aaronme poto,

² “Lébi kídíke Kohath erangem buluke opín-odong supelang ramík supe sanlangka.

³ Ruutumke dungko Tombulo agér ibana dítak íying angum lokke ila íying pilngonem sanla atyon langka.

⁴ Kohath kídíke agérde Tombu delokke deeya yalumna ato siroem kaabom tatbomyé.

⁵ Edílo notkoem addíyékudí, Aaronla bík oo kídíde Tombu aradelo gíala Daapong Sonduk keradelo donnam pordem taabínla, deloge Sondukdem polum langka.

⁶ Delok teyo delo kamporupe soyo inam kolok polumla delok teyo delo yasanna egeko tamlumla ipala joonana daajong dem íklík langka.

⁷ Bulu, Ruutum kepe deena ettíng mekeng tébul dem yasanna egeko tamlumla delo teyo delo ekung kídíem, lukung bottena kídíem, delokke tíínam aman legape kaglag kídíem mela delokke kékonlo tébul delo deena ettíde kayarpe aido.

⁸ Sike sokke teyolo yalína gasorko tamlík pala kampope nunam ayo egeko tamlumlík langka. Depe irongem joonana daajongem íklík langka.

⁹ “Bulu sérak mekeng emlang séragem, sébbomnem lang ekung kídíem delokke olib télem mekeng kaglag kídíem yasanna ege gasor kolok polum langka.

¹⁰ Bulu deke takam demlang deke delokke ekuserang tabungem kamporupe nunam ayo kolo tídla jongkelo melíg langka.

¹¹ Sok kékonlo bulu uun runggu delo yasanna egeko polum geyéla kamporupe nunam ayo kolok tídla joonana daajongem jongke delo íklík langka.

¹² Bulu Deena Alop delo agér inana ato-siro ekurang tabungem laadum sula yasanna ege gasor kolok ngoddum sula, kamporupe nunam ayo kolo tídla jongke delo melík langka.

¹³ Bulu pitol runggu delokke metbudem laabínla yamugna ege gasor ko deme polum langka.

¹⁴ Depe ipala bulu runggu delo agér inana atí kídí: eme medung, tabyab kotup, lukung, delokke kuujénana ekung kídí tabungem ege teyong delo melíklangka. Dekedem kamporupe nunam ayo kolo tídla joonana daajongem jongke delo íklík langka.

¹⁵ “Aaron kela bík oo kídíde deena ato-siro kídí emlang deena ekurang kídíem ikapla, tídyinla irodem edílo notko delok byakdíe iyédí delo Kohath kídíe aala dekedem joope aido. Idola bulu deena ato-siro kídíem ukkípe aimang, demamílo bulu siyé. Ruutum ke Tombu lokke ekuserang kídíem Kohath ami kídíe joope aido.

¹⁶ Miri Aaronke oo Eleajar bí, Tombu tabung demla delo kumlíknam tél, ali-ayé aman kídíem, nampona atoem delokke sérak lokke télem kaasi-tadsinamem igepe aido.”

¹⁷ Ruutum bí Mosi melang Aaronme poto,

¹⁸ “Kohath erang dem Lébi opínlok nyokmo mapeka.

¹⁹ Bulum deena ekuserang anínlo gíamola simo madope, Aaronla bík oo kídíe aralo gíabola mipilem, agí agíke agér-anam ipenamem lang joopenamem kaalík-tadlík langka.

²⁰ Idola Kohath kídíde deena ekurang kídíem kaanín goola anyongo legapete kangkímapeka, depe imílo bulu siyé.”

Gershon Kídíe

²¹ Ruutum bí Mosime poto,

²² “Lébi kídíke Gershon erangem buluke opín-odong supelang ramík supe sanlangka.

²³ Ruutum ke dungko Tombulo agér ibana dítak íying angum lokke ila pilngonem sanla atyon langka.

²⁴ Gershon kídíde sikesim agérpe ila joobomyé.

