PAULKE ROMKÍDÍLO ATNAM SITHIE 5 - DEENA BAIBÉL (BSI)

Shédíkelo Aibosukuname

¹ Delok legape ngolum míngkelok yéjiinape sankolok, ngolu ngoluke Ruutum Jisu Kristo kelok Shédíkíng aibosu dungku.

² Jisu bí míngkelok supakke ngoluke yéko yanggolok kéndope ngolum langaato. Delokrongem ngolu Shédíke angun ralnamlo míínam sunamem ashéng bomdung.

³ Dem petommang, ngolu ngoluke duuk adírlokke ashédung, kapeila ngolu kéndung duuk adírde yémgap gemodung;

⁴ yémgapde míípe míngor modung; delokke míípe míngorde míínam sumodung.

⁵ Delokrongem míínam sunamde ngolum mínga sumomang, kapeila Shédí bí bíkke ngolum binam Deena Aidlok bíkke ayangem ngoluke aapí ainalo políkdung.

⁶ Ngoluke ralmaduem, tarík paklo, Kristo bí Shédí kénsumana legape sigebito, dem nolu kaasudung.

⁷ Yéjiina legape akon amie sibi penamde sipo manamko. Aina legape akon amie paklane sige penamdem peso malado.

⁸ Idakkom Shédí bí agí ayangem ngolum sikepe lengkanto; ngoluke paabla duudungem Kristo bí ngolukepe sigebito.

⁹ Bíkke iyyilok ngolum Shédíkelo yéjii motungku; edítko demílo, Shédíke marpenam lokke ngolum mosing tungkune!

¹⁰ Kapeila, Shédíke mirupe idungem, bíkke Oolokke sinamlok ngolum bíkkíng laadum sutung kumílo, laadum supala, bíkke turnamlok edítko ngolu turyékun!

¹¹ Si deke petommang, idakkom ngoluke supak sonsu kukeng ngoluke Ruutum Jisu Kristo kelok ngolukom Shédíkíng ashédung.

Adam Delokke Kristo

¹² Delok legape, paabe ami atellok tani amoso aanam kísape, siname ami takamlo píngkai, kapeila takame paab kato.

¹³ Ayonem bimang adape, tani amoso paabe duuto. Idola ayon kamang adape paabem kénbeng mangai.

¹⁴ Depe iduakom Adam kelokke ila Mosi kelope siname duubomto, Shédíke ponamem ipatsula Adamke paab inam kísape imana kídílote paabe duuto. Adam bí aapena ami delokke aodem dunggesuto.

¹⁵ Idakkom annyide akam bosumang, kapeila Shédíke asampe binam amande Adamke paab kísamang. Si agom si arue delok ami atel delokke paablok deddína amie sito. Idakkom Shédíke yanggode botteyane, delokke ami atel, Jisu Kristoke yanggolok deddína amiem Shédíke asampe binam amanpe bidung.

¹⁶ Delokke Shédíke aman delang ami atel delok paabde angu sudung. Paab atellok “Bisare” lenla sinamem langaatung, idola amande deddína paabem deemo tungku.

¹⁷ Si agomsi arue ami mipil atel paabna ami delokke legalok siname duubomto. Idakkom midum atel Jisu Kristoke inam agérde edítko botte yadun Shédíke lumsa manam yanggongem paabna takame delokke bíkkíng asampe yéjii mokunam takamde Kristo kelok turnamem yébomyéku.

¹⁸ Dekepe iname, midum atel imem kolok ami takamem simonam kísape, yéjiina ami atel agérlok ami takam turnamem langaatoku.

¹⁹ Legade mipile atel tatmang kolok deddína amiem paab kamoto, deke akampe midum atel tatkolok deddína amiem yéjing motoku.

²⁰ Imeme bojé lendope emla ayonem ilento. Idakkom ingkolo paabe bojékadí, yanggonge bojéyape lento.

²¹ Dekemílo, paabe sinamem duubom tumílo, Shédíke yanggonge deenamem yébom langkula ngoluke Ruutum Jisu Kristo kelok duuyarna turnamlo gílík dungku.