SANNAM 16 - DEENA BAIBÉL (BSI)

Korah, Dathan Delokke Abiramke Míípésuname

¹ Lébi opín lokke Kohath pínmík lokke Ijharke oo Korah delokke Reuben opín lokke Eliabke oo Dathan lang Abiram delokke Pelethke oo On bulu Mosike ruutum inamem nela,

² míípésulento. Bulukíng lekope opín-buang kídíke miro kídíem itak sula kebang ruutumpe amín kane midum 250 amiko Mosi ke mirolpe ilento.

³ Bulu Mosikela Aaronke keradelo dumsula bínyim poto, “Nonyi ngatboope idung. Banggo tabung silang sokke mipil-miyong si deene delokke Ruutum bí bulu takam kíng kadung. Sikepe iko teyong delo kape nonyi Ruutum ke banggo teyong so agí terengem kedonpe ilíksukan?”

⁴ Edílo Mosibí dem tattodí, bí amongpe gubala kumsuto.

⁵ Delo Korah melang bíkke opéédem bí poto, “Nyampo roem sékodí deene delokke sékodí Ruutum kepe idune deme bí lengkanyé, delokke dem amidem bí agí anínlo aasumoyé. Bíkke ullen sunam amidem bí agí anínlo aasumoyé.

⁶ Korah nolang nokke opééde sime ipe aido: eme ekung lok laala

⁷ nyampo Ruutum ke keralo eme ekung kídí delo nampona ato lokla írna mekol lok ilíkla bomalangka. Delo Ruutum ke ulnam ami demin, deena amipe iyéne. Lebi kídí nolumin ngatboope idune.”

⁸ Korah me Mosibí potemto, “Lebi ami no tattola,

⁹ Israel banggo aralok Israelke Shédí bí ingusula nome iko teyong delo Ruutum ke Tombu agérlo idope, bí agísue anínlo langaasula nome banggo tabung keralo dagla, bulum agér gérbidope Israel abíd lok ipan sulennamdem no atíng manía?

¹⁰ Ruutum bí agí anínsulo nomlang abíd Lebi kídíem lengu sutung, delokke sikepe iko teyong delote no miri agér simte kaabola lape míídunía?

¹¹ No lang nokke opéé kídar si Ruutum ke miru pemino gídum sudune. Noluke aklíla ebín-ebon manbom penam Aaron bí sékoda?”

¹² Delo Eliabke oo Dathan melang Abiram bínyim Mosibí tomto. Idola bínyi poyansuto, “Ngonyi aamayé.

¹³ Ngolume ngullange lang gakíre bingko amolok laalen botung kula so yépol mooruk so mokape emla ibonam sim no atíng manía? Delokke no ngoluke teyonglo kedonpe ruutum doba dunía?

¹⁴ Sok teyonglo, no ngolume ngullange lang gakíre bingko amonglo aabomang demangkom ngolume arík ipekoem lang ríkséng ipekoem padope bimang. No sim ami kídí sim mikma molídunía? Ma, ngonyi delo aamayé.”

¹⁵ Dem tatla Mosibí yagorupe marlíla Ruutum me kumto, “Ami kídar sokke aman bomanam kídíem torík sumapeka. Ngo bulukíng gado kísana sérang atel koteng lamang delok teyonglo ngo bulum atí imemmang.”

¹⁶ Mosibí Korah me poto, “Nyampo no lang nokke opéé midum 250 amidem aabola, Ruutum ke keranglo Tombu delo dagalangka. Aaron teng delo kayé.

¹⁷ Mipil miyongpe agí-agíke eme ekunglo nampona atoem ilíkla deme bomla 250 eme ekung dem Ruutum ke keralo bomalangka. Nolang Aaron nonyite agíke eme ekungem boma sulangka.”

¹⁸ Depe emla mipile agí-agíke eme ekungem bomasula, delo írna mekol loklang nampona ato ilíkla, deme eme dormola Mosi lang Aaron teng lekope Ruutum ke Tombu ekum aatak lamgé delo dagato.

¹⁹ Edílo Korah bí, bíkke opéé tabungem tomdum suyinla Ruutum ke Tombu ekum aatak lamgé delo Mosi kelang Aaronke arot konlo daga todí, delo milung takam delo Ruutum ke angun-abée lengkan lento.

²⁰ Ruutum bí Mosime lang Aaron me poto,

²¹ “Milung kídí sokke nonyi angu sulangka, ngo bulume menape nyokyin moyé.”

²² Idola Mosi lang Aaron bínyi amonglo gubala kapla kumto, “E Shédía, tani takam aid kídíke Shédí. Midum atel paab ikolok no milung tabungem marbom yénía?”

²³ Delo Ruutum bí Mosime,

²⁴ “Milung dem Korah, Dathan delokke Abiramke dego-yilo lokke byakge molangka,” emla podope políkto.

