PAULKE ROMKÍDÍLO ATNAM SITHIE 9 - DEENA BAIBÉL (BSI)

Shédílang Bíkke Amikídíe

¹ Kristokíng ngo arorupe podung ngo memang, ngokke aapíso Deena Aidlok sim berokpe kénsudung.

² Ngokke ainaso bojérupe duuge idung delokke míídírsue itídung.

³ Kapeila ngokke agíke opín amikídí, ngokke bírokídí legape ngo agíe Shédíke péko béngko gooralo duula Kristo kelokke pekpan sula dungkuai emla míísudung,

⁴ de Israel amíkídí legang pemoko. Shédí bí bulum agí oo kísape imola delokke bulukíng bíkke angun ralnamem lengkanto; bí bulukíng daapongem poobosula delokke bulum ayon ngiitomem bito; kumsunam arodem bulu bomdung;

⁵ bulu amín kana Hibru buku kídílok lenne; delokke amipe batna Kristo bí buluke opíne. Takamem kaabomna, Shédíme agínpe yidge daklangka. Amen.

⁶ Shédíke pébisunamde iramkai ngo emmang. Kapeila Israel takamde Shédíke amipe imang.

⁷ Abrahamke otíng oyin takam dekom Shédíke ome-oope imang. Dem megeyéla, “Isaak kelokmin noluke otíng oyinem kílentokune.”

⁸ Agom konpe, Shédíke ome-oode adín lokke ome-oo kísamang, idakkom pébisunam lokke ome-oo kídí demmin Abrahamke ome-oo emdune.

⁹ Kapeila simin sikepe pébi subomname: “Taríkpaklo ngo aalatyéku, delo Sarah bí ooko oyé.”

¹⁰ De petommang. Legade Rebekahke oo annyide abue atele, de ngoluke abu Isaak bí.

¹¹ Depe idola, opum sunam annyidem ola Shédíke ullenname apíídope ainam aimang agérem imangadape:

¹² agérlok imape idola bím tomlennade mimedem, “Abíya de aníyadem kumyé.” emla pobito.

¹³ Dooying kitabe podung, “Jakobme ngo ayadung, idakkom Esaume ngo kangkidung.”

¹⁴ Demílo ngolu kape empe? Shédí bí jonma nakua? Demang!

¹⁵ Kapeila bí Mosime poto: “Ngokke mííba sunam amidem ngo yaasamyé, delokke ngokke mííba sunam amidelo ngokke ayang míípa suname duuyé.”

¹⁶ Delok legape, si tani míísalok demangkom ralkolok imang, idakkom Shédíke yaasam lokmino idune.

¹⁷ Kapeila Dooying kitabe Pharaohme podung: “Ngokke pauarem nolukíng lengkan nape delokke ngokke tolnamem tani among takamso pogoodope emla, ngo nom sok legape gerep motung.”

¹⁸ Delokrongem Shédí bí bíkke yaasampe míínamem yaasamdung, delokke edamope míínamem edamodung.

Shédíke Marnam Elang Yaasamname

¹⁹ Nolu akone ngom “Demílo kapeila Shédí bí ngolum imemem luket líkkane? Séko bíkke míínamem ikísuyéne?” emla luyépe.

²⁰ “Idakkom Shédíme luyasuna amino séko?” Pínam atíde pína bím “No ngom kapeila sikepe píkane?” emyan suyénía?

²¹ Delokke teyolo, kédeng pekingem pína amide delem atellok kédeng peking akonem edíína agér gérnape delokke akonem iman mankepe agí mínggípe ilamanía?

²² Delokke si Shédíke dekepe inam atíde arodung. Bí agí marlíngem lengkannape míítuai delokke bíkke pauarem kénmope míítuai. Idakkom nyokpena kídí, bíkke marlíng bomnam amikídí teyolo bí asoope hakjém gepooto.

²³ Delokke bíkke angun ralnamem paadope emla bíkke iruunam kídí ngolum, bíkke ngolukíng pélíknam, bíkke lumsamanam, angun ralnam emte bí ngolum lengkan bilííto.

²⁴ Kapeila ngolumin Judai kídí goora petom lokmang idola Mipak kídí goora lokteng tomnam amikídíe.

²⁵ Hosiake kitablo bí sikepe podung: “Ngo bulum ngokke amimang kídídem ‘ngokke amikídíe’ emla gogyé; delokke ngokke opín mangem ‘ngokke opíne emla gogyé,’

²⁶ delokrongem, bulum ‘Nolu ngokke amimang’ emkopak amodelo bulum ‘Nolu turna Shédíke ookídíe emyéku.’ ”

²⁷ Isaiah bí Israel amikídí legangem sikepe gokdung: “Israel amie yépol kísape bojé dakkom, anyong komino turpenade iyéne.

²⁸ Kapeila Ruutum bí agí agomem tani amoso menarupe aromoyé.”

²⁹ Si Isaiahke kerape pokam pakpe idung: “Ralya yalumna Ruutum bí ngoluke otíng oyinem ayoko metur mangamílo, ngolu Sodom kísape iyai, delokke ngolu Gomorrah kísape nyokyai.”

Paulke Israel Kepe Kumname

³⁰ Demílo ngolu kape empe? Agísue Shédíkelo yéjiidope ralsumana Mipak kídíem, míngkelok bulum bíkkíng yéjii motungku;

³¹ idola ayonlok yéjii namem matana Israelde dem paamín gemang.

³² Kapeila paamane? Legade bulu dem míngkelo míída sumape, bulu ingkuem itodí delo míídasuto. Bulu “Duusékna elílo” tupsuto.

³³ Dooying kitabe sikepe podung: “Kaasutola, ngo Jayonlo ami kídíke tupsu peko elíngko delokke bulum olet mopena líírengko leetung, delo bíkkíng míída sunadem edílote annyi momayé.”