SANNAM 11 - DEENA BAIBÉL (BSI)

Eme Dorlenname

¹ Ruutum ke tatkolo ami kídíde buluke duug-adírem ebín esonpe manbosuto. Deme tatla bí markai. Delo Ruutum kelok eme buluke aralo dorlenla, kéényu-rego notko lokke tombu ayokonem guto.

² Edílo ami kídíde Mosi kelo kapkan sutodí, bí delo Ruutum me kumla irongdem emede mitkaku.

³ Depeila dem moolop dem Tabera emla manto, kapeila delo buluke aralo Ruutum ke eme guto.

Miro Íying Kíníd Ullenname

⁴ Israel kídílo lekope yémín gena mibo-miying kídíde donam-tíínam abíd legape ebínpe manlenkai, delok teyong delo Israel kídí dete buula marla pobosuto, “Ngolu adín petom lokkom dopa tuamílo!

⁵ Atí are kamape Ijipt amonglo engo dopanam emlang makungem, pumrungem, lik ayéme, díílap eme delokke losun kídíem donamem ngolu míípa sudung.

⁶ Idola supak so ngolu doyém-doso along rungkai. Ngolu manna sokke kékonlo abídyang kaapamang.”

⁷ Mannade yasi-yagéla amí aménekíai.

⁸ Ami kídíde gígoola dekedem títa goola deme ímík mamílo nyotmík rongem ettíngpe ila, delo deme apu-apupe raala idungai. De olib téllok keenam kísa ngamdungai.

⁹ De manna kídarde notkolo yoeme aapam tangarlo lekope oyél sudungai.

¹⁰ Tombu eyablo erang miyongpe ami kídí delokke buunam-marnam dem Mosi bí tatto. Delo Ruutum bí yagorupe marto, deme kaala, Mosi bí yagorupe ankí alongto.

¹¹ Bí Ruutum me ííto, “Kape nokke béérang teyolo sikepe adírem bomangkan? Ami kídí sokke eged em ngok teyolo pyajém líkbomla ilíkko araso, íngkona agérko ngo ila nome míínying motun?

¹² Ngo sim ami kídí sim gela olentonía? Nebínge koo ojingem kape kísa bídudí deke kísape sim ami kídí sim bíla buluke buku kídílo nokke pébi sulíknam amonglo gíbodope, kape no ngom políkkan?

¹³ Ami kídí tabung legape íngko lokda ngo adínem mata biyén? ‘Ngolum adín dodope bilangka,’ emla bulu ngom érbomdung.

¹⁴ Sim ami kídí tabung sim ngo bíla yége lamang, ngok legape eget si tebeg aloodung.

¹⁵ Sikepe nok ségue ngok teyolo iyar pemílo delokke ngo nok kangkolo yéji dumílo, supak no ngom simo langka. Ngom agísue me nyoksu momapeka.”

¹⁶ Ruutum bí Mosi me poto, “Israel kídí aralok nokke mite-mirope kénnam lok, midum íying kínídko tomdum sulangka. Bulum nokkíng lekope Ruutum ke Tombu kera delo daga mínmo langka.

¹⁷ Depe irodem delo ngo tokla nome luposuyé, delokke nokkelo duuna aid kídílok ayoko laala buluke teyolo aid kídíem melíkyé. Depe irodem bulu takam nokke egedem gedum suyé delokke no agí atele ami kídíke egedem gebít suyimayé.

¹⁸ “Ami kídíem sipe polangka, ‘Nyampoke longem noluke adín dogape nolu tabunge deebín sulangka. “Ijipt amolo ngolu aiyatuai, ngolu adín dopaduamílo,” emla noluke marnam-buunam adudem Ruutum bí tatto. Supak Ruutum bí adín dodope adínem biyé.

¹⁹ Nolu lootel, loonyi demangkom longo longké, looying demangkom looying annyi petom kope adínem domayé.

²⁰ Idola poolo apíng kope, nolu delok kigedope, noluke nyobung nappalok dekede lendokupe dopayé. Kapeila nolu, “Ngolu Ijipt em kapei gínyo tokune?” emla marla-buula noluke aralo yémín gena Ruutum me lula bím mepakto.’”

²¹ Idola Mosi bí Ruutumme poto, “Sina ngo midum língko akké éjar amiem gíbodung, delokke poolo apíípe adínem dodope biyé emla no mandung.

²² Deddína bénbam emla rubamem moka dokom bulume pííbo suyédí? Siyéng lokke engo tabungem kuudokom, bulume pííbo suyédí?”

²³ Ruutum bí Mosime poyan suto, “Ruutum ke alage andeng aloodunía? Ngok poname arope iyédí, imayédí no supak kaayé.”

²⁴ Depe porodem Mosi gílen langkula Ruutum ke ponam tabudem ami kídíem popatoku. Bí buluke aralok miro íying kínídko tomdum sula Tombu keradelo dagamoto.

²⁵ Delo Ruutum bí doomug delo oila bím luposuto, delokke bíkkíng duuna aid kídílok ayoko laala miro kíníd teyong delo aidem melíkto. Edílo aidde bulukíng dungaa todí, bulu takame kaalu-kangor agomem poyinto. Idola bulu lekoda dekepe iyimato.

²⁶ Idola Eldad delokke Medad emnam midum annyiko agí notkolo duusuto. Bínyimte miro kídíke amín atkolo attak líktuai. Idola bínyi Tombu delo aamín gemato. Sipe ituakom aidde bínyi kelote dungaala, bínyi notko arasu delo kaalu-kangor agomem poto.

²⁷ Yaamé koo kone dugla deme Mosi me, “Eldad lang Medad bínyi notkolo kaalu-kangor agomem podung,” emla popato.

²⁸ Yaamé koo lokkai Mosi me igulna Nunke oo Joshua bí Mosi me, “Ngok ruutum, Mosi no bínyim lutum langka,” emla poto.

²⁹ Idola Mosi poyansuto, “Ngok legape no nedunía? Ruutum bí agí aidem ami takamlo bila, Ruutum bí ami tabungem kaaluna miripe imoduamílo emla ngo míídung.”

³⁰ Dekepe irodem Mosi lang Israel kídíde miro kídíke agí notkope gílat sutoku.

Ruutum ke Kuel Pettangem Biname

³¹ Ruutum kelok asarko mullenla siyéng asilok kuel pettangem muda bomtoku. Dekede notko delo lang loodum bedang gíbom suko rego mipí loope among teyolo mitar atel kope kedonpe yobala bííyin bomto.

³² Delo longe delo lang yoh delo delokke longekon delo loodumpe ami kídíe gílenla kuel pettangem umtíto. Sékote éjar kilogram rumkípe laadum sumato. Delo bulu dekedem notko delokke rego miyonglo more reyinto.

³³ Idola buluke adín kídíem nappalo dongo dungadape delokke akiilo méyyin mangadape, ami kídíke teyong delo Ruutum bí marlíngla itung-irélento.

³⁴ Dekepe ila moolop delokke amínem Kibroth Hattabaah (Domon-tíímon ke agoe) emto. Kapeila delo bulu adínem domon-tíímon bomna kídíem yuyinto.

³⁵ Kibroth Hattabaah delokke ami kídíe gílen langkula Hajeroth emkolo byakla notko itoku.