SANNAM 18 - DEENA BAIBÉL (BSI)

Miri Kídíkelang Lebi Kídíke Agér Idonge

¹ Ruutum bí Mosime poto, “No lang nok oo kídíde delokke Lebi kídíe ngokke deena Tombu agér ikolo imem-harem namem yége-dagge sukalangka, delokke nolang nok oo kídí petome miri agérem yége-dagge suka langka.

² Nolang nokke oo kídíe deena Tombu delo agér idungem igul dope noluke Lebi edung-erangem tomalangka.

³ Noluke agér ibipenamem bulu ipe aido delokke deena Tombulo ipenamem ipe aido. Dekepe idoem bulu Deena Alop lokke deena ato-siro lolang runggu lokke ekuranglo uktetpe aimang. Depe bulu uktet goomílo, bulu lang nolu siyé.

⁴ Bulu nolukíng agér imín gela deena Tombuke aralo ipe-sapenam tabungem ipííla ibipe aido, idola tomlík manam amide sékote noluke ayir-agolo gímínpe aimang.

⁵ Israel kídílo ngok marname angkumadope runggu demlang deena Tombu dem kaadu-tattogem nolang nok oo kídí petome isupe aido.

⁶ Ruutum ke Tombulo agér idope Ruutum kíng tolíkla noluke Lebi erang dem, Israel aranglok ngo agísue ullen sula nolume amanpe bito.

⁷ Idola runggu delo agér ipenam tabung lolang porda arangke agér takamlo, nolang nok oo kídí petome agérem miripe ige ayaryé. Miri agér sim ngo nolume amanpe bidung. Deena Tombu ayir-agolo tomlík manam abíd ami aanaem mokalangka.”

Miri Kídíke Taronge

⁸ Ruutum bí Aaronme poto, “Ngo agísue ngokkíng aman binam tabungem kaabom-tatbom dope nome melíkdung. Israel kídíke deena amanpe bomala ngome binam tabungem, ngo nomla nok oo kídílo noluke paasupenam adusupe lang noluke paayar subom penam adupe bisudung.

⁹ No emelo romlík manam deeya yalumna aman lokke arodem agí keepe mesiisupe aido. Buluke aralok, ali-ayé demangkom imem legape demangkom paab legape deenarung amanpe bomanam kídí lokke arodde nokke lang nok oo kídíke supe iyé.

¹⁰ Deme milokong tabungde dolangka delokke deenarung atokope mííla dolangka. Deme nolu deena atope mííbom langka.

¹¹ “Israel ami kídí arang lokke leesak aman aralok ingu sulennam tabungdem kom ngo nomlang nok ome-oo kídí tabunglo paayar subom penam adupe bisudung. Dormo ayonlok deena, nokke erang mipilde dolado.

¹² Bulu kelok, kerayalumpe isi-saasing genam ali-ayé aman kídí lokke gaiyalumna ali-ayém lang olib télem delokke gaiyalumna aní apongem nom ngo bidung.

¹³ Among lokke kera yalumpe len-gena siipí-siiyéem bomala Ruutum kíng binam tabude nokkepe iyé. Dormo ayon lok deena, nokke erang mipilde dolado.

¹⁴ “Israel kídíke Ruutum kíng topít líknam ato takamde nokkepe iyé.

¹⁵ Tani kelang taroke aralo akiilok len-ge yalumna, Ruutum kíng tolíknam tabude nokkepe iyé. Idola tani oo oge yalumnam dem lang deemana taro lokke oge yalumnam milokong oo dem deepítkupe aido.

¹⁶ Edílo dekede poolo atel kope mine yédí, no dekedem deepít langkula, kebangke tolíknam arepe gram íying annyi tebegna baldín nogdi pilngo lok repít mokupe aido.

¹⁷ Idola rune lokke, sobén lokke delokke mér lokke oge yalumnam oo dem no repít kumapeka. Kapeila dekede deena taroe, iname bulum Ruutum ke airupe míínam aríkana amanpe runggulo buluk iyyiem kuujéngla delokke buluke unem romlangka.

¹⁸ Kape kísape leesak amanke angkeng tarong delang lebík letíkde nokkepe idudí, dekepe deke delokke adínde nokkepe iyé.

¹⁹ Ruutum ke keralo Israel kídíke bomanam ato-siro kídí lok lengu sunam deena aman kídí dem ngo nomlang nok oo kídíem, noluke paayar subom penam adupe bisudung. Si Ruutum ke keralo duuyar pena nokke lang nok ome-oo kídí aralo ibosunam daaponge.”

²⁰ Ruutum bí Aaronme poto, “No agísu kepe yége-dagge bomsupenam ekurang atí kasumayé delokke Israel among so among tarong atí paamayé. Israel arang so ngomin nokke taronge delokke yége-dagge bompename.”

Lebi Kídíke Taronge

²¹ Ruutum bí poto, “Ngokke Tombulo agér ibinam ayan arepe, Israel kídíke íying sanpek bomanam tabungem, Lebi kídíem buluke yége-dagge bompenam atope idope, ngo bulum bidung.

²² Supak lokke ila Israel kídíe Ruutum ke Tombu anínlo gíape aimang, demamílo bulu, buluke paab areme dorsula siyé.

²³ Delo Ruutumke Tombu delok Lebi kídí petome agér ila delokke imem-haremko kayémíloteng bulu agísue areem paasuyé. Si angkupena siirum-siirum loope duuyarpena idong iyone. Depeila bulute Israel aralo yége-dagge bompenam ekurang atí paamayé.

²⁴ Delok ayanpe Israel kídíke íying sanpek bomanamem Lebi kídíem buluke yége-dagge bompenam atope idope, ngo bulum bidung. Depeilamin, bulu Israel kídí aralo yége-dagge bompenam ekurang atí paamayé emla ngo buluk legangem pokan bitone.”

Lebi Kídíke Íying Sanpege

²⁵ Ruutum bí Mosime poto,

²⁶ “Lebi kídíem pokandola sim popa bilangka, ‘Edílo nolu, noluke yége-dagge subompenam Israel kídíke íying sanpegem laarík suyédí delo ngokke dekepe nolum binam aman kídí delokke íying sanpekko ilen langkula Ruutum ke amanpe nolu bilangka.

²⁷ Delo noluke aman kídíem, aam yikpom lokke amanpe demangkom siipí-siiyé kétpom lokke kísape toríksuyé.

²⁸ Sikepe nolu kom Israel kídí tabungke íying sanpek paanam lok ilen langkula Ruutum kelo amanem bomalangka. Sok íying sanpek kídí sok tarongko nolu miri Aaronme bisulangka.

²⁹ Nolume binam aman kídí ara delok gaiyalumnem delokke deeya yalumnem Ruutum ke tarongpe nolu bila bombilangka.

³⁰ Edílo nolu gaiyalumna tarongem biyédí, delo dekedem aam yikpom lok demangkom siipí-siiyé, kétpom lok alangpe nolu bidung emla míílíkyé.

³¹ Nolu lang noluke edung-erang kídíe íngkona moolelo yédakkom abíd aman dem dolangka. Kapeila de noluke Ruutum ke Tombulo agér inam lokke ayanpe paanam are.

³² Aman kídí arang lokke gaiyalumnem amanpe noluke bikolok, so agér so nolu imem sumayé, delokke nolu Israel kídíke deena amanem deemape imomayé delokke nolu simayé.’ ”