SANNAM 14 - DEENA BAIBÉL (BSI)

Ami Kídíke Míípésuname

¹ Delo yoh delo ami kídíe rííla ankílok yagorupe kapto.

² Israel tabunge Mosi melang Aaron me lugedola doolung tabungde bínyim luto, “Ijiptlo ngolu siduamílo aiduai demangkom so yépol mooruk among so nyokyin duamílo aiduai.

³ Gíníng-yoksalo ngolu nyokdope, kape Ruutum bí so among so ngolum bomang kane? Ngoluke mime ome-uem umyinyé. Depeila Ijipt lo ngoluke enlat sukunamde ai berok yayé.”

⁴ Dekepe pobosula bulu, “Ngolu miroko ullenla Ijipt amongpe enlat sulang kupe,” emla manbosuto.

⁵ Delo Mosi lang Aaron bínyi, Israel milung dumsuko delo atuk-migmoe amonglo gubaato.

⁶ Nunke oo Joshua lang Jephunnehke oo Kaleb bínyi, asi-among rokang gongkolo gímín gela annyide dekedem tatla agíke ege-galugem bétsula,

⁷ milung tabung dem poto, “Ngoluke rokang goola gígongko amongde gai aloodung.

⁸ Ruutum bí ngoluk teyolo ashéng dumílo, dekena ngullange lang gakíre bingko among delo bí gíboyé, delokke deme ngolum biyé.

⁹ Ruutum ke mirupe míípé sumapeka, delokke among delo duuna amiem pesomapeka. Kapeila ngolu bulum méyyinyé. Bulum tamtepe ibone kaimang. Idola Ruutum bí ngolukíng kadung. Bulum atí pesomapeka.”

¹⁰ Idola bulum elíng lok gepetpe emla lupo bosudo delo, Israel tabung kangko delo Ruutum ke angun-abée Ruutum ke Tombu delo ngunkan lento.

¹¹ Ruutum bí Mosi me poto, “Si ami kídísi ngome edít longe koda míípakyén? Buluk aralo irisinyo iyod tabungem ikanlate edít longe koda bulu ngome arope míímape itíyén?

¹² Depeila ngo bulum kilii-ramlilok itung-iréla nyokyinmoyé, idola bulum pemílo botteyana ralyana opín kope nome imoyé.”

¹³ Ruutum me Mosi bí poto, “Depe imílo sok legangem Ijipt ami kídíe tatyé. Sim ami kídí sim nok ralnam-pauarlok Ijipt ami kídí aralok no laalento.

¹⁴ Sipe imílo, sok legangem Ijipt ami kídíe so among so duuna ami kídíem popayé. E Ruutum, no so ami kídar so yémín gedung emnamem delokke E Ruutum, nome mikmo geríksula, nokke doomuge buluke aralo dagla kaarík sudung emnamem bulu tattobong. Delok teyong delo no buluke keralo longem doomug adongpe delokke yuem eme medongpe gíbodung.

¹⁵ No sim ami kídísim letel paklo lekope moka yémílo, sikepe inam legangem tadna opín-buang takame sikepe poyé,

¹⁶ ‘Agíke pésunampe ami kídíem Ruutum bí among delo bomalamato. Depe ila bí bulum yépol-mooruklo petyinto.’

¹⁷ Nokke sikepe polensunam adupe nok ralnamem lengkan langka,

¹⁸ ‘Ruutum ke marname eetetnako, ayange alum-asa manako delokke paab emla miru-hogope ila míípésunem ayala mesam binako. Idola imemem ajéng luketla mesammanako. Bí abu kídíke paabem ome-oo siirum angum appi loope ajéng lukunako.’

¹⁹ Nokke eeríruna ayang iyonpe ami kídí sokke imemem kapekísa no Ijipt amolok enlen doku delokke ila supak pete jonbi dudí, dekepe buluke paabem mesam bilangka.”

²⁰ Ruutum poyansuto, “Nokke kokampe ngo buluke imemem mesam bito.

²¹ Idola ngo ngok turyarnam delokke tani among tabung sim ngokke angun-abée bííbomnam lok pésudung.

²² Ngok angun abé emlang Ijipt amonglo lang yépol mooruklo irisinyo agérem ikan binamem kaalate, ngome ipatsula delok teyolo lemying kokai ikang kíla ina kídí ara sokke,

²³ mitel kote, buluke abu kídílo ngokke pésulíknam amongem kaapana kamayé. Ngome míípakla yéna amie sékote sim among sim kaapamayé.

²⁴ Idola ngokke béérang Kaleb bí aid angu konko gela aapí-aange airupe ngokkíng yémín gekolo, bíkke gígong tokanam among delo ngo bím gíamoyé, delokke bíkke ome-oo otíng-oyin kídare among deme yébom yéku.

²⁵ Yiibe amonglo Amalek ami kídíe lang Kanaan ami kídíe duudunade, Silíng Siyéng bedang lok gílang kula nyampo yépol mooruklo enlat sulangkuka.”

²⁶ Ruutum bí Mosi melang Aaron me poto,

²⁷ “Si atímana banggo si edít longe koda ngokke mirolpe ebín-eson agom potíyén? Ebín-eson potína Israel kídíke gomké-gomkarem ngo tatto.

²⁸ Depeila bulum polangka, ‘Ruutum bí sikepe polendung, ngo turyarna Shédí bí dekepe, ngokke tatpaanam noluke ponam atopakpe ngo ibiyé.

²⁹ Takying annyinalok demangkom dem abíyana lok ila séko memdí sapduem santuane delokke sékodí ngok mirolpe ebín-esonpe agom-aang potodí, dekepe ina mipil-miyong noluke amíl-amo kídíe so yépol mooruk so siyinla dooyinyé.

³⁰ Nunke oo Joshua kela Jephunneh ke oo Kaleb bínyike kékonlo, ngokke alage leedu sula noluke ekumpe imoyé emla pésuko among so nolu sékote aalamayé.

³¹ Noluke míípak tonam among delo, noluke abílpe imoyé embomnam noluke ome-oo kídíem, ngo ashéng-angampe bomayé.

³² Idola noluke amíl-amoe so yépol mooruk so siyinla dooyinyé.

³³ Noluke méélam yalumke simang amíle so yépol mooruk so doomang tetengem, noluke ome-oo kídíe takying appi kokai noluke aro míngke sumanam legape ankí-kenola yégooyé.

³⁴ Noluke amongeme looying appi kokai rokang goonam dem taktello hanyisulígla takying appi kope noluke paab legape adír paayé, depeila noluke mirolpe ngome imonam legangem kénlangka.’

³⁵ Ruutum ngo agom sim podung, delokke ngokke mirolpe dumsuna atímana banggoso, ngo arorupe sike sim ilíkyé. Buluke yérí longem so yépol mooruk so kaarík suyé, so bulu nyokyinyé.”

³⁶ Depeila, Mosi ke amongem rokang goodope lulígnam ami kídíde, milung delo gílat surongkuem atímana agom-aangem byargo mola Ruutum ke mirupe ebín-ebon dope podope pokung kuna,

³⁷ delokke dekepe among delokke legangem atímape pobokuna kídíem itung-iréem melíkla Ruutum ke keralo bulu siyinkai.

³⁸ Among dem rokang kolo gína kídí arang delok Nunke oo Joshua lang Jephunneh ke oo Kaleb bínyi petom turkai.

Kanaan Amongem Kerayalumpe Gíadope Iname

³⁹ Edílo sim legang kídar sim Mosi bí ami kídíem popatodí, bulu yagorupe kapto.

⁴⁰ Delokke kékon roh delo rokompe bulu kedonna dííte mopang among delo saala, “Ngolu paab ito. Ruutum ke pésuko among delo ngolu gíyé,” emla bulu manto.

⁴¹ Idola Mosi bí lutumto, “Ruutum ke lulíg agomem kape nolu tatmape ipat sukan? Sikepe imílo ikummayé.

⁴² Nolu saamapeka. Kapeila Ruutum bí nolukíng kamang. Nolu noluke miru alaglo ikum kosuyé.

⁴³ Kapeila Amalek ami kídíe lang Kanaan ami kídíe nolum mimakpe telo iríksuyé. Nolu Ruutum kelok angupe ikukolo bí nolukíng kamayé, iname nolu gíníng yoksalok siyinyé.”

⁴⁴ Idolate buluke mííduk-haktíklok bulu dííte mopang among danpe, Mosi lang Daapong Sondukde notko delok gílen mape duulate gísaato.

⁴⁵ Delo among delo duuna Amalek kídíe lang Kanaan ami kídíe oila mimakpe iríksula, bulum Hormah loope ikumla monlíktoku.