²⁵ Bulu Ruutum ke Tombu delokke arangke tamkap kídí emla luyuke tamkap kídíem, Tombu teyolo kampope nula inam ayo pokap kídíem, lamgé aatakke porda kídíem,

²⁶ porda aro kídíem, Tombudem bilgoobomna gíídang kelang rungguke porda kídí emla rímo kídíem, gíídang aatakke porda kídí emlang deke takamem inana ato-siro tabungem kaasi-tadsinamem igepe aido. Gershon kídíde sike ekurang kídí sokke agér-anam kídíem kangge-tadgebope aido.

²⁷ Buluke agér-anam idu-satok, joodu-jootok takamlo Aaron kela bík oo kídíke pokampe ipe aido. Buluke ipenamem, joodu-jootok penamem tomlík-tomala, kaadu-kaatokla Mosi lang Aaron ipe aido.

²⁸ Sikesi Ruutum ke Tombulo Gershon erangke agér gérbi pename. Buluke agér-anamde miri Aaronke oo Ithamarke ruudu-ruutoklok ipe aido.”

Merari Kídíe

²⁹ Ruutum bí Mosime poto,

³⁰ “Lébi kídíke Merari erangem, buluke opín-odong supelang ramíksupe sanlangka. Ruutum ke dungko Tombulo agér ibana dítak íying angum lokke ila íying pilngonem sanla atyon langka.

³¹ Merari kídíde sikesim agérpe ila joobomyé. Siipang kídíem, gaang kídíem lang Tombu lokke duupuem,

³² gaang kídíke duupuem, hokeng petke kídíem lang Tombuem bilgoona gíídadem hogo bomna rímo kídíem delokke deke delo agér aana ilíknam ato-siro tabungem, kaasi-tadsila, joodu-jootok bomla ipe aido. Buluke mipil miyonge agí-agíke joobom supenamem isupe aido.

³³ Sikesi Tombu agér ikolo Merari erangke igepenam kídíe. Bulu miri Aaronke oo Ithamarke ruudu-ruutok lok ipe aido.”

Lébi Kídíem Sanname

³⁴ Mosi, Aaron delokke Israel opín-buang kídíke ruutum kídíe pínmík pelang raamíkpe Kohath kídíem santo.

³⁵ Ruutum ke Tombulo agér ibana toodí takying angum kela takying pilngo dítak aralo yéna ami takamem,

³⁶ pínmíkpe sanname, 2,750 ko amie ido.

³⁷ Sikesi Ruutum ke Tombulo agér ina Kohath erang kídíe. Mosi kíng Ruutum ke polík kolok Mosi lang Aaron bínyi bulume santo.

³⁸ Gershon kídíem pínmík pelang ramíkpe santo.

³⁹ Ruutum ke Tombulo agér ibana toodí takying angum kela takying pilngo dítak aralo yéna ami takamem,

⁴⁰ pínmíkpe sanname, 2,630 ko amie ido.

⁴¹ Sikesi Ruutum ke Tombulo agér ina Gershon erang kídíe. Ruutum ke polík nampe Mosi lang Aaron bulume santo.

⁴² Merari kídíem pínmík pelang ramíkpe santo.

⁴³ Ruutum ke Tombulo agér ibana toodí takying angum kela takying pilngo dítak aralo yéna ami takamem,

⁴⁴ pínmíkpe sanname, 3,200 ko amie ido.

⁴⁵ Sikesi Ruutum ke Tombulo agér ibana Merari erang kídíe. ruutum ke polík nampe Mosi lang Aaron bulume santo.

⁴⁶ Sikepe Mosi, Aaron delokke Israel opín-buang kídíke ruutum kídíe pínmík pelang ramíkpe Lébi ami tabungem santo.

⁴⁷ Ruutum ke Tombulo agér ibana toodí takying angum kelang takying pilngo dítak aralo yéna ami takamem,

⁴⁸ sandum suname, 8,580 ko amie ido.

⁴⁹ Ruutum ke Mosi kíng políknampe mipilem agí-agíke agér ipenamem paryin líkto. Ruutum ke Mosime polík nampe bulume sanyinto.