²⁵ Delo Mosibí gerep langkula Abiram kílang Dathan kíng gíto, delokke Israel kídíke miro kídíe bíkkíng gímín geto.

²⁶ Bí milung dem lutorto, “Sikena atímana ami kídíke tombu dego-yilo lok byagge langka. Buluke ekuserangem atí ukkí bimapeka, demamílo buluke paab legape nolute nyoktaksuyé.”

²⁷ Depe pokolok bulu Korah, Dathan delokke Abiramke tombu kídíke dego-yilolok byaggeto. Dekepe idoem Dathan lang Abiram bínyi agí-agíke mime ome-oo delokke ojing kídíem agí tombu eyab elen delo daglen boduai.

²⁸ Delo Mosi poto, “Ngo agí míngkor supe agér-anam tabung sim isumang, idola Ruutum bímin ngome sike takam agér-anam kídar sim idope melígtune, emla nolu takam kényinyé.

²⁹ Si ami kídí si Shédí kelok itung-irénam atí kamape agí sigosupe sisu yémílo, Ruutum bí ngom melíkmang.

³⁰ Idola tatkí-kénkí manam aní séguko Ruutum bí bomala, kédéngsi agí nappangem koyala, bulum lang buluke ato-siro takam bomnam atoem métla delokke bulu turdo-turdope Sheollo tokyémílo, delo nolu si ami kídí si Ruutum me míípakla yédung emla kényinyé.”

³¹ Sim agom kídí sim poyinpak rodem buluke rumkíngke amongde barkéla taapan sukai.

³² Delo kédéngde agí nappangem koyala bulum lang buluke ekurang tabungem delokke Korah ke ami kídí takamem lang buluke ekuserang tabungem métyinto.

³³ Buluke bomsunam ekuserang tabungem ila bulu turdo-turdope Sheol lo tokkai. Kédéngde bulum ilum langkula milung delokke bulu nyokkai.

³⁴ Buluke ulo gogdudem tatla buluke ayir-ago delokke Israel kídíete, kédéng si ngolumteng métyé emla ulo gogla dugnyok geto.

³⁵ Delo nampona ato amanem bina midum 250 ami kídí delo Ruutum ke eme aala bulum guka kayinto.

³⁶ Ruutum bí Mosime poto,

³⁷ “Miri Aaronke oo Eleajar me sipe polangka: Gukanam kídí delokke gutung-gungong lok eme ekung kídíem tídumsula mekol kídíem mootenggamlo yobbín langka, kapeila eme ekung kídíde deene.

³⁸ Dekedem, Ruutum ke runggulo bomayém deena ekurangpe dekede idung. Depeila agí paab legape simonam ami kídí simang delok, eme ekung kídíem tídumsula dekedem bésorna tingpe dembyor langaala rungguem tamkap nadope ilangka. Sike si Israel amiem lutornam iyodpe iyé.”

³⁹ Delo miri Eleajar bí, pitol eme ekung kídíem guka tonam simang kídí delok tídum sula runggulo tamkap dope bésorna ting alop kope dembyorla ito.

⁴⁰ Deme Ruutum ke Mosime lengkan nampe ito. Si Aaronke otíng-oyin ma tetengde runggulo gíala nampona atíem Ruutum kelo romlamang emla Israel abíd ami kídíem lengkannam iyodpe ine, demamílo dekepe ina ami dekom Korah kelang bík ami kídí kísape iyé.

⁴¹ Longe kondem Israel milungde dumsula, “Ruutum ke amiem nonyi petto,” emla Mosime lang Aaron me ebín-ebon manbomto.

⁴² Idola edílo milung de, Mosi kelang Aaronke mirolpe gídum sudungem, Ruutum ke Tombu dem kaasutodí, delo Tombu dem menang asak doomuge ilumla Ruutum ke angun-abée lento.

⁴³ Delo Mosi lang Aaron bínyi Tombu kerang delo aato.

⁴⁴ Delo Ruutum bí Mosime poto,

⁴⁵ “Milung delok menape gígélangka. Ngo bulume nyokyin moyé.” Delo bínyi amonglo gubaato.

⁴⁶ Delo Aaron me Mosi poto, “Nokke eme ekungdem menape laala, nampona atíem ilíkla, runggu delo eme ilíkla, milung esim deebín dope lomabomkai, kapeila Ruutum kelok marname lenla itung-iré adíre ilen kabong.”

⁴⁷ Mosike lomlík lok Aaron bí milung raadang delo lomla agérem ito. Delo itung-iré adírde ilen dobong, idola Aaron bí nampona atí delok ipakla, bulum deebínla ipíttoku.

⁴⁸ Bí turna kela sinake pénsamlo dagto, delokke itung-iréde kaimangkai.

⁴⁹ Idola Korahke leganglok sinem santak sula midum 14,700 ko amie itung-iré delok sikai.

⁵⁰ Itung-iréde kaimala Ruutum ke Tombu aatak delo Mosi kelo Aaron bí aatoku.