PAULKE ROMKÍDÍLO ATNAM SITHIE 3 - DEENA BAIBÉL (BSI)

¹ Judaipe idola demílo ingko yangko laabdun, delokke demangkom dínbíng iyod sumanam delokke ingko yangko are kadun?

² Bedang takamlo apíídunía? Kerayalumpe, bulum Shédíke agom kídarem bulukíng bilíktung.

³ Idakkom bulu míngkeng kamamílo kape iyén? Buluke míngkeng pííramde Shédíke aruem inyok biyélanga?

⁴ Berokpe depe inyokmang! Tani takame meduakom, Shédí bí arone. Sim sikepe attung: “Nokke agom ponam delok no arone emla porman bisupe aido; Nom gusor moyém no lukumrupe aido.”

⁵ Idola ngoluke yémem kolok yéjii namem berokyape lengkanmílo ngolu kape empe? Shédí bí imemdung emyénía? (Sim ngo tani agomlok pokídung.)

⁶ Depe imaruyé! Shédí bí jonmamílo, kape kísa tani amongem bisaryéne?

⁷ Ayokone sikepe popéé sukílado, “Ngokke menamlok yéname Shédíke aruem parlen mola bíkke angun ralnamem bojé modumílo, ngom kape kísa supaklope paabna amikope míídune?”

⁸ Demílo kapeila “Ainem paadope atímanem ngolu ilaju” emmane? Amieke ayoko, arope sikepakpe pola ngom lukaato. Bulum buluke yédulok ajéng iyé.

Sékote Deena Kamang

⁹ Demílo ngolu kape emsupe? Ngolu Judai kídíe Mipak kídíem aiyadunía? Berokpe aiyamang! Judai kídí elang Mipak kídíe paab gooralo akampe duuto emla ngolu potubong.

¹⁰ Dooying kitabe podung: “Sékoteng tanie deena kamang.

¹¹ Sékote kénna kamang. Sékoteng Shédíme matana kamang.

¹² Shédí kelokke takame angukai, bulu atelkope imem kolok gíkai; sékote aipe agér ina, atelkote kamang.

¹³ Buluke alííde ago gorunge; buluke ayode yadna mílíe. buluke nabbéllo tabí asum aare dung.

¹⁴ Buluke nappade béénam rolnam mílípe idung.

¹⁵ Buluke alede yilíí bídkolo erbomdung;

¹⁶ Buluke yénamde líínam monam mílíe,

¹⁷ delokke dengom bedangem bulu kénmang.

¹⁸ Bulu Shédíme pesona amig aang kamang.”

¹⁹ Supak ngolu kaaname, ayone ingkuem podudí de ayon gooralo duuna takamem podung, depe emnamde sékote agom poge peko kaimang, kapeila tani among tabusi Shédíke kangkolo yémem nape ikai.

²⁰ Delok legape ayonem bomgappe kolok bíkke keralo séko mete yéjiinako emmayé; dempenem ayon lokmin ngolu paabem iket sudune.

Kapekísha Shédíbí Ngolum Bíkkíng Yéjii Modungkune

²¹ Idakkom supak taniem Shédíke bíkkíng yéjii moku namem lengkantung. Mosike ayonelang delokke kaaluna mirikídíe hakii bituakom si ayonlok atí agom kamang.

²² Si Shédí kelok yéjii namsi Jisu Kristokíng míngke lokmin míngkesuna takam teyolo aadune. Delo lungu pongu supe yanam kamang.

²³ Kapeila takam tanie paab ito delokke Shédíke angun ralnamlo pííramkai,

²⁴ delokke Shédíke yanggolok Kristo Jisuke repít kukolok bulum ítsampe deene emla santungku.

²⁵ Jisuke yilíng bídge kolok míngke sunape Shédí Bí Bím paab alíkpe petlík penam sobope bito.

²⁶ Kapeila kerape bí hakjémla tanikídí lokke paab kídarem kaapee kaatuai; idakkom silo melo bíkke yéjiinamem lengkandope emla bí buluke paabem asoope kaalímang. Sikepe Shédí bí agíe deela delokke Jisume míngkesuna miyongem bí yéjii modungku emnamdem lengkandung.

²⁷ Demílo ingkolo yidsu pekue? Koyid supeko kamang. Delokke legade ingkue? Ayonem bomgap kología? Demang, míngke lokmin.

²⁸ Kapeila ngolu poyin sudung, taniem Shédíkelo yéjii mokunamde míngke lokmin idune, ayon ngiitomem igekolok imang.

²⁹ Shédí bí Judai kídíke Shédí petomía? Bí Mipak kídí kepete Shédí manía? E, Mipak kídí kepekom Shédíe bí.

³⁰ Shédí bí atele, bí dínbíng iyod sunemkom míngkelok deemo dungku delokke dínbíng iyod suma nemkom sok míngkeng atelsok deemo dungku.

³¹ Ngolu demílo sok míngkeng sok ayonem ipak dunía? Berok ipakmang! Dempenem ayonem gerep modung namino.