SANNAM 13 - DEENA BAIBÉL (BSI)

Kanaan Amongem Rokang Gooname

¹ Ruutum bí Mosi me poto,

² “Ngokke Israel kídíem binam Kanaan amongem rokang goodope ami ayoko melík langka. Opín-buang miyonglok miro amiko ullenla lulíg langka.”

^3-15 Depeila Ruutumke lulígnampe, yépol mooruk Paran lok Mosi bí Israel kídíke miro kídíem melíkto. Buluke amíne sikesi: Reuben opín lokke Jakkurke oo Shammua bí, Simeon opín lokke Horike oo Shaphat bí, Judah opín lokke Jephunnehke oo Kaleb bí, Issakhar opín lokke Joshepke oo Igal bí, Ephraim opín lokke Nunke oo Hoshea bí Benjamin opín lokke Raphuke oo Palti bí, Jebulun opín lokke Sodike oo Gaddiel bí, Manasseh opín lokke Susike oo Gaddi bí, Dan opín lokke Gemallike oo Ammiel bí, Asher opín lokke Mikaelke oo Sethur bí, Naphtali opín lokke Bopsike oo Nahbi bí, Gad opín lokke Makhike oo Geuel bí.

¹⁶ Amongem rokang goodope Mosi ke lulígnam ami amín kídíe sikesi. (Mosi bí Nunke oo Hoshea me Joshua emla amínem mínyan líktoku.)

¹⁷ Kanaan amongem rokang goodope bulum lulígdo deme Mosi bí bulume sipe políkto, “Sokkodan Negeb amosok gíla línggíng dan dííte amongpe gígoolangka.

¹⁸ Among si kapekísa nakoi emla kanggo langka delokke among kídí delo duuna ami kídíde miga-miram nekedí, miso nekedí, milung mibampe duududí, midok-miyokpe yédudí?

¹⁹ Bulu kape kísana amonglo duudun? Kape kísana doolung luunelo bulu duudun? Dekede yabgo kadudí demangkom ayaa pesadudí?

²⁰ Kape kísana kédengeke? Moonepe idudí ma moorukpe idudí? Esing-éng kadudí? Among delokke gairuna siipí-siiyém bomang kupe nolu ralgap langka.” (Delo kerape min-gena onggur ayé mindípe ito.)

²¹ Depeila bulu delokke saadu sula yépol mooruk Jin lokke ilenla Lebo Hamath danlo duuna Rehob loope rokang goola among tabungdem magooto.

²² Bulu Negeblok malenla Migo-mimat Anakimke otíng-oyin Ahiman, Shesai delokke Talmai buluke yéko Hibronlo pííto. (Hibron dem Ijipt lokke Joan doolungem pemílo dítak kíníd kerape doolungpe igeto.)

²³ Edílo bulu Eshkol yiibe delo píítodí delo aag atello apumpe onggur ayé ééna aag konem pala deme midum annyie daajong atello lekope dalim loklang tapang ayé ayoko jootak sula, pénsamlo joobomto.

²⁴ Onggur ayé apumpe inem Israel kídíe kaapala dekeme joobom kukolok dem moolop dem Eshkol yiibe emla amín mínto.

²⁵ Looying appi kékon delo bulu amongdem rokang goola irongem enlat sutoku.

Asi-among Legangem Pobikuname

²⁶ Yépol mooruk lokke Kadeshlo, Mosi kílang Aaron kíng delokke Israel daapong kerang delo bulu píílat sulangkula bulu doolung tabungem legí-sigangem bitoku. Delok teyong delo bulu among delokke siipí-siiyé emte lengkantoku.

²⁷ Bulu Mosime legí-sigangem sipe popatoku, “Nokke lulígko among delo ngolu gítoka. De arope ngullange lang gakíre bingko amongko. Sikesi delokke siipí-siiyée.

²⁸ Idola delo ami duuna kídíde miga-mirameke delokke doolung luune kídíde yabgo kala botteneke. Ngolu migo-mimat Anakimke otíng-oyinemte kaato.

²⁹ Negeblo Amalek kídíe dííte amonglo duudung. Kanaan amie siyéng asi robeng lolang Jordan korong abelo duuyondung.”

³⁰ Delo Mosike keralo ami kídíem Kaleb bí asoope empala poto, “Ngolu menape gíla among esim laalaju. Kapeila ngolu arope ikumlayé.”

³¹ Idola bíkkíng gímín gena ami kídíde poto, “Ngolu ami kídí tesim mimakpe iang lamayé. Bulu ngolum pemílo ralya berok dung.”

³² Delokke buluke rokangko among delokke legí-sigalo bulu loorímana agomeke Israel milung ara delo pogobito. Bulu sikepe popato, “Ngoluke rokang gongko amongde, delo duuna ami suemte dosuneke. Ngoluke kaanam ami kídí takame bodí-bottena amipe iyindo.

³³ Ngolu Nephilim kídíem among delo kaato. (Anakimke otíng-oyin kídíde Nephilim kídílok lento) Ngolu buluke keralo agísueme takom kísa kaasuto. Deke kísapei bulu ngolum kaatope.”