SANNAM 3 - DEENA BAIBÉL (BSI)

Lébi Kídí

¹ Sinai dííte delo Ruutumke Mosime luposudoem, sikesi Mosi kelang Aaronke edung erang kídíe:

² Aaron bí oo appiko kato. Abíng yalumde Nadab delokke Abihu lang Eleajar delokke Ithamar.

³ Bulu pídé líkla ordén inam mirie.

⁴ Idola Sinai mooruklo, Nadab lang Abihu bínyi tolíkmanam amanem emelo romlíkla Ruutumke keralo sikai. Bínyi ome-oo kamape ila, Eleajar lang Ithamar bínyi, Aaronke turdung tetengem miri agérem ito.

⁵ Ruutum bí Mosime poto,

⁶ “Lébi opínem Aaronke keralo bíme igulna miri kídípe idope ilangka.

⁷ Aaronke legape bulu agérem ibipe aiyé, delokke bulu ngokke Tombu agér emlang Israel opín-buang takam legape miri agérem ibipe aiyé.

⁸ Bulu ngokke Tombu lokke ekurang takamem kaasi-tadsila Israel ami kídí legape miri agérem gérbipe aiyé.

⁹ Lébi kídíke agér ipenamde, Aaron melang bík oo kídíem agér-anam ibi-sabinamde.

¹⁰ Aaron melang bík oo kídíem miripe tolík langka. Buluke kékonlo, Deena Aloplo gíana amiem moka langka.”

¹¹ Ruutum bí Mosime poto,

¹² “Ngo Israel mimelok oo oge yalumna ayanpe, Israel gooralok Lébi kídíem laato. Lébi kídíde ngokke.

¹³ Kapeila oge yalumnam oode ngokke. Edílo ngo Ijipt kídílok oge yalumnam oo kídíem mokatodí, delo Israel lok oge yalumnam oo kídíem, tani dokom taro dokom ngokkepe ingusuto. Bulu ngokkepe iyé. Ngomino Ruutum bí.”

¹⁴ Sinai yépol mooruklo Ruutum bí Mosime poto,

¹⁵ “Lébi kídíem buluke pínmík pelang raamíkpe sanlangka. Poolo dugrík lokke ila minepe ina milokong tabungem sanlangka.”

¹⁶ Ruutum ke pokampe Mosibí bulum santo.

¹⁷ Sikesi Lébike oo kídíke amíne, Gershon, Kohath delokke Merari,

¹⁸ Gershon ke oo annyi lokke amíne, Libni delokke Shimei,

¹⁹ Kohath ke oo appi lokke amíne, Amram, Ijhar, Hebron delokke Ujjiel.

²⁰ Merarike oo annyi lokke amíne, Mahli lang Mushi. Sikesi Lébi opínke edung erang pínmík kídíe.

²¹ Libni lang Shimei, si Gershon kíng lenne iname, de Gershon opíne.

²² Sok opín sokke poolo dugrík nalok ila mine yana milokong tabungem sanname 7,500 amiko kato.

²³ Si Gershon opín si Tombu delokke anggodan kékon delo notkoem ito.

²⁴ Buluke Gershon opínke mirope Laelke oo Eliasaph bí ito.

²⁵ Gershon kídíde Tombudem kaadu-tattokla, Tombu delokke arang ikap kídíem, Tombu lokke lamgé porda kídíem,

²⁶ baatum lokke porda kídíem, baatum lamgé kelang Tombu dem sogo bomna, delokke runggudem daggo bomna porda kídíem, delokke rímo kídí emlang dekedelo ilíknam ato-siro tabungem kaasi-tadsila ito.

²⁷ Kohath opín araso, Amram, Ijhar, Hibron delokke Ujjiel erang pínmík kídíe kato.

²⁸ Buluke poolo dugrík nalok ila mine yana milokong tabungem sanname 8,600 amiko kato. Kohath ami kídíde Deena Alop deme kaabom-tadbomnape ito.

²⁹ Bulu Ruutum ke Tombu delokke sokko danlo notkoem doodope ito.

³⁰ Kohath opín delokke mirope Ujjielke oo Elijaphan ito.

³¹ Bulu Daapong Sonduk dem, tébul dem, sérak dakkedem, runggu kídídem, Deena Alop delo agér idu-satok iyém inana ekurang kídíem, pordem delokke deke delo agér aana ato-siro tabungem kaana-tadnape ito.

³² Lébi kídíke ruutum yalumpe miri Aaronke oo Eleajar bí ito. Bí Deena Alop em kaabom-tadbomna kídíke ruutumpe ito.

³³ Merari opín lokke erang pínmíge Mahli lang Mushi.

³⁴ Buluke poolo dugrík nalok ila mine yana milokong tabungem sanname 6,200 amiko kato.

³⁵ Merari ami kídí delokke mirope Abihailke oo Juriel ito. Bulum Tombu delokke línggíng danlo notkoem doodope ito.

³⁶ Bulu Tombu delokke siipangem, delokke daabem, gaangem, duupuem delokke deke delokke ato-siro kídí emlang deke delo agér aana tabungem kaabomto.

³⁷ Sok teyolote bulu Tombu delokke gíídalo dínggonam gaang kídí emlang duupuem, hoda sunana petké kídíem, delokke rímo kídíem, kaabom-tadbomnape ito.

³⁸ Mosi delokke Aaron lang bík oo kídíde notkoem, Deena Alop delokke sanggodan, doonyi saatak Tombu delokke keralo doodope ito. Bulu Israel ami kídí kepe Deena Alop dem kaabom- tadbomto. Buluk kékonlo abíd amie Deena Alop delo aanako kayémílo moka moto.

³⁹ Ruutumke lulíg kolok, poolo dugrík lok ilenla mine yana Lébi opínke pínmík tabungem Mosi kelang Aaronke sandume 22,000 amiko kato.

⁴⁰ Ruutum bí Mosime poto, “Israel aralokke oge yalumnam milokongem, poolo dugríkna lokke ila minena tabungem sanla amínem atyon langka.

⁴¹ Israel arang lokke oge yalumnam oo kídí ayanpe Lébi kídíem laalangka delokke oge yalumnam Israel kídíke taro kídí ayanpe Lébi kídíke taroem laalangka. Ngomino Ruutum bí.”

⁴² Ruutum ke lulíg nampe Mosibí Israel kídíke oge yalumnamem santo.

⁴³ Poolo dugrík nalok ilenla minena oge yalumnam milokong takamem amín lok atyonla sandum suname 22,273 ko ido.

⁴⁴ Ruutum bí Mosime sikepe poto,

⁴⁵ “Israel kídíke oge yalumnam oo kídí ayanpe Lébi kídíem laalangka, delokke buluke taro kídí ayanpe Lébi kídíke taroem laalangka. Kapeila Lébi kídíde ngokkepe iyé. Ngomino Ruutumbí.

⁴⁶ Lébi kídíem ngatboyana 273 oge yalumnam Israel ami legape

⁴⁷ kebangke tolíknam adupe mipil adumem nogdi pilngope ullangka.

⁴⁸ Sim abal sim otem kunam Israel amiem ipít kunam legape Aaron melang bík oo kídíem bilangka.”

⁴⁹ Depeila Mosibí, Lébi kídíke ngatbona adumem dorkunam ipít kuna balulem ulgooto.

⁵⁰ Israel kídíke oge yalumnamlok bí nokdi abalem 1,365 ko ulto.

⁵¹ Ruutum ke lulígnam agompe Mosibí ipítkuna baluldem Aaron mela bík oo kídíem bito.