SANNAM 10 - DEENA BAIBÉL (BSI)

Baldínlok Pínam Bikul Tapung Kídíe

¹ Ruutum bí Mosime poto,

² “Kampope, bésordope demjépnam baldín loge bikul annyiko pílangka. Deme notko lokke byaklendí emlang dumsudíem gogyingpe mutkandope ilangka.

³ Edílo bikul tapung annyidem mutyédí delo Ruutum ke Tombu gíídalo Israel tabungem nok keralo dumsu molangka.

⁴ Bikul atelem mutyém Israel lokke opín-buangke ruutum kídí petome nok keralo dumsuyé.

⁵ “Edílo bikul tapunge mutyédí, delo sanggo danlo notko ina opíne byaklen geyé.

⁶ Lennyi nape mutyém, sokko danlo notko ine byakmín geyé. Tapung mutnamde byakdope emla gogyiname.

⁷ Opín-buang milungem gogdum sugape tapungem mutpe aido, idola ségu atelpe mutmapeka.

⁸ Aaronke miri oo kídíde tapungem mutpe aido. Sikesi siirum-siirum loope noluke igepenam idonge.

⁹ Edílo nolum iré-inyona miruem nolu agí amonglo mimakpe maklen yédí, delo bikul tapungem mutlangka. Depe imílo Ruutum noluke Shédí bí nolum míípasula nolume mirulok mopítyé.

¹⁰ Sokke kékon loteng noluke gíídí-siipe domanlo delokke Poolo Aní adeng-apelo, noluke romnam aman teyong lolang ashéng aman teyonglo nolu bikul tapungem mutlangka. Dekepe noluke Shédíke keralo nolum mínggenape iyé. Ngomino Ruutum noluke Shédí bí.”

Sinai Lok Israel Kídíke Byakname

¹¹ Dítak annyi lokke poolo annyike looying annyinana longe delo, Daapong Sonduk kako Ruutum ke Tombu teyong delok doomuge gyabínto.

¹² Delo Israel tabunge yépol-mooruk Sinai delok byaklen langkula abíd moole kídílo en-gola doomug delokke apéélíkko yépol mooruk Paran among loope en-goto.

¹³ Ruutum ke Mosime lulígnam adupe so byakrum so kerayalumpe byaklen bosuto.

¹⁴ Kerayalumpe Amminadabke oo Nahshonke ruutumpe lulíg aralo Judah opín-buade agí jandiem bomla notko delok gílen geto.

¹⁵ Sok méélampe Issakhar opín-buangde Juarke oo Nethanielke ruutumpe lulíg aralo gímín geto.

¹⁶ Delok rodem Jebulun opín-buangde Helonke oo Eliabke ruutumpe lulíg aralo gímín geto.

¹⁷ Delo ruutum ke Tombu dem atla dekedem joobomna Gershon kídíe lang Merari kídíe gílento.

¹⁸ Delok kékon delo Shedeurke oo Elijurke ruutumpe lulíg aralo Reuben opín-buade agí jandiem bomla gílento.

¹⁹ Sok méélampe Jurishaddaike oo Shelumielke ruutumpe lulíg aralo Simeon opín-buangde gílen mínto.

²⁰ Delok rongem Deuelke oo Eliasaphke ruutumpe lulíg aralo Gad opín-buade gímín geto.

²¹ Delo deena ekuserang kídíem joobomna Kohath kídíe gílen mínto. Buluke píímang adape Ruutum ke Tombudem mola hoyin líkpe aidungai.

²² Delok kékonlo Ammihudke oo Elishamake ruutumpe lulíg aralo Ephraim opín-buangde agí jandiem bomla gílento.

²³ Sok méélamlo Pedajurke oo Gamalielke ruutumpe lulíg aralo Manasseh opín-buange gílen mínto.

²⁴ Delok rongem Gideonike oo Abidanke ruutumpe lulíg aralo Benjamin opín-buange gímín geto.

²⁵ Méélam yalumpe gímín gepena orek kídíke kaabomnape Ammishaddaike oo Ahiejerke ruutumpe lulíg aralo Dan opín-buange agí jandiem bomla gílen geto.

²⁶ Sok méélampe Okranke oo Pagielke ruutumpe lulíg aralo Asher opín-buange gílen mínto.

²⁷ Delok rodem Naphtali opín-buangde Inanke oo Ahirake ruutumpe lulíg aralo gímín geto.

²⁸ Sikepe Israel kídíe gílendoem orek orekpe yonlento.

²⁹ Mosike ato abu Midian ami Reuelke oo Hobabme Mosi bí poto, “Ruutum ke, ‘Ngo nolum dem biyé,’ emla mansuko moolop delo ngolu supak byaklendak, depeila kaju ngolukíng no enmín getoka delokke ngolu nom ai-kampope yébo-dakbo suyé, kapeila Israel kídílo Ruutum bí gaina ato-siroem toge sutung.”

³⁰ Hobab poyan suto, “Ma ngo enmín gemayé. Ngo agíke amisulo lang agíke among sulo ensuyéku.”

³¹ Idola Mosi lutumto, “No ngolume mepak sumapeka, kapeila yépol-moorukso notko ipekuem no kéndung. Depeila no ngoluke amigpe ilayé.

³² No ngolukíng enmín gemílo, Ruutum ke gaina ato-siro binamem, nomteng tarongem biyé.”

³³ Dekepe embo surodem, bulu Ruutum ke dííte delok byaklenla longum ko ento. Dekepe longum endudem buluke duupekoem mabodope, Ruutum ke Daapong Sondukde buluke keralo en-geto.

³⁴ Notko delok buluke enlendo delo Ruutum ke doomuge buluke teyolo gyabomto.

³⁵ Edí-edílodí Daapong Sondukde gílen todí delo Mosi bí sikepe poto, “E Ruutum, darep langka, nokke miru kídíem monpan-monran sula, nom akna kídíem duknyok gemolangka.”

³⁶ Edílo de apéétodí delo bí sipe poto, “E Ruutum, sankén yimanam éjar Israel kídílo, aalat sulang kuka